قصيدة...ياعالي المرقاب وقفت اراعيك

[المنتقد]

بسم الله الرحمن الرحيم
السلام عليكم ورحمة الله وبركاته ,,

حياكم الله جميعاً واليوم الله يسلمكم اخوتى واخواتى عندنا لكم قصيده للشاعرسايل الشرارى ويقول فيها:-

ياعالي المرقاب وقفت اراعيك

.....................................ميقاف من ضيع جميع الدلايل

جابتني القدره وجيت بحراويك

........................................جيتك بلا ميعاد والحظ مايل

قلت اتريض في جنابك واواسيك

....................................لو كنت لاتسأل ولا انته بسايل

عسى يجي غيث من الوسم يسقيك

.............................وتخضر سهولك من جديد المسايل

يسقي مرابيعك وتنور مقاليك

.....................................ويلتم جمع الذاهبة بالثمايل

ابي اسألك عن حي اقفا مخليك

........................................كأن ما بينك وبينه جمايل

ذاك الذي يارجم شيد مبانيك

..............................علا شموخك فوق روس الطوايل

خلا الرياح العاتية ما تاذيك

.....................................أيضا ولا تبني عليك النثايل

لملم حصاك وجمّلك في مباديك

....................................خلاك شارة من كبار المثايل

وبقيت شامخ رغم كثرة مآسيك

...................................رغم الرياح وبردها والقوايل

كم حال ملقوعٍ بوقته بكافيك

...............................وكم ونةٍ تشكي الدموع الهمايل

وين الجموع اللي تمرك وتأتيك

....................................أيام ماغير الركايب وسايل

وين العيال اللي تواعد مراميك

.............................فوق الركاب الضامرات الاصايل

وين الجهام ووين حيٍ وقف فيك

..................................ينظر قدوم معيسات الشمايل

وين البيوت اللي تشيد بأراضيك

..............................وين اهل القالات واهل العمايل

خلت منازلهم وشانت مواريك

.................................وراحو من ديارك بليا رحايل

يا خدي اصبر وازرق الدمع غاشيك

.............................مثل المطر من صادقات المخايل

ويا وقت يبقى حاضرك مثل ماضيك

...............................ما فيك مأمن يا زمان الهوايل

قصرت مماشينا وطالت مماشيك

...........................ونصيب مسعى الحي منك القلايل

لو طالت ايامك وزانت لياليك

.............................لك البقى من عاش بالكون زايل


ارجو ان تنال استحسانكم والمعذرة عن كل نقص وتقصير ...والسلام عليكم ورحمة الله وبركاته ,,

[سعودية ولي الفخر]

لو طالت ايامك وزانت لياليك

.............................لك البقى من عاش بالكون زايل

سلمت اناملك على هذا النقل الأكثر من رائع

دمت بود