شويّخ متشيّخ

[شيخ النظر]

شويّخ متشيّخ

شويخ : السلام عليكم ورحمة الله وبركاته

عضو : وعليكم السلام ورحمة الله وبركاته

شويخ : كل عام وأنتم بخير من العايدين الفايزين المقبولين المعتوقين من النار...

عضو : وأنت بمثله هو أنت للحين حي؟؟؟

شويخ : لا أبشرك صرت مدينه وفي طريقي أني أصبح قارّة...

عضو : أقصد يعني عايش اللي عكسها ميت لاحول ولاقوة إلا بالله ماتفهم سعودي...!!!؟

شويخ : شووووف الله يرضى عليك تراني سعودي قديم حتى الصداء طلع في أطرافي بس أمزح معك وأنت مايبي لك على طول كبيت العشاء... ؟

عضو : أي عشاء... !!!

شويخ : حلوة مضارب البيسبول (علامات التعجب) اللي أنت حاطها جنب العشاء شكلك مقلط سواقين باصات وحاط لهم عدّة المضاربة...

عضو : أنت الظاهر قمت تخرف وش هالحكي !؟

شويخ : الحكي طال عمرك والحاضرين أني رجعت أكتب بثوب جديد توني مفصلة للعيد ولكن من غلاكم لبسته لكم هنا وسميته (شويّخ متشيّخ) راح أسولف وأخرف عليكم تقريباً مثل يومياتي ولكن هالمرة راح تعكس صورة للشارع وأوضاع الناس بقلب محب حبكم وعايشتوه في أمورة الخاصة اليوم حب يظهر لكم من بيوتكم وحياتكم اليومية...

تعريف بنفسي

شيخ النظر أسم الدلع (شويخ) أسمر غامق مائل للأسود الداكن مملوح ومن أتدهن أتحدى أحد يقدر يمسكني لأني أملص حتى من ملابسي أحياناً خصوصاً لامشيت في الليل ماأبين للسائقين إلا بالنور العالي وإذا أبتسمت لأن ضروسي مش أسناني ماتبين إلا بالقهقه وإلا أسناني أتذكرها كانت في فمي عيد 1377 هـ يوم جت خالتي من مكة وجابت لنا حلقوم ونشب في أسناني لين شالهم لي الحلاق عمران الله يرحمه...

يمكن بعضكم يعرفني ياأما حبيت كتفه وإلا راسه يوم من الأيام أو صبيت له فنجال قهوة في حدى هالعروس وإلا قراء يومياتي قبل أدخل السجن في قضية بيع جح (بطيخ) على الدائري الشمالي بتهمة تشويهة مدينة الرياض كن هالسيارات القرنبع اللي تمشي محملة سبعطعشر مصري وثلاثطعشر باكستاني رايحه للعماير مجملة شوارع الرياض بالزحمة لا وبدون لوحات ولاأبواب ماتشوه أستمارة منتهية ولاتأمين ولاشئ تمشي شوي ويدفونها شويات...

عاد اللي يعرفني قبل يمكن يعرف أني حمقي شوي !!
أقول له تطمن تراني صرت بااااارد مرررررررررة لدرجة أني إذا عطست طلع من خشمي ثلجه وآخر مرة جلدني واحد ولاقلت له شئ ويوم جاءت الشرطة جلدوني بعد ليش أني ماني مأمن على نفسي ضد الغير...

المهم اللي بيسألني عن العائلة والعيال يسمح لي ماراح ارد عليه لأنهم شكوني عقب اليوميات على الأمير سلمان ودبسوا لساني بدباسه وصدر في حقي حكم بعدم التعرض لأم نمر وعيالها....

طيب وش أبي هنا ؟؟؟

أبداً ماأبي إلا سلامتكم بس إيميلي لقيته وارم من الرسايل عشان أرجع أكتب ولعيون وطلب كل غالي رجعت أكتب وأتمنى أني أتواصل بشكل مستمر وقد حرصت على أن تكون كتاباتي من خلال موقعي الحبيب والوفي الدرة الذين تحملوني في السابق وأحتفظوا بمكاني في غيابي جزاهم الله عني خير جزاء...

طبعاً أنا متأكد أني بأحتل لي صفحة وبأحضر فيها ثنين من أهل الأرض عشان يلقطون الواحد بحلقة من يقول لي هات إيجار لأن أبو سعود طال عمره معطيني صك بوضع اليد اي مكان في المنتدى أقدر أسولف فيه وأخرف ولاعلي من أحد ورجاءاً من الشباب والشبات ترى معي ورقة موقع عليها جميع أمراء المناطق تقول ((لايمكن التنبوء بما يفعل)) فأحذروا وخلوا عنكم الحرش مع الخال الحرش....

طبتم وطابت أيامكم تقبلوني بحب تراني من بعيد أنحب

[شيخ النظر]

من العايدين




كنا قبل أطفال وكان العيد أربعة أيام من قلب وأحياناً يمتد العيد يومين زيادة إلى أربعة

أيام خصوصاً للي أنتهوا صيام الست من شوال لدرجة الواحد كانت تمتلي مخابيه

قريض وقروش ومن الفرحه مايدري منهو في يده وكانت الناس بعد صلاة العيد كل

واحد يروح لبيته ويجيب عيده (عبارة عن طبخة يا رز أو مرق أو قرصان أو جريش

وإلا مرقوق قاسمة الله) ثم عاد تجيك ذيك السفرة اللي توسع الصدر من ذا إلى ذاك يعني

ممتده بعرض المسجد والقهوة والشاي والنعناع ولين أكتملت السفرة وألتم الناس عليها

يالله كل لك لقمة وذق عيد اللي جنبك لين تلف على الأكل كله ثم ترجع لصحنك وتشيله

في يدك ثم تمر به على الصحون الباقية كل صحن تأخذ منه بالملعقة وتحط فيه عشان

تذوق أهل بيتك من العيد جاي بصحنك مليان وترجع به مليان والناس كلها شبعانه من

الفرح والحب والسرور...


عاد عقب ترجع للبيت يذوقون أهلك العيد ثم تطلع بهم تمرون تسلمون على الجماعة

والله أني أذكر أن رغم أن الرياض صغير أننا مانرجع للبيت إلا صلاة العشاء دايخين

ونبي الرقاد من كثر لبيوت اللي سلمنا عليهم وعايدناهم...


وثاني يوم وثالث ورابع هكذا عاد يجي دور الأقارب اللي بعيدين عن الرياض أن لهم

حق يعني أكبر من أبونا رحنا لهم وإلا جوا لنا وياسبحان الله كان بيتنا ديوانية وروشن

ومطبخ وكنا نستقبل ثلاث أربع عوايل بحب وأريحية لدرجة يقعدون عندنا أسبوع ولين

بغوا يمشون قعدنا نحلف عليهم إلا يجلسون...


عن نفسي عشت العيد بشكل نفسي أعيشه لعيالي وأحبابي نفسي أذوقكم طعم الفرحة اللي

كان قلبي يتوجد لها من عيد لعيد...


ياسبحان الله هو العيد تغير وإلا الرياض وإلا الوقت وإلا أحنا؟؟؟ مستحيل كل شئ زي

ماهو لأن والدينا رحمة الله عليهم وأخوي وأبو الغالية والمسلمين أجمعين كانوا من

أحسن الناس وكانت النفوس أخف عبء من الآن رغم كبر البيوت وزيادة الخير ووجود

الشقق المفروشة والفنادق وكبر الرياض إلا أن العيد أصبح صل وسلم على اللي

يقابلونك ثم عود أرقد لين في الليل تلاقي جماعتك في أستراحه كل واحد مروح أصغر

واحد في عيالة عشان بس ماأحد يشره عليه تسلم ثم تروح للشباب في القهوة وإلا في

ديوانية فلان وخلص العيد عاد تبقى الطراطيع حقة البلدية تدّهر وكم هندي ملبسينهم لبس

أهل نجد ومعطينة طار وسيف وقال لك عرضة لأنه مسجلة من عام 1400 هـ وثاني

ملبسينه بهلوان وعيدكم سعيد ومن العايدين...

[محمد بن سعد]

حياك الله اخونا الغالي شيخ النظر

عودتكم لوحدها عيد الله يحفظم

وفرحة العيد تبهجها رؤية بقية الأسرة واجيالها
جد وجدة وعموم وخوال واخوان وخوات والابناء والاحفاد
اعاده الله عليكم بالخير والأمن والصحة ورضى الله

وكل عام وانتم بخير

[شيخ النظر]

حياك الله اخونا الغالي شيخ النظر

عودتكم لوحدها عيد الله يحفظم

وفرحة العيد تبهجها رؤية بقية الأسرة واجيالها
جد وجدة وعموم وخوال واخوان وخوات والابناء والاحفاد
اعاده الله عليكم بالخير والأمن والصحة ورضى الله

وكل عام وانتم بخير

بارك الله فيك حبيبنا الأخ الأكبر قدراً د محمد ياعساه عيد سعيد عليك وعلى الأمة الإسلامية

وتعيد وتعيد سنين وسنين مع من تحب مسرور الخاطر مقبول العمل أن غبت فغيابي عن ظروف

وأن عدت فأنا عدت لمكاني بين أحبابي وأخوتي لاحرمت من هالوجيه الطيبة من جميع القراء

ولامن دعواتهم في ظهر الغيب...

دمت بود يالغالي

[شيخ النظر]

الرياض


في شوارع الرياض من دخل الشهر الفضيل لين هالأيام بداية الدومات كنك تلعب هنْد من عشرين

ورقة السيارات فوق بعض ولاترى سيارة مرور وكله كوم وزحمات السيارات عند المخارج من

الدائري تلاقي مطاعم هالمثلوثة سادة أبو الطريق لدرجة تحس طريق الخدمة وارم يبي له تدهين

بفقس ياعسى الله يفك عوقه وبدون أي منهجية ولاتنظيم بس يفتح المطعم ويسد الطريق بدون حسيب

ولارقيب والغبنه تجي توقف سيارتك عند باب بيت تجيك الشرطة والبلدية وشركات المقاولات

يصحونك من عز النومة تعال طلع سيارتك ياأما حفريات وإلا زفلته وإلا سيارة البلدية ماتقدر تمر

وإلا جارك مشتكي يقول ماعرفنا نلبق سياراتنا...

طيب هذولي مايعرفون يشتكون على هل المطاعم اللي سادين الطرق الدائرية في الرياض وإلا

راعين المطاعم مدعومين لدرجة حتى مراقبين البلدية مايمرون عليهم ويشوفون أنواع الوسايخ

والكراتين زود على زحمة هالسيارات...

طيب الأخ مدير المرور بعد ستين ألف وظيفة للداخلية ماشفنا لاتوظيف ولاتغيير غير بكاميرات

ساهر اللي كشفت حريم خلق الله خصوصاً على الطرق السريعه لما تفتش المرأة بتأخذ راحتها

وتلاقي هالكاميرات تجيب حتى لون ملابسها الداخليه من قوة الفلاش لدرجة أن الناس لو تشوف برق

في السماء قالوا بس ساهر صايد طيارة مسرعه أما شوارع الرياض فاصبحت مثل علب السردين

وماتلاقي شارع يدوب يتحرك إلا فيه برادو موقفه على جنب والسرعه أربعين وتصيدك من تمشي

ثلاثة وأربعين حتى توزيع السرعه في الشوارع أي كلام في أي حته أهم شئ نجح مشروع ساهر

وفشلت شوارع الرياض فشل ذريع لايتناسب مع مستوى الرياض كعاصمة...

ياعالم ياهوه الرياض فيها فشل كلوي وأنسداد في الإثنى عشر والأمعاء كمان ياأما جيب أحد يقرى

عليها ويطلع الجن اللي فيها وإلا يمكن تروح منها هالعين المهم نبي حل...

[شيخ النظر]

نـــجـد



من الفصول الأربعه

فيني طفل

يغط بي أصبعه

وأنبت نفل

في قلبي ورد

وفي خطواتي ود

وأن جاني فصل الشتاء

ضميت نفسي بنفسي

ليل

لين تشرق شمسي

وصحت يانجد

أحبك حيل

لاتنشديني من متى !؟

لأن جدي

وجد الجد

ورثوني حبك

وبذروني في أرضك

ومن كبرت

أزهرت

بليا حد

كلي ورد

أحمر

حب

أصفر

غيره

ابيض

إعجاب

لك يانجد

بليا حد

غرامك فيني

يرويني

والنفس تقول له

زد زد زد