كلامها للـقلـــب مثل المــــداوي - قصة وقصيدة

[المنتقد]

بســم الله الـرحمــن الرحيــم
السلام عليكــم ورحمـة الله وبركاتــة ،،
هذا رجال طالت عماركم راح أيام الربيع وقعد يتمشى ولا الارض زينه ومزهره والربيع منتشر والخضار عام ,
والارض كلها خباري ومياه , ويتمشى حولها ويدور , والرجال دقاق نظر بخيص ولا هو بعجل يتفرج ويطالع ولا والله يحصل أثر فقع قعد يدور الفقع و جمع له شوي , والله يوم مشي وتعدي ضلعان وجبال ولقى أرض سهله وزينه ودمثه وفيها عرب نازلين اللي معهم غنم واللي معهم ابل تشطر عنهم بعيد وقام يتمشى الحاله وأثناء ماهو يتمشى مادرى إلا والله هاك الغنم يوم انهلت عليه من عند هاك الثنيه ولا وراهن هاك البنت عليها جلال ومتحشمه , سلم عليها من بعيد , سلام وعليكم السلام , وقربت منه ونشدته وش انت يالاخ ومتاك جاي هنيا , قال والله جاي اتمشي و أدور إن كان فى هالارض فقع , ولاهي معها فقع مجمعته قبل لا يجي هو , خذت الفقع اللي معها وقالت خذ هذا تفضل أنا مجمعته , قال خليه لكم
قالت لا حنا مقيمين في البر وأنت طرقي يمكن تقعد الليله وتمشي خذه وهذي الساعه المباركه ,خذاه منها وقعدت تتكلم معه شوي وتنشده من اى العربان والحقيقه البنت على جانب من الثقل والجمال وفيها حياء عظيم , ولا تهرج الا على اوصول وكلام متزن ورزين ,
, قالت له ياضيف الرحمن تفضل عند أهلي شف مكاننا هناك تعال تغد عندنا او تعش , واستانس منها على كرامتها وانها قلطته وقالت له تفضل , قال ان شاء الله أشوف أنا بتمشى شوي إن امداني مريت عليكم و إن ما أمداني , انتم مقيمين هنا ؟ قالت ايه والله حنا مبطي في هالمكان , المهم شعفت قلبه بكلامها وكرمها وبثقلها ورزانتها وهو شاعر والشاعر مرهف الحس , المهم يالربع مالكم بالتطويل انتهي وقت الربيع وهو لا يزال يذكر هاك الموقع وهاك المكان وهاك الحبابه والطرافه والكلام الطيب , وعقب فتره عقب ما جاء الربيع الثاني قرر قال ابروح أزورهم في مكانهم اكيد اني ابلقاهم , اخذ معه شي من الهدايا مثل ماتقول هديه بسيطه كسوه وقال اروح اسير عليهم, فتجهز وراح يوم راح ووصل للموقع اللي هو خابر اللي شافهم فيه جاء ولا والله ما هم فيه ولا هم شادين ورايحين لمكان ثاني لانهم يتابعون مشاهي حلالهم, وفعلاَ ما لقى أحد هاك الليله اللي هو وصل فيها لمكانهم وما وصل الا متأخر ونام , نام في هاك المكان لكنه لا يزال يتذكر هاك الموقع اللي يوم تعطيه الفقع فيه ويوم تقابله ويوم يحكون عند هالحصاة شوي ويتقدم عنها شوي وتذكر كلامها الطيب له وإن كلامها يهشش القلب شوي وزين ويدخل العقل كل هالاشياء تذكرها وهو يتمشي .. أمساه الليل ونام في هالمكان لكن يوم نام وجاء تالي الليل توقظ ولا والله يسمع حس ذيب بعيد وهيضه هالذيب ............. وقال

البــارحه جــاوبت لي حس عـاوي
........................... ذيب عــوى لجيت بالحـــس ويـــاه
ذيب يجــر الصــوت حسه خــلاوي
............................ ياقـلب ياللي جاوب الذيب بـــعواه
والصبح بانت في ضميري أهاوي
......................... صوت (ن) زعجته ليت خلي توحـاه
يـادار ما شفتي ظبــي المــطاوي
............................. أتلى عـلامي به غشنك رعايـــاه
أنا على شــوف الحبيب شــفاوي
................................ كأنه هنـــيا خبرينـــي بممـــساه
قالت لي الأوطان جلــع ضحــاوي
............................. اليـــوم رأس الرجــم هذا توطـــاه
أمس بــهذا وأصــبح اليوم نــاوي
................................ يتلى ســلف بــدو بعيد معشـــاه
كشف لـهم بــرق سديد عشـــاوي
............................... يخيــلونه يم خشــــم المسنــــاه
يبـــون مربــاع بـهاك الحــــراوي
............................ لا زاف زملوقه وشبعت رعايـــاه
إخذ الخبر ما هوب خرص وهقاوي
.............................. أعطيك علم صويحبك وين تلقاه
أدنــي مرابيعه بخشــم الصـداوي
.............................. وبيــوت مقياضه بقرية مبنــــاه
مير اطلب الله لــو صوابك مخـاوي
................................ كم واحد قبلك عشيره تمنــــاه
يالعين ما ينــفع كثــير الشكاوي
.............................. إلا على اللي دبر الغيث وأنشاه
يـــاونتي ونــة وحــيد جـــــلاوي
............................. اللي سبب دينه من أقرب دناياه
ولا خـــلافه من يــحل الدعــــاوي
........................... لا صار ربعه منه تبي المثــــاراة
عليك ياللي لك بقلــبي مكـــاوي
............................ ثلالث ردعات هوادي وعرقــــاه
عقبه فقـدت من المنام الحـــلاوي
............................. وحتى متاعي قامت الكبد تجفاه
يــالايمي ياعـــل مالك عــــراوي
............................ بلاه ما ولعــك بالحـــب حليــــاه
مـن لا يعرف الحب عنده دعــاوي
......................... يشره على راعي المحبه ويشناه
ويــقول هذا في ممـاشيه غاوي
......................... وحنا نـــدل الـــدرب والحــمد الله
يالله عسى مثله كثير الـــهزاوي
.......................... يبلوى ببلوى من لسانه تهــــزاه
حتى يــعرف إن المحبه بـــلاوي
....................... ويشوف مثل اللي من الحب شفناه
عساه يبلى في محبة حيـــاوي
...................... حب الهنوف اللي يحده على أقصاه
تفرى ضــيره فري دلو الرواوي
...................... إلا صفقها الجــال من حد ملقــــــاه
لا لجلجت له بالنظــير السهـاوي
.................... كلامها (لبيـــه) عن قـــولة هــــــاه
كلامها للـقلـــب مثل المــــداوي
................. اللي عــرف علــــة مريـــضه وداواه
يــارب إني بالتفاتك رجــــاوي
.................تلم شمــل الولــف من عقب فرقــــاه
لو تنفع الفزعات ولا النخـــاوي
.................. على المــحبة كان كل (ن) نخيـــناه
مير الرجاء والياس صار متساوي
..................... يــــاقلبي أصبر في تدابير الإلــه
لو مابقى في حالك إلا شـــلاوي
.................... مادبر الوالــي على العبد يرضــاه
ارجو ان تنال استحسان الجميع والمعذره عن كل نقص وتقصير...والسلام عليكــم ورحمـة الله وبركاتــة ،،