قصة وقصيدة ...يا ونتي ونت الجالي ... ألي جلا من بني عمه

[المنتقد]

بسم الله الرحمن الرحيم
السلام عليكم ورحمة الله وبركاته ,,
حياكم الله جميعاً اخوتى واخواتى ...سلمكم الله

اليوم يالربع عندنا لكم قصة وقصيدة البعض منا يعرفها والبعض الأخر يبينا نعلمه وش قصتها والبيت الى دائماً نردده والى يقول:-

يا ونتي ونت الجالي
..................... ألي جلا من بني عمه
من اول عندهم غالي
.......................واليوم مطلوبهم دمه

بعض المسولفين يقول ان القصة و القصيدة للشاعر [بديوي الوقداني] وبعضهم الله يسلمكم يقول انها للشاعر [فلاح القرقاح]ولحقيقة ان البيتين من قصيدة للشاعرة (منيرة الأكلبية) وهذه القصيدة لها قصة مثل ماذكرت الشاعرة منيرة.

تقول راعيةالقصيدة:-

إن اهلها كانوا نازلين في أسفل وادي بيشة قريب من "رنية سبيع"، وكان البدو في ذلك الوقت يتنقلون من مكان إلى آخر لطلب الرعي فإذا كان المكان المراد الإنتقال إليه بعيد فإنهم يأخذون الإبل ويتركون الغنم لأن الغنم ماتقدر أن تصل إلى المنزل الجديد في نفس الوقت، وكان في ذيك السنة أن شدو جماعتها بالإبل وتركوها مع الغنم هي ومن معها، وكان من عادة أهل البادية إذا كان بيبعد أحد منهم مدة من الزمن أنه يوصي من يعتنى أهله في غيابه.

ووصى أبو الشاعرة بمراعات عائلته إلى واحد من رجال قبيلته وعندما نزل على هذا الرجل كان عندهم رجل يضويهم بعد ما يظلم الليل ويرحل بعد صلاة الفجر، وجلس على هذه الحال مدة طويلة وكانت الشاعرة تلحظة أغلب الأحيان وكم تمنت لو أن تكون مكانه لإنه كان مرتفع ويكشف المنطقة كلها وماقدرة الطلوع على رأس هذا الجبل إلا بعد ماشد من القبيلة.

وعندما سألت شاعرتنا عن قصة هذا الرجل قالوا لها أن هذا الرجل (جالي) والجالي عند البادية هو الشخص الذي عليه (دم) وقصة هذا الشخص أنه قاتل إثنان من عيال عمومته وهم يدورونه للأخذ بثأرهم منه. وقد قالت هذه القصيدة :-

رقيت في مرقب(ن) عالي
........................وعديت في عالي القمة
لي مدة ظايق(ن) بالي
....................هموم(ن) على القلب ملتمة
والدمع من حاجر سالي
................... شــــــهرين والدمع ما ظمه
والنوم ما عاد يحلالي
....................كني قريص(ن) مشى سمه
أبكي على صاحب(ن) غالي
................. ما جاني أخـــبار من يــــــمه
أتلى العهد ذكر نزالي
....................متعــــــــدي وادي الرمـــه
ياطير خبره عن حالي
.........................معاك ياطير في الذمه
يا وا هني الذي سالي
......................ماهوب متقارب(ن) همه
يا ونتي ونت الجالي
........................إلي جلى من بني عمه
من أول(ن) عندهم غالي
..........................واليوم مطلوبهم دمه


ارجو ان تنال استحسانكم ورضاكم والمعذرة عن كل نقص وتقصير ...وسلامتكم ...والسلام عليكم ورحمة الله وبركاته ,,

[نسنوسه]

وعليكم السلام ورحمة الله وبركاته
موضوع مميز و رآئع كل الشكر لك على الإبداع في مواضيعك


آه يا ونتـي ونـة جديـد المكـاوي
000000موجسٍ من ضلوعه يوم كويه شكيّـه
ونة اللي طواه من العواكيس طـاوي
000000مع ردى الحال ما له بالقبايـل دنيّـه
المعافـا مريـحٍ والمولّـع شـقـاوي
0000000دايـمٍ عيـن طـراد المـودة شقيـه
من سبايب هنوفٍ غرتـن بالهقـاوي
00000وردّت قلبي المفجوع حـوض المنيـه
أشهد إنك عليّه مـن كبـار البـلاوي
000000قبل عرفك مريـحٍ فـي حيـاةٍ هنيـه
صرت لي سمّ ساعة يا عيوني النداوي
000000لفتني بالمهالك ما اكبره مـن خطيـه
يا بو خـدٍ يشـادي للهلال السمـاوي
00000أرحمن كان بك لي يالغضي مرحميـه
كل ناقض جديـلٍ يذبحـن الهـواوي
0000000علقت في معاليـق الحشـا مقلميـه
ودي إنك لحالي ياشقر الراس تـاوي
00000دامت النفس يا شمس المشاريق حيه

[المنتقد]

بسم الله الرحمن الرحيم
السلام عليكم ورحمة الله وبركاته ,,

حياك الله اختى الغالية نسنوسه ....سلمها الله

آه يا ونتـي ونـة جديـد المكـاوي
.....................موجسٍ من ضلوعه يوم كويه شكيّـه

بيت معبر وانتقاء رائع ..سرنى وشرفنى مرورك بارك الله فيك ....والسلام عليكم ورحمة الله وبركاته ,,