يوميات شيخ النظر

**شيخ النظر** · July 1st, 2009, 14:11

بسم الله الرحمن الرحيم

السلام عليكم ورحمة الله وبركاته،،،

قيلولة

الساعة : تك تك...

ابو نمر : مين؟؟؟

الساعة : تك تك...

ابو نمر : أقول مييييييييييييييين؟؟؟

الساعة : تك تك...

ابو نمر : أنطق طق الله وثرك...

الساعة : تك تك...

ابو نمر : والله أن قمت عليك ماهوب أحسن لك...

الساعة : تك تك...

ابو نمر : هيييييييييين ياحقير...

الساعة : تك تك...

تك تك...

ابو نمر : الله لايبارك فيك هذاني قمت أتوطا في بطنك....

الساعة : كوكوكوكو تدن تدن تدن...

المؤذن : الله وأكبر الله... حي على الصلااااة...

أم نمر : ياأبو نمرررررر الصلااااااة.. الصلاااااااااااة يالله ياأبو نمر يالله قم

صلللللللللللل...

ابو نمر : أهواهاه أعوذ بالله من الشيطان الرجيييييييم.. وين ملابسي

ياهيييييييييه...

أم نمر : شفها عند معلّقه على الدريشه...

ابو نمر : ماأشوف إلا الفوطة وشنطتك...

أم نمر : شفها تحتها...

ابو نمر : أيه والله هذا ثوبي يطل علي من تحت طيب تعالي أرفعي

أغراضك...

أم نمر : نزلها وخذ ثوبك ثم رجعهم ثانيه...

ابو نمر : لاحول ولاقوة إلا بالله وش ذا الحاااااااااااااال أفففففف...

أم نمر : وش تقوووووووووووووول...

ابو نمر : أقول أحط الفوطه أول وإلا الشنطة....

أم نمر : خلللللللللها أنا بأجي لها لاتقطع الشنطة علي تراك صاير طفس من

تاااااااالي...

ابو نمر : وانتي من أول...

أم نمر : أيش...!!!؟

ابو نمر : أقول وأنتي من أول أجوديه...

المؤذن : الله وأكبر الله وأكبر....

ابو نمر : يالله ياعياااااااااال الصلااااااااااااة....

نمر : ليه ماتدل المسجد؟؟؟؟

ابو نمر : يالله ياتعبااااااااان أنت وأيااااااااااااه...

نمر : طيب طيب هذانا طلعنا...

أبو جاسم : يباااااااااه تسابقني للمسجد...

ابو نمر : لاحول ولاقوة إلا بالله أقول بشويش لا ألومدك لين تقول

آميييييييين....

والسلام عليكم ورحمة الله وبركاته،،،

**شيخ النظر** · July 1st, 2009, 14:12

بسم الله الرحمن الرحيم

السلام عليكم ورحمة الله وبركاته،،،

عزوبي

يذوب السكر...

في فنجان قهوتي الصباحيه...

لكل شئ أتنكر...

إلا لملامح الملعقه على الصينيه...

نرجسيه...

من جماد يشوف نفسه...

أنانيه...

ساقي القهوه بلمسه...

في تراحيب فنجاني...

بخار...

ماأدري بخور...

الطعم بلساني...

حار...

لقمه من فطور...

اليوم...

يشبه الأمس...

وباكر محروم...

من ضجيج الهمس...

ودفتر ملاحظاتي...

أصبح من التشابه روتيني...

لمحه من حياتي...

أكتب الملل بيديني...

من قهوتي...

ذوبانها في الحليب...

يالهوتي...

الشعر بدى يشيب...

ولا ونيس ولاحبيب...

غير القلم...

اللي تعب يكتبني...

صفحه من ألم...

تمنع على أحد يقربني...

غير أبتسامه ساخره...

أرتسمت على شفاهي متفاخره...

كذا أحسن...

ويعجــــــــــــــبني...!!!

مرتاح...

كفايه مامضى...

الجراح...

مشاعر من الرضا...

مطلوب منى أنسى...

ولو ذكرني النسيان...

ماله فرصه يقسى...

لأني ودعت الأحزان...

ولاعاد لي مرسى...

غير أشرب هالفنجان...

قبل لايبرد...

في كل صباح...

أبرتاح...

وأثري لنفسي أسرد...

بسم الله...

رشفتين على الماشي...

ياالله ياالله...

توي مازلت على فراشي...

الساعة متأخره...

ومازال نقاشي...

مع نفسي...

معشش في راسي...

ماقدرت أوخره...

إلا لحظة إنتعاشي...

من أتحمم وألبس لباسي...

أحس الماء...

لجسدي في ضما...

من أجمع أنفاسي...

مستعجل أتسائل...

ياربيه وش أنا ناسي...!!؟؟؟

نظارتي شنطتي...

شماغي جزمتي...

ساعتي الرسائل...

مفاتيح سيارتي...

ياأحساسي...

أطالع في مرايتي...

أهاااااااه!؟ بسمتي...

ياقلبي القاسي...

مخلي في عيني دمعتي...

من البارح...

من ألتفت على مخدتي...

ولالقيت مفارح...

تنسيني دنيتي...

هذي غرفتي...

تحمل ملامح...

غربتي...

في وحدتي...

الساعه سبعه...

وسبعه...

وأبو طبيع...

مايخلي طبعه...

كل يوم تأخير...

وذاك المدير...

يجامل بس ربعه...

يعني وش بيصير...!؟

بيقص راسي...؟؟؟

كلها في الأخير...

إنذار رياسي...

ماعلي من أحد...

ولايهمني أبد...

أصلآ أنا مليت...

بالحالي في هالبيت...

من مات أبوي وأمي...

ماأحد في الدنيا يمي...

وكلما تقهويت...

على نفسي جنيت...

بعد ما أسمي...

أكتشف أني ماكليت...

ومرتب كل أوقاتي...

على لخبطة حياتي...

ياوالله الحظ التعيس...!

ليه مسكرين الباب...؟

واحد يناديني ياأبو الشباب...

وش عندك اليوم الخميس...

هاهاي...

ضحكه على شفاي...

ياكبرها بلواي...

هذا حالي بلا ونيس...

خذا عقلي شقاي...

خلاص ياعناي...

بأبدل القهوه بشاي...

يمكن تتغير نفسيتي...

وأحس برضاي...

من تتبدل شهيتي...

طيب في هالصبحيه...

وين.. وين بأروح...

الشبكه العنكبوتيه...

ولا موقع مهم مفتوح...

يادردشه يامنتديات...

يرن جوالي رنه...

أيوه ذي حركات البنيات...

ألوه صديق.. كنه...

نعم وش تبي...

هزا راج كومار تلفون...

أصبعي على شنبي...

لا هذا صاحي بالخطا مجنون...

سكر الخط...

وطاحت يدي على الريموت...

قناة الشط...

والأحجار على وشك تموت...

لاحول من ذا الحال...

أخذت الجوال...

بأدق على البقاله...

ردت علي شغاله...

قلت لها مين أنتي...؟

قالت أش دخلك أنتي...

قلت لها ماكنتي...

شغالة خالتي ونتي...

قالت لا لا غلطانه...

وسكرت السماعه بضيق...

أعدت الرقم لعانه...

ورد علي صديق...

قال بقاله مين...؟

قلت ياللعين...

قالبها كرخانه...

قال أيش يبغى...

قلت أبي باتري...

قال دين مايبغى...

الهندي كسّر خاطري...

شويا يجي دباب...

إنتزار إنتا في الباب...

قلت سجلها على الحساب...

صك الخط بوجهي...

باقي على الراتب أسبوع...

ماأحد مقدر وضعي...

عادي لوأموت بالجوع...

شفتي ياغرفتي...

البيت فاضي علي...

حتى لهفتي...

ماتعني لأحد شئ...

طيب وش أسوي في قيودي...

هذي طبيعة المجتمع السعودي...

كل شئ حرام...

والباقي ضمن الممنوع...

ليت الدعوه الإسلام...

إلا عادت وتقاليد تلوع...

ياهالموضوع...

وش كثر عليك شايل...

على العزوبية مرفوع...

جيت أنتحر...

وقالوا عوايل...

والردود صمت يروع...

والسلام عليكم ورحمة الله وبركاته،،،

**شيخ النظر** · July 1st, 2009, 14:13

بسم الله الرحمن الرحيم

السلام عليكم ورحمة الله وبركاته،،،

ملابس

أبي ثوب...

ماله جيوب...

وأبي شماغ...

تريح الدماغ...

وأبي عقال...

لو أنطقيت به أتوب...

وأبي نعال...

ماتمشيني دروب...

العيوب...

صديق...

أنت مخ مافيه...

حرام عليك ليه؟؟؟؟

هزا ملابس مال بلد...

وايه يعني....

على كيفك بتلبسني...

إزا أنت يبغا إهترام....

البدله عليك تمام...

هزا ثوب...

حقي طرار...

ثلاثة إزرار...

ونفر كلوه عيوب...

زيادة دين...

أقساط وفواتير...

سعودي مسكين...

كيف طريقة تحرير...

آه يالتسلب...

الشرهه مو عليك...

الشرهه على الوزير...

اللي في هالديرة مخليك...

تحلب حلب...

ولو تشرب البحر مايزيك...

والسلام عليكم ورحمة الله وبركاته،،،

**شيخ النظر** · July 1st, 2009, 14:14

بسم الله الرحمن الرحيم

السلام عليكم ورحمة الله وبركاته،،،

ريال

يمه يمه...

أبي رياااال...

يالله عطيني رياااال...

أبشتري حاجه مهمه...

أبشتري نعال...

عشان أجي لك...

تقطعت كنادري...

من المشي لك...

ناظري ناظري...

صرت حافي...

والدرب يمك أشواك...

تقول ياكافي...

من حبيتك عرفوا غلاك...

ماكنك أمي لحالي...

صرتي أمهم...

كل أبوهم...

وهم مايسوون نعالي...

الله يهمهم...

قطعوهم...

والحين أبي ريال...

مانيب شاري حلاوه...

لاتخافين صرت رجال...

ماعاد فيني شقاوه...

بس أني أدور عنك...

ولاودي أركب في سياره...

أخاف يسرقني منك...

مثل عيال الحاره...

تعطيني...

وإلا أروح أشتغل...

لاتخوفيني...

أنا صرت بطل...

شوفي عضلاتي...

أقوى من عضلات باباي...

من صرتي حياتي...

القوه صارت في خطاي...

بأمشي لك حافي...

عادي تتقطع رجليني...

كله واحد لاتخافي...

بأمشي لك على يديني...

هماك تبيني...

طيب عطيني...

أشتري وقا لأطرافي...

والسلام عليكم ورحمة الله وبركاته،،،

**شيخ النظر** · July 1st, 2009, 14:16

بسم الله الرحمن الرحيم

السلام عليكم ورحمة الله وبركاته،،،

عزّة

اللهم أني حسن الضن بك فاأرزقني حسن ضن عبادك بي واستغفر الله رب العالمين

من خلقني الله...

كنت من حلال أرضع...

ولما حبيت...

على أربع...

بعدها مشيت...

من طقت لي أمي أصبع...

وقالت...

ياعبدالله...

لغير الله...

لاتخضع...

ومن يومها...

وأنا هامتي فوق...

مثل النخله في كمومها...

تطرح من التمر عذوق...

ويالولا الصلاة...

ماحنيت قامتي...

راحة وأنات...

من تسجد هامتي...

للواحد الأحد...

الفرد الصمد...

اللي رفع قامتي...

ورفعني عن كثر المهاترات...

وعلى كذا الإستمرار...

راسي في السماء...

ومالي أنكسار...

إلا على صفحة الماء...

حر من أمّة أحرار...

على سيرة المختار...

روحي فوق تسما...

والسلام عليكم ورحمة الله وبركاته،،،

**شيخ النظر** · July 1st, 2009, 14:17

بسم الله الرحمن الرحيم

السلام عليكم ورحمة الله وبركاته،،،

الجوازات

بعد محاولات من اخوي صاحب مصنع الحلويات وقبل أربع سنوات

أستخرجت فيزة سائق مصري واستقدم عليها محاسب...

وبعد أشهر من وصوله للمملكة هرب دون ان يشعرني أخي!!!؟؟؟

وبالسؤال عنه قالوا أنه هرب!!!؟؟؟

ومباشرة دقيت على أبو عبدالعزيز في الوافدين فقال تعال نسوي عليه بلاغ

هروووووب وبسرعة رحت ومليت الأوراق وقالوا لي هذي الورقه تحمييييك

بعد الله...

واليوم دقيت على ابو عبدالعزيز ولقافة قلت له شيك على أسمي فيه علي

عماااال فقلما شيك قال فيه خادمة سيلانية وسواااق مصري!!!؟؟؟

قلت الشغالة مسفرها وعنندي وثيقة الخروج النهائي والسواق مبلغ عليه

هروب وموقع ورقة عدم رجعة في بلاغي قال الشغالة من سافرت عن طريق

المطار ماسووا إسقاط لها من أسمك فتعال نسوي لك بلاغ هروب ثم نسقطها

من اسمك والسائق مسوى له كف هروب من مدينة نجرااااااان اللي والله

ماعمري طبيتها بس غالية عليّ هالديرة بأهلها...

قال أجل مطلوب تقدم شكوى لأن المصري سوا خروج وعودة من جدة وهو

في مصر الآن...

سبحان الله هل الجوازات غير مربوطه ببعضها بحاسب واحد ولماذا هذا

التسيب في كف البحث دون إشعار الكفيل ومن وراء ذلك؟؟؟

أرحمونا من الفساد الإداري ياإدارة الجوازات فحتى عندما قلت للموظف هذا

إهمال قال وش اسوي لك ياحليلة رجل أمن ولايدري وش يسوي لي الله

يذكرك بالخير ياأسعد عبدالكريم من كنت مدير الجوازات كان الضابط قبل

الفرد يضرب للنظام الف حساب لكن يالله مصيرها تروق وتحلاااااااااا....

والسلام عليكم ورحمة الله وبركاته،،،

**شيخ النظر** · July 1st, 2009, 14:19

بسم الله الرحمن الرحيم

السلام عليكم ورحمة الله وبركاته،،،

تصريف الأزمات

براشيم تحت الكي بورد ملزقها عشان من تشوف نفسها هالمرأة ليني ماأقعد

بها وأدبر عمري عشان ماأعتمد إلا على نفسي وبس...

الرز...

غمطة بيدي الثنتين وأكبها على البصل والطماط ونص دجاجة مع ملح وفلفل

وبهارات حسب ذوقي ثم أجيب الزرادية وأربط القدر المكسور حق الضغط

لين يصفر ثم علي بالعافية...

ملاحظة لاتنسى تحط مويييييييية....

يوووووه ليش ماكتبت الموية فوق الحين يبي لي أفك القدر ثانية...

ملاحظة آخرى :

لاتنسى تحط فنجال زيت لحمس البصل...

توي أكتبها إلا وهذي شطبة عليها لأن الزيت يجيب الكليسترول...

الشاهي خصوصاً بعد الكبسة مهظم تكفا ياأبو نمر أضبطه...

ابريق لتفويح الموية

ابريق اخر صغينون لتلقيمة الشاي

وعدد أربع اصابع شاهي من السحّارة

الطريقه:

املأ ابريق الموية بالموية

وضعه على النار حتى يفور (ويصير الغطا يصفق لي شاطر ياأبو نمر)

فإذا فار الموية أصبر شوي

أحط فنجال ونص من السكر في البريق الصغينون ثم اكب عليه الموية الحار

ولين قام يبقبق أكب علية الشاهي وأنتبه لاتكبه على القز ثم تمسحه...

الفطور

الفطور صامولية ماهوب صومالية تشقها من الخط اللي تمشي عليه بالسكين

ثم تسوي تقشير للعجينة وتروح للمستودع وتطلع جبنه وتحطها في بطن

الصامولية وتسمي وتأكل ,انتبه تحط مربى من زين ضروسك هالمكسرة...

والعشا...

قوطي تونه مع شوي بصل وطماط وفاصوليا وتخلطهم على نار هادية (نفسي

اعرف كيف نار وهادية؟؟؟) ثم تفتح درج الزاوية وتأخذ بادية شوربة وتنسب

(تحطه في صحن) فيها ثم تروح للفليزر وتحمي الخبز في الميكرويف دقيقة

ونص وأنتبه تنسى وتحطه زي ذيك المرة ساعة ونص...

ملاحظة مهمة ترى الشخاخيط (الكباريت) مخلّصة والمسدس يكهرب

وخربان والغاز إذا ما خلص تراه بيخلص عقب ماأنسرقت دبات الغاز يوم

رحنا للشرقية ذيك المرة...

المواعين تغسل بفيري لأنه يخلي النظافة ثووووووووم وثوووووم

وثووووووووووم...

وغلا مر على أبو ريالين وأشتر مواعين بلاستيك يمكن تكون تعبان من

الطبخ ولا لك خلق تغسل (هذي اكيييييييييد).....

والسلام عليكم ورحمة الله وبركاته،،،

**شيخ النظر** · July 1st, 2009, 14:21

بسم الله الرحمن الرحيم

السلام عليكم ورحمة الله وبركاته،،،

ماينفع لها إلا النساء

عودي لزوجك اللي بدى يتمرد عقب ماطاح في هاليوميات اللي علمته كيف

يتصرف بدونك فلاتخلينه سيده قيده وأحتويه بحبك....

أطفئي الأضواء واستقبليه بشمعه في يدك الحنونه...

وزعي في بيتك الشموع الحمراء والصفراء واللي موجودة عند أبو ريال

ونص وربع وهلله أهم شئ شمووووووووع...

عشية عشاء رومانسي على ضوء شمعة وأطفئي المكيف واجعليه يلجأ

إلى دفء أحضانك...

أطفئي التلفزيون ولاتدعيه يتعذر بالأخبار ولاتتيحي وعشان مايغبنك

بمقارنتك بهيفا ونانسي...

استغني عن الميكرويف لتحمينه من روائح الطبخ وأرحميه من ضجيج

الغسالة الكهربائية (أحنا معك أنه مايستاهل)...

عوديه على المشي معك يداً بيد في ردهات (شئئئئئئئ ردهات ماهوب

مشيتكم) المنزل وسط الظلام الدامس...

لاتدعي ماهو كهربائي يدخل في حياتكم كي توفري عليه تسديد الفواتير

كي يستشعر مدى حبك في حرصك...

مع تحيات

الشركة السعودية للكهرباء

أمتحنتونا بشكاويكم ليه يطفى الكهرب ياخييييييييييي أقتصدوا في أستهلك

الكهرب بيت مافيه إلا بزرين وتجي فاتورته ألف بلا والله من تشغيلكم

هالأجهزة أربع وعشرين ساعة....

والسلام عليكم ورحمة الله وبركاته،،،

**شيخ النظر** · July 1st, 2009, 14:22

بسم الله الرحمن الرحيم

السلام عليكم ورحمة الله وبركاته،،،

دار أيتام

من الأهل...!؟

من الناس...!؟

ووين الوطن...!؟

لاتخطى الجهل...

حدود المكان والزمن...

في مجتمعي...

عايش يتيم وحيد...

لأنك ياحبي البعيد...

ماأنتي معي...

تفشل المساعي...

وكل شئ...

ينتهي...

ويصبح ماله داعي...

وأنا في مشاعري ألتهي...

ولايبقى بي واعي...

غير أصباعي...

من يشذ عن الأنظار...

يدق عشرة أزرار...

عله يمكنك سماعي...

ولاأسمع...

غير سبع رنات...

وعين تدمع...

فاقد سمعي الحياة...

لايوجد رد...

وأنهد...

قدام مرايتي...

من ضعت أنا ولقيتك...

مع اليتم حكايتي...

أبتدت لحظة حبيتك...

فقدتك...

من أول ماضميتك...

وتيتمتك...

من قفيت عن بيتك...

كان...

الزمان...

في بعدك ألف عام...

والدنيا...

دار أيتام...

وأنا يتيمك يالحنان...

والسلام عليكم ورحمة الله وبركاته،،،

**شيخ النظر** · July 1st, 2009, 14:25

بسم الله الرحمن الرحيم

السلام عليكم ورحمة الله وبركاته،،،

مشهد من مجتمعي

نفله

مراهقة نفسها في طرف خشمها ومغروره لاقصى حد وفي نفس الوقت (قلبها طيب) ورومانسيه لدرجة الجنوون

(يقولون) وأسمها الحركي (ساندرا)...

بتلا

حساسه وانانيه كل شي تحبة لنفسها تحب تكوون البارزه بالشله تشبه نفله بالرومانسيه البنت هذي يتيمه الاب

عمشا طيبه حيل وخياليه بشكل مجنوون تتاثر بالافلام الرومانسيه وتعيش قصتها بس عيبها السر مايجلس ببطنها

ابد أسمها الحركي (لاكي قيرل)...

سجوى

الاخصائيه الاجتماعيه للشله اي وحده عندها مشكله تلجا لها وتساعدها هالبنت اللي في قلبها على لسانها بس اذا

شالت على احد شالت (حقدت) مافيه امل ابد ترجع لها مثل اول...

رمثا

هذي اخت نفله قلبها طيب مرررره وحساسه وماتحب اي وحده من الشله تزعل من الثانيه وهي اعقل بنت بالشله

ولاتهمها التليفونات ولا الشباب دايم تنصح البنات بس ماهن حولها ابد فقالت لنفسها (اجاريهن عشان اعرف كل

شي عنهن والا يسون هالامور من وراي دايم مستمعه للبنات اذا كلمن) أسمها الحركي (بيبي فيس)...

هالبنات صديقات وقريبات لبعض حالتهن الماديه متوسطه ولا فيه وحده منهن سافرت للخارج وهالبنات مايلبسن

عباية كتف ابد بديرتهن الا اذا طلعن برا مثلآ اذا راحن للرياض او الخبر أو جدة (عشان يندمجون وسط

الناس)...

نفله : بنات ليش الله ماخلانا نعيش بالرياض عشان نكحل عيوننا بالطخمان ماهو في هالديره اللي عايشين فيها

مافيه واحدن اطخم كلهم شيف وقرود الله يلوع كبودهم لا وطايحين بهالكوبرا تقول ستارة وراه نقصهم ماساكات

وحبل وتغدي وجيهم درايش...

البنات:ههههههههههههههههههههه احسن يانفله ربي راحمنا والا كان علووووم...

نفله : اقول بنات وش رايكن ننحاش لنا ساعه دام ماحد حولنا ونرجع نروح نتمشى في السووووق اليتيم...

البنات : والله ماهيب شينه نفداك...

نفله : طيب تجهزن وباأزهم على الماخوذ السواق جعله العمى كانه ناشب ولايبي يطس لديرته عشان نغيره...

رمثا : انتن يالعفنات لاحد يتبرج ويكحل عينه ترى امهات عوينه قدامكن (معنى هالجمله يعني الرادارات نسوان

الجماعه قدامنا بالسوووق)...

نفله وبتلا : كأنهن ماسمعن شي يلبسن البراقع اللي تطلع نص الخدود ويكحلن عيونهن أما عمشا ماهمها الا

الجزمه وش هي اللي تلبسها اهم شي مريحه هالبنت عليها مشيه كانها مشيت واحد يمغصه بطنه...

سجوى : تتاثر من كلام رمثا ولاتحب تتبرج زي البنات الباقيات نص عاقله يعني طلعن البنات وركبن مع

السووواق ولما وصلن السوووق ماشافن الا أطيخمين (شابين وسيمين) واحد صاحب محل كان مغرور وشايف

نفسة وجالس يدخن برا المحل هالولد (معروف عند البنات لانه اطخم وصاحب محل بس ماكان يتنزل ولا لوحده)

الاطخم الثاني كان من اللي يتمشوون بسيارتهم...

البنات هذولي مايحبن يعرفن اي واحد من ديرتهن يخافن يعرفهن ويفضحهن اكثر ماكانوا يكلموون هالبنات شباب

الرياض...

نفله : بنات اقول ماودكن نرجع مابه احد يفتح النفس على هاليوووم...

بتلا : نفله مابه جديد الشكوى لله من زمان عيني ماشافت اطخم عمشا حاطه يدها فوق البرقع (هالحركه مشهوره

عند الللي يلبسن براقع) ولسان حالها الموافقه على كلام نفله...

رمثا : اقول تغطن انت يالهنوف ونفله جا الرادرات (مجموعه من النسوان السمينات لابسات براقع ويأكلون لبان

فك الوحده كنه ردوف حصان في سباق...

مر هالرادار قدام نفله ولاتغطت وكانت عيوون نفله معروفه بالديررره لان عيونها مميزه...

نفله : تقول بخاطرها لما مرن على هالمجموعه خييييير وش تبن والله من الحش اذا رجعن شفنا نفله ومتبرجه

يالله ياربي تفرجلي من هالديره ومن هالرادارات...

بتلا : نفله شفتيهن يوم مرن وش قالن؟؟؟

نفله : متنرفزه عشانها ماشافت اطخم ملى عينها وش قالن بنات التسلب!!؟

بتلا : حرام وش دخل ابوووهن لاحووول خلاص ماراح اقولتس...

نفله : معصبه وحاجبها طالع نصه من تحت البراقع بتقولين والا صكيت هالشنطه فوق راستس...

بتلا : ميته ضحك ياحبيلتس اذا عصبتي قالن يوم مرن علينا ((اعوذ بالله وش هالتبرج

كانهن رايحات لعرس))

نفله : ههههههههه والله من الغيره عشان عيوننا احلى من عيونهن ياكرهيلي اللي تسوي مثاليه وهي من تحت

لتحت...

رمثا : اقول االله يلعن اللي يروح معكن مره ثانيه فضحتونا قدام الناس ذلحين تلاقن هالنسوان من معارفنا

وبيفضحونا بكره والسبب تبرجكن...

نفله : والله من التخلف هذا عشانا حاطين كحل بس اجل لو كاشفات ولابسات عباية كتف كان وش يسووون؟؟؟

بتلا : هههههههههههه كان والله تشوفين علومنا عند اخبار سيع عن عن...

عمشا : أقول لايكثر بس كلمن السواااق خلونا نعود...

نفله : تلتفت للاطخم صاحب المحل بنات هذا من زينه ذلحين عشان البنات يموتن عليه لا ومغتر بعد...

رمثا : نفله اقول لايكثر بس والله انه ماهوب شين يازقينه يجعلني فداه...

سجوى : صادقه نفله مايعجبني حتى انا هو وأيا وجهه كنه مقفا بزر..

عمشا : اقول ياسجوى وش رايك تسكتين ابرك لك من سمع كلامك قال هذا وش قايل خويها ماخلا ولابقا بالله

عليك سجوى من جدك عاجبك خويك هالبطه وعععععع يلوع تسبدي اذا مشي كنه يطعس...

سجوى : اقول تكفين ياللي خويك يشبه فزاااااع امانه بأسألك عمشا من متى ماتروش خوويك هو وريحة الفقس

اللي تفوح منه..!؟

بتلا ونفله ورمثا : فاطسات ضحك...

عمشا :عادي عاجبني اهم شي انه بدوي من ثوبي موووو زي بعض الناس...

سجوى : عصبت عمشا احترمي نفسك قبل لايجيك حكي غير هذا...

رمثا : بس انطمن عشان تماسيح مايسون ماطي رجولكن بتتخانقن اجل لو تعرسن وش بتسووون كل وحده

بتجلس تحارب الثانيه عشان رجال...!؟

رمثا : تكلم السواق انت وينك يالزفت ماقلت لك أحترنا...!؟

السواق : قريب مدام...

رمثا : مدام بعينك كم مره اقولك قول دوا غسيل (مزمزيل) لاتقول مدام لأني مابعد اعرست الله يمرضك...

السواق : اكبر ملكع لانه عايش معهم اكثر مما عاش مع اهله (خلاص مافيه قرقر واجد انا قريب خفسة دقيقزه

إنتزار شويا ماداااااااديزل)

يوصل السواق ويركبن البنات بالسياره ولما وصلن للبيت حبن يخفن اثاري الجريمه نفله وبتلا

وعمشا غسلن عيونهن من الكحل...

دق جوال سجوى : المتصل كان عزيزة على قلبي (عزيّز البوي فريند بتاعها)...

سجوى : بتغنج هالوووووووووووه...

عزيّز : هلا بقلبوو وينك شغلتيني عليتس!!؟

سجوى : مع البنات انا قايلتلك ومستاذنه منك ياعمري أني بأروح اشتري لي ملابس داخلية...

عزيّز : على الأقل رسالة يارووووووحي تطمني ان ماأحد عاكسك بالسووووق...

نفله : كانت قريبه عند سجوى وتسمع هرجها وتقول بنفسها (هذي من جدها تحكي تستاذن منه اذا طلعت يخسي

اي رجال استاذن منه عشان اطلع ياحرام مصدقه انه يحبها مالت بس على المخفات اللي زيها والله لو أنه

رجلها...

عمشا : هالبنت خويها معطيها اشكل دايم هي اللي تكلمه وهوماينزل نفسه ويحاكيها...

بتلا : تركب شريحتها الثانيه وتشوووف من الخرفان اللي اتصلوا بها (خدمة مقرود قصدي موجود)...!؟

رمثا : تراقب الوضع من بعيد وتدعي لللبنات بالهدايه...

نفله : تشوف جوالها الثاني من كلمها هيثم او سعد اوعزيز او....................الخ...

بتلا : نفله تعالي ابيتس بسرعه...

نفله : هاه وش تبين روعتيني...!؟

بتلا : امس مابقي رقم مميز ماتصلت عليه وشبكت مع اثنين منهم وطلبت يرسلولي صورهم وسائط...

نفله : امااااااااانه هاه يابتلا وبيرسلونها ذلحينه...!؟

بتلا : ايه ولا فيه واحدمنهم مغرور وشايف نفسه ويقو ل ابيتس تذكرين الله اذا شفتي صورتي شكله يخققققق...

نفله : بالله ومن يطلع هذا طال عمره لايكوووون توم كروز على غفله تشوفينه شيييييييفه ذلحينة وقولي ماقالت

نفله اي واحد شين تلقينه يمدح نفسه بس الزين دايم واثق من نفسه مايمدح عمره ابد...

بتلا : وش ورانا خلينا نشووف بس اذا طلع شين سحبت عليه زيه زي غيره الصااااااااااااااااااااااااااااااااااااااااعقه

جا ت الصوره وطلع عبد وكلنا عبيد لله أسويد كله خنفرة...

نفله : فاطسه ضحك...

بتلا : استحاله يطلع هو يمكن يبي يختبرني يمكن مرسل صورة عبده بيشوف أنا راعية مظاهر وإلا...

نفله : وعيونها تدمع من الضحك اقول بتلا والله انه مو شين لايق عليتس توأم روووووووووووحتس...

بتلا : تطالع نفله بحقد تشب لالعن ابو ابليستس يالحقيييييييييييييرة...

نفله: غارقه بالضحك بتلا خلاص باقطع علاقتي فيتس اخاف يجيتس زار وينتقل فيني عاد وين بألقى سامري فيه

وهي تنفجر بالضحححححححك....

بتلا : جمبها غضارة موية تكبه على نفله...

وفي نفس الوقت يرن جوال بتلا وكان المتصل العبد يبي يشوف راي بتلا فيه..!؟

بتلا : تسفه الاتصال وتقول لنفله وش اسوي؟؟؟

نفله : عطيني جوالتس اذا ماخليته يتوب عن المغازل مااكوون نفله راحت نفله ترسله رساله (شوووف يالخال

مره ثانيه لاتتصل بعماتك دور لك وحده زيك يالله يابابا امسح الرقم ولااشوفك تتصل...

الخال المسيكين ماعاد رسل رساله ولادق تفشل...

عمشا : من بعيد تعابير وجهها معصبه (ماهي غريبه دايم هالطعس يعكر مزاجها)...

سجوى : غارقه بالحب تحاكي حبيب القلب...

باب الغرفه يطقه أحد ولايدرن منهو والبنات تلعثمن اللي قفلت واللي خشت جوالها الثاني فتحت

نفله الباب كانت امها (اقول بنات عندي لكم علم لو اقوله لكن ماراح تمسن ابد

ام رمثا ونفله : قلبها طيب مره وكانت مرحه وتشك بالبنات ودايم تنصحهن بس باسلو ب حلوو مثل يابنات ترى

شباب هاليوم نصابين ويفضحوون انتبهن لانفسكن تراكن بنات قبايل وحمايل (بنات قبايل هالكلمه كانت تمقتها

نفله لان عادات وتقاليد بعض البدو تعقد الواحد)...

انا عارفه ان بعضكم بيضحك بيقول معقوله فيه بنات كذا ماكان الخبر طلعه لاوربا وإلا طلعه للبنان كان طلعه

للرياض وآآآآآآآآآآآآآآآآآآآآآآآآآآآآآآآآآه يالرياض وهالبنات يحبن الرياض لان السبب واضح...

نفله : نقزت فووق بتلا وهي تزغرد لولللللللللليش يعني اخيرآ بنشوف طخمان...

ام رمثا : وجعن يوجعتس وش هالحكي ماتستحين يالفاجرة...

نفله : تستميل امها يمّه لاتلوميني من زمان عيني ماشافت مزيوون غير اخواني...

البنات بصوت واحد : وععععععععععععع من زين اخوانتس...

البنات راحن لبيوتهن كل وحده تجهز للرياض...

نفله : تجهز البرقع والكعب اللي ماتستغني عنه لانه اقصر وحده بالشله على ان طولها 169سم لأن الباقيات

البنات فيهن شفاح طووول...

بتلا : تجهز العبايه المخصره لان جسمها فاتن مرررررررررررررره وتحب الإستعراض...

عمشا : تجهز صندل مريح لها عشان تتوازا المشية...

البنات استعدن للرحله اللي بتستمر اسبوووع ماكان بيطلع معهن الا ام رمثا ولا راح يطلع معهن الا بودي جارد

واحد اللي هو اخو نفله كان عمره 9 سنوات واحلى مافيه انه مايطلع للاسواق مع البنات بس شغل له البلاي

ستيشن وأنسه....

ويوم وصلن للرياض رفعت نفله : برقعها يالبيه ياهوا الريااااااااااااااض غير شكل (كان وقت شتا وغيم)

بتلا : تقلد نفله ايه والله...

البنات توهن واصلات الظهر مامداهن حتى يتنفسن الا أستأذن والده رمثا...

نفله : يمه انا والبنات نستأذن منتس بنتغدا ونجيب لتس غدا وبنجي من المطعم العايلي القريب...

ام نفله : طيب لاتتاخرن ينزلن البنات وكان الجو موطبيعي غيووووووووووم ومطر خفيف...

رمثا : قلبها يرقع لانها البنت الوحيده الخوافه بالشله ياويل قلبي هذولي وش بيمسكهن ذلحين بالرياض...

نفله : ذلحين مو فشله نوقف تاكسي كنا قرويات لو انا جايبين سواقنا كان ابرك لنا...

رمثا : لاإن شاء الله عشان ننفضح صدق عاد شباب الرياض مهبل كان بيجووون تاريخ سيرتنا

من لوحة سيارتنا لاوالله اشوى انه ماجا...

نفله : رمثا ذلحين انتي اللي متى متعقده وانا اختس عيشي حياتس قبل تعرسين وتسجنين...

يدخلون مجمع المطاعم والشباب يلتمون عليهم كأنهم ذبان على وصخخخخ...

وتبدى قلة الحياء من سحب عباة ومن تريقه لين جا جمس الهيئة ويضف لك الشباب ويتصل على أبو رمثاااا...

مقطع من منولوج مسرحيه عن الفتاة العربية

اليوم الوضع تغير

والخيانة صارت تكبر

أسمع البنية تتأثر

تقول هيثم الغالي

حياتي شاغل بالي

بس وليد ونيس

أكلمه كل خميس

وهاني بعد حالي

ولايهون بدر وأنيس

كل شئ إلاسعد الخسيس

بخيل ماينفع بشئ

لاشحن لاهدية لاعشا

بس أني أحبه شوي

لأن كلامه يرجف بالحشا

ياقلبي سعيد وسعود

وحمد ذاك المقرود

عليه واحد يابنات

ياويلي ينسي الحياة

وإلا طلال المميز

رقمه وسيارته ولبسه

أحسن من التاجر عزيز

أغثاني يحب نفسه

أفداهم كلهم

ليتني في واحد أضمهم

وتقول الرجال

البنيات خبال

دلال من تهوجس

وإبتهال مومس

وأحنا وين والمحبه

خليك ياولييد خطير

تأكل فطير وتطير

اللي تعرفك..؟

تعرف غيرك

واللي تطول معك

تراها بالمشاكل تثيرك

تحاول بالزواج تقنعك

وباكر تخونك في سريرك

بس يكفي يالعشق

قلبي من هالحكي بيحترق

معقوله هذا الكلام

مابقى في الدنيا إحترام؟

أستقعد ومسك يدي

قال على الإستغراب يمدي!

ياشيخ الغريب هالأيام

أن الرجال يزنون

والنساء من أصولهم يتجردون

قلت بالله وشلون

قال لي أسمع

وعيونه هم تدمع

تتزوج الوحدة واحد

واللي مر عليهم واجد

ملكعين ويستغبون على بعض

وتبداء المشاكل والتباعد

عقول أفكارها مرض

كل واحد على حياته معترض

فلسفة علاقات الفشل

مافيها أي نوع من الخجل

دراما مع تراجيديا هزليه

طلاق المخزي من المخزيه

عجيبه غريبه هالمسرحيه

من المسرحيه مشهد سريع

كيف الشرف يضيع

ضمير الحاجة

أنشط من رغبة الإلحاح

وقلب الدجاجة

مايقويه كثر الصياح

ياسلطان العقل

أستعبد مفرط الحرية

أذبح الجهل

في قوة ضعف الشخصية

العمر صفحة من بياض

لوسود الكحل أعراض

ماتنفع الأمراض

قلب أنصدم في نفسه

قبول أو أعتراض

على أيش وإلا إيش متأسفه

موتي يامسكينة متكسفه

بساعة فرح

باقي العمر حزينة

مو أي شئ أنجرح

تقدرين تخيطينة وتغشينة

أسود القاع

سواده سواد

مايفيد الترقاع

في ثوب الحداد

كان في يديك وتضيعينة

بعدين تردين تدورينة؟

مسكينة يابنية مسكينة

لذة الحرام حلوة

والحموضة تكشفها البلوة

ياعساك على القوة

حب صداقة أخوة

ألعبي على كيفك

أنتي تهوين اللعب

مايذبحك إلا سيفك

بعد القهر التعب

أي دمعة في عينك

مثل شمعة في دينك

تحرقك وحدك

وإذا أنا قصدك

أنا وكل الناس ضدك

مير الله يعينك

ياخاينة نفسك

المغيب

شكلة مريب

ماغاب إلا بشمسك

والليل ماهده الحيل

وبكى ويل وويل

إلا من تحت ضرسك

هذا خبزك يالرفلا

وماأحد بخبزك أولا

كلية أدري أنه عجينة

تدرين؟ ليه تخبزينة؟

خالي ذبح عمي

وأبوي طلق أمي

وأنا فقيرة ومحتاجة

لي سنين أعاني همي

خذ مني أي حاجة

بس لاتفضح دمي

أبي أعيش مستورة

كل الناس تسميني مغرورة

وأنت حبيبي ماتخوني

والناس متي يهموني؟

ومرة الأيام والأيام

رسالة وصورة ولقا

ولأن الحرام حرام

بعد الزنا شقا

أنتي خنتي ربك

كيف أحد يحبك

ياغبا قلبك..

شفتي سوات اللي تحبينة

إذا هتك عرضك بتكرهينة

وإلاتمادي دوم تخلينة

مسكينة بالحيل يالردية

قصه عجيبه بطوله غبية

بالإشتراك مع كل النرجسيه

هذا يالعشق حالك وحالي

تساوت ثقالها أول وتالي

الشهوة عشقت الشيطانيه

والحب أصبح هتك العذرية

عجيبه غريبه هالمسرحيه

ماذكرته هنا ليس تعميماً على بناتنا وليس المقصود به الإساءة لمجتمعي أنما توعية للجميع وهو ينطبق على

بنات المدن المسافرات في هذا الصيف خارجياً او داخلياً فأتقوا الله في أولادكم...

والسلام عليكم ورحمة الله وبركاته،،،