يوميات شيخ النظر

**شيخ النظر** · June 24th, 2009, 00:06

بسم الله الرحمن الرحيم

السلام عليكم ورحمة الله وبركاته،،،

اللهم لاحسد

قال لي عندما كنت طالب في أحدى الدول ونحن مجتمعين في إحد المقاهي

حوالي 15 شخص من الجاليه العربيه أنت ياشيخ اللي راح تحاسب قلت

ليه مخلفك وناسيك قال ياخي أنت سعودي وأرضكم تسبح على بترول قال

واحد من الأخوه هذي دعوة سيدنا إبراهيم عليه السلام ليهم رد عليه

بغضب وعفويه قال أنا متأكد سيدنا إبراهيم عليه السلام لما كان يدعي كان

مدي ظهره لأفريقيا...

واليوم رحت أبشتري من أحدى البقالات إلا خبر في الجريده مكتوب تم

إكتشاف ذهب في أحدى الأماكن وغاز خام طبيعي في مكان آخر إلا وأبن

أحد الجاليات العربيه يقول((( ليه ياربي هما ناقصين)))...

والسلام عليكم ورحمة الله وبركاته،،،

**شيخ النظر** · June 24th, 2009, 00:09

بسم الله الرحمن الرحيم

السلام عليكم ورحمة الله وبركاته،،،

سينمات

هههههههههههههههههههههه

قلت لأم نمر فتحوا سينمات في السعوديه؟؟؟؟

قالت أجل ماعاد أحد رايح للبحرين والإمارت ومصر وغيرهم....

أقول جمع بس دراهمك وأشتر لنا أرض ثم أبني لنا بيت أحسن من البربره

الفاضيه...

عند أم نمر والله لو تسوق المرأه همها فقط بيت تنستر فيه وتسوي ديكوراته من الحراج

(((أيه هين يقولها هوامير العقار)))...

والسلام عليكم ورحمة الله وبركاته،،،

**شيخ النظر** · June 24th, 2009, 00:13

بسم الله الرحمن الرحيم

السلام عليكم ورحمة الله وبركاته،،،

مسااااج

بنت الجيران متخرجه من كلية ماأدري بس الظاهر شهاده معها أعلى من

الإبتدائيه بواجد الظاهر أنها إدارة عمال ودرست طبلون سكرتاريا يايايا في

باب العماره اللي عند أبراج التحرير وتتكلم عنقليزي ماشاء الله اللي

يسمعها يعتقد أنها مولوده في فرنسا...

قرت لوحة أسمي في العمل وقالت أنت أبو نمر جارنا مير وتصفقني أم

الركب أبي أوقف ابي ابلع ريقي ماقدرت قلت أكيد أم نمر مروحتها تراقبني

وقعدت أحلف وأدعي على نفسي أني جاي لمكتب التوظيف بالغلط ضحكة

وقالت لا أبشرك تعينت مديرة مكتب الدكتور مشفوح الفجعان من حمولة اللي

ماشافوا خير وأنا مطير عيوني ولو مابلعت ريقي كان طاحوا الله يستر

ويعينك يابنت ضعيف المحتاج...

وبعد شهرين و15 يوم لاحظو قبل أنقضاء التسعين يوم إلا ويكلمني واحد

من الشباب من باب السوالف قال مادريتاااااااااااااااااااا كنه توبيس مدرسة

يضرب الساعه ست لين صحى الجيران(((وناسه قلت له عدها تكفااااااا مير

ويعيي))) قال فيه وحده أسمها خبله ضعيف المحتاج (قلت في نفسي الله

يستر عسى ماهيب حامل؟؟؟)

قلت أسلم...

قال ياأخي مسلم...

قلت قصدي كمل....

قال ليه بنلعب كوره؟؟؟

قلت ياباااااااااايخ واصل حديثك...

خلص سالفتك...

قال رافعه شكوى للشئون الدينيه تقول أن الدكتور مشفوح بعد ماغثها على

سالفة اللبس والريحه قالها في يوم من الأيام صلحي لي شاهي وهذا ماهو

من عملي فقلت ماعليش شوي إلا ويقول أبيك تهمزيني يعني تسويين لي

مسااااج أبو الشباب هذا شكله مولود في بانكوك ويشتغل في باتايا يبي مساااج

ياجعله مايلقى له علااااج...

والسلام عليكم ورحمة الله وبركاته،،،

**شيخ النظر** · June 24th, 2009, 00:16

بسم الله الرحمن الرحيم

السلام عليكم ورحمة الله وبركاته،،،

مكينة الصراف

أصبحنا على يوم الأربعاء...

وأصبح الملك لله...

بالنسبه لرواتب الهجري ياعيني مهيصين وآخر رواقه والأسواق التجاريه

مسويين عروض على الأشياء المنتهيه مدتها

والحريم اليوم كل وحده أبتسامتها واصله أذانيها تقول ذا الوجه البشوش

ماقد زعل...

والسروات واصله عند مكاين الصراف واصله حدها أبعد شوي من

المشتري من تجمع الناس تقول المكاين توزع الفلوس

مجاناً ولاتباع...

في مثل هذا اليوم...

مره جيت أدخل لغرفة الصرافه في يوم الأربعاء الساعه عشره وألقى واحد

يبل ريقه ببطاقة الأحوال الجديده ويدخلها في

المكينه ومعه كشاف (كنه عجوز بتشك خيط في أبره) بصراحه أنا أرتبت

من الوضع(((بصراحه أقنعكم أن عنده ثروه وأنه شئ مهم)))

فقلت السلام وعليكم وأنا أتلفت يمين ويسار قلت لايكونون

مسويين لي كمين المهم ولا رد علي وتملكني

الفضول (أذرب شوي من اللقافه) إلا أعرف وش يسوي فكررت عليه

السلام فرد علي بوجه معرق معك عده(عدة مطلقه)

قلت لا معي نفاس ينفع؟؟؟؟

قال تستخف دمك بلا والله مانشبت زيي قلت عسى ماشر قال من الساعه

خمس كلت بطاقتي ولا طلعت لي فلوس

ومن ساعتها وأنا مطفي الجوال وقاعد أحاول في البطاقه وإذا أتصلت عاى

البنك ال800 مايقبل الجوال وأزعجوني الديانه والمدام

ووالله ماأروح لين تطلع بطاقتي وإلاتصرف لي فلوس ومن يومها

وأنا أدهن بطاقتي بالكريم عشان مايجيها مشق

وتنشب في الصراف مثل خوينا....

والسلام عليكم ورحمة الله وبركاته،،،

**شيخ النظر** · June 24th, 2009, 00:17

بسم الله الرحمن الرحيم

السلام عليكم ورحمة الله وبركاته،،،

حادث

اليوم وأنا جاي للدوام إلا وأشوف ذيك الزحمه بس هالمره ماتملكني

الفضول قلت رواتب والناس تبي تهيص اليوم بس عادة زحمة الرواتب

كأنها دوده شريطيه طويله وذي زحمه مورمه مير وأنزل بعلبة الفكس

وأتجه لهم ركض الفزاعه إلا وهو حادث ففكرت وش أسوي قمت خليت

الشباب يسوون سور على الحادث بسياراتهم ويخلون فتحه بسيطه عشان

الدخول وأحط أثنين معلقين أخوانهم على كتوفهم من العضلات وقلت أنتم

هنا ياشباب الدخول بخمسه ريال للفرد واللي بيصور يدفع خمسطعش...

ومافيه نص ساعه إلا وأمتلت ساحة الحادث لدرجة لو مافيه مباني كنت

زحفته شوي عن الطريق وخليت العرض يستمر أربعة أيام...

الحكي للحين ماشفنا المرور (عرس وتأخروا فيه الطقاقات) تصدقون من

الإيرادات صلحنا السيارات بدون تأمين لأن شركاته صارت معظمها وهميه

والفايض تقاسمناه يالكبار...

والسلام عليكم ورحمة الله وبركاته،،،

**شيخ النظر** · June 24th, 2009, 00:19

بسم الله الرحمن الرحيم

السلام عليكم ورحمة الله وبركاته،،،

المدارس

يووووووووووه نسيت ماقلت لكم وش صار يوم أقنعت أم مشعل جارتنا

مشرفه طلابيه أم نمر تخاويها لليوم المفتوح...

طبعاً أم نمر أجوديه وقرويه ومامعها إلا خامسه أبتدائي مبلشتين أنها تعرف

تقراء وتكتب لدرجة كم مره إذا وقفنا عند إشاره وتبي توريني أنه تعرف

تقراء اللوحات أن السيارات اللي جنبنا يحسبونها تطالعهم...

جتني عقب محايلات ومسايسات تبي تروح مع أم مشعل وطبعاً ذي فرصة

لإظهار القوامه الرجاليه وقلت لها لاااااااا (((بس أنا قلت لا إلا هو آخر

علمي بالدنيا ولاصحيت إلا الأسبوع الجاي))) أمزح فوافقت على طول لأن

أم نمر مقتنعه أنها تعرف تسوي جريش وقرصان ومفكره تبيع على الناس

تبي تجيب لهم تسمم وتحسبهم مثلي بيسكتون فقالت بأروح أسوي لنفسي

دعايه...

ولما رجعت ياااااااااااااااااااه فقعت مخيييييييييييييييييي تبي تشتغل إنشاء الله

فراشه وتحسب أن أسم الوزير بما أنه نفس أسمي أنه من الجماعه ولا زم

يتوسط لها وأنا ظالمها بالقعده في البيت وأنها وأنها لدرجة حسستني أنها

فلسطين وأنا اليهوووود....

وبعد تعهدات أني أوظفها السنه الجايه قلت وش العلم يالغاليه؟؟؟

قالت كننا في أستراحه الفطور جايبينه من مطعم الشابوره والحلويات من

لوتناظر والتمور من هميم والبخور الزين ومجلس من ذا إلى ذاك (موتو

قهر ماتدرون وين ذا من ذاك) كنايه عن الكبر...

وفيه شاشه أل سي دي 52 أنش ودي أس أل وقنوات فضائيه اللي تبي

والمدرسات سوالف وكركره ويقولون والله ياأم نمر كل يوم كذا بس نكتب

على السبوره الطلبات اللي يجيبونها أولياء الأمور وخلاص وباقي اليوم حنا

هنا إلا والموجهه تدخل عليهم أثرها جايبه معها شريط أكس بوكس الجزيره

المفقوده ومسويه دوري مع المدرسات والفراشات سالكين معهم والدعوه

فلللللله...

بصراحه أقتنعت من وجهة نظرها وأفكر أوظفها عشان أفتك من صجتها...

والسلام عليكم ورحمة الله وبركاته،،،

**شيخ النظر** · June 24th, 2009, 00:21

بسم الله الرحمن الرحيم

السلام عليكم ورحمة الله وبركاته،،،

يا شيخ روح

أنا من أسمع بداية هالجمله ((يا شيخ روح اللـه)) أخاف من كثر دعاوي

أم نمر علي كرهتني في نفسي أجل أبو فاضل يستلم مناخ سنوي

12000ريال وعاده 8000 ريال غير الشرهات وعنده ثلا ث أراضي منح

مقدم لنفسه ولعياله عام 1400 وخشبه يوم كان الطماط ينباع في سحاحير

(لعيال النيدو صناديق خشبيه) والآن يبني منتجعات عند الجسر المعلق وأنا

كل ماجلست مع أجنبي يقول لي أخخخخخخخخخخخخخخخخ بس لو عندي

بطاقه وأنا والله بس البطاقه اللي مآخذها ببلاش وللحين ماأدري وين أبو

فاضل يجمع هالدراهم منه من عذره خيمته على أربعة شوارع وأنا مستاجر

جحر ضب يفتح على سكه سد الله الرزاق....

فلا تقولون لي روح يجوز ترى تدعون لي وأنا جالس والله يسعد أرواحكم

وأيامكم ونورتوا تنويرة راعي جيب يكبس لي في الليل شمعته كأنها أقمار

المشتري اللي تخليك ماتدري وين دربك...

والسلام عليكم ورحمة الله وبركاته،،،

**شيخ النظر** · June 24th, 2009, 00:25

بسم الله الرحمن الرحيم

السلام عليكم ورحمة الله وبركاته،،،

كشكوووول

الإبتسامه شئ سهل خصوصاً لما تبحث عن موقف في البطحاء ولاتلاقي

والعجيبه أن السيارات القديمه متبطحه على الأرصفه...

والغبنه أنك مالك دخل ومحترق دمك وأعصابك واللي لهم دخل كله واحد

ماهمهم شئ...

والعفانه أنك تصحى الصباح وبزابيزك ماتصب وتروح تتحمم في المسجد

بفوطتك وتلحق على صلاة الجماعه وغيرك يروح يداوم ماتحمم ولاصلى

رغم أن المويه في بيت ماتوقف...

والسذاجه أنك راتبك ألفين ريال وتجيب معك زمازم (ترامس) قهوه وشاهي

وتمر وتعذب الأجوديه كل يوم مآخذ معك مراصيع وإلا قريص وإلا...

والحيره أنك تتذمر وتتأسف لأحوال المسلمين ولما تكون من متخذين القرار

يبقى الوضع على سابقه...

والدمعه ألم لحظة تشوف إمرأه سعوديه كبيره في السن تشحذ باكستاني

صاحب ليموزين ولايعطيها...

والسلام عليكم ورحمة الله وبركاته،،،

**شيخ النظر** · June 24th, 2009, 00:28

بسم الله الرحمن الرحيم

السلام عليكم ورحمة الله وبركاته،،،

السبع الموبقات

عن أبي هريرة رضي الله عنه قال : قال رسول الله صلي الله عليه وسلم

" اجتنبوا السبع الموبقات الشرك بالله والسحر وقتل النفس التي حرم الله

إلا بالحق وأكل الربا وأكل مال اليتيم والتولي يوم الزحف وقذف المحصنات

الغافلات ".

والسلام عليكم ورحمة الله وبركاته،،،

**شيخ النظر** · June 24th, 2009, 00:29

بسم الله الرحمن الرحيم

السلام عليكم ورحمة الله وبركاته،،،

يشيل

وصلت للبيت وتوي بأوقف إلا وألمح دباب البقاله يدخل على بيت أبو

ممدوح اللي ساكن في البيت هو وعجوزه وطباخه وخدامه والسواق عند

عياله يروحونه له...

المهم وأدعس كني ألاحق جربوع (مافيه أمل ألاحق جربوع) وأحجر

البنقالي بصدام السياره وأدق على أبو ممدوح إلا وقال ياجار أنااللي قلت له

يدخل بالطلب لجوا وأنت الله يهديك لو أنه حرامي مالحقته...

هذي مشكلة لأني ماطقيت الهندي اللي قطع له الشجر صرت خواف

ولاعندي نخوه رغم أن الموضوع أختلاف على خمسه ريال دفعتها وأنتهت

المشكله بس أبو ممدوح يشيل في خويطره....

والسلام عليكم ورحمة الله وبركاته،،،