يوميات شيخ النظر

**شيخ النظر** · June 29th, 2009, 20:37

بسم الله الرحمن الرحيم

السلام عليكم ورحمة الله وبركاته،،،

من يحمينا؟؟؟

سألت يا البنوك وش شروطكم أبي أشتري بيت؟؟؟

قالوا ماعليك إلتزامات وتحويل للراتب وتدور بيت وتعال ومن لقيت البيت

ودفعت العربون أتجهت للبنك...

بنك 1 الواجهه كلهم أردنيين لايحترمون إنسانيتك ويلهثون وراء نسبتهم

متجاهلين وضع المادي وأي شئ في حياتك أياً كان ومافيه إلا تغييب

للحقائق وتدبيل للنسب وكأنهم يتعاملون مع حيوان وليس بإنسان...!!!!؟

ولما تكتشف الحقائق يرمون أوراقك في وجهك لأنك ماقدر تسوي لهم

شئ...

بنك 2 أخر أوراقك وحط لك الشمس في يد والقمر في يد وأظهر لك الجانب

الطيب للبنوك وبعد يومين يقولون لك نفس البنك الأول عاجب وإلا أقلب

وجهك...

بالله لو لقت هالبنوك من يعاقبها ويأدبها بتبيع في المواطن وتشتري فيه

وبعدين مؤسسة النقد مايسمى بالسيدار أصبحت تأخذ من البنوك أقل من

01% ومازلت نسبة البنوك 04% فما فوق يابشر حرااااااااااااام عليكم من

كل جهه تتجاذبك الحوادث كأنك خيال (طارد الطيور) في مزرعه الريح

تلعب بك في كل إتجااااااااااه.........

والسلام عليكم ورحمة الله وبركاته،،،

**شيخ النظر** · June 29th, 2009, 20:38

بسم الله الرحمن الرحيم

السلام عليكم ورحمة الله وبركاته،،،

ليه متخفي

صديق : ليه ياشيخ دخولك متخفي؟؟؟

شيخ : لأن لاحظت الناس من تشوفني أكتب في الموضوع تنحااااااش...

صديق : بلا والله من طول لسانك...!!!

شيخ : يعني مالاحظت إلا طول لساني؟؟؟

صديق : هو اللي باين منك...

شيخ : ماتلاحظ طول الأظافر والشعر والثوب؟؟؟

صديق : أهيه هييييييييييين...!!!؟

شيخ : صدق أجل أكذب...

صديق : لا لا لا ماهيب هي....

شيخ : عاد قلت لك لأن من أول أبوي لاطولت شعري حط فيه علوووووك

ولو مسكتني الهيئة مستني بالموووووووس وأظافري بالزرادية كانت تقطع

وثوبي ألقاه مقصوص بالمقص....

صديق : طيب وش تغير؟؟؟؟

شيخ : ماعاد أحد يقول لي شئ وأولهم أهلي تقول أجنبي داخل عليهم

والهيئة مااااش ماعاد هم مثل أول شديدين مع أشكالي....

صديق : لاحووووووووووووول....

شيخ : لدرجة صرت أنافس خوااااااااااااااتي على المرايات والمكياج ومامن

موجه حق يعلمني السنع...

صديق : أقول الله يهديك وإلا يأخذك...

شيخ : آميييييييييييين...

والسلام عليكم ورحمة الله وبركاته،،،

**شيخ النظر** · June 29th, 2009, 20:39

بسم الله الرحمن الرحيم

السلام عليكم ورحمة الله وبركاته،،،

سراب

سراب...

تعبت أبجمعه...

في فنجال الأهداب...

ذاب...

مابين تعب قلبي والأعصاب....

ياشمس أنثريه تحتي...

وأسقيه من عرقي...

وأن مارقي..

أنثري له جبيني...

اللي مسحتي...

أشوفه قدامي...

واللي ضامي...

يشوفني فوقه...

سراب...

لابلّ عظامي...

ولاشربته أقدامي...

ماغير عذاب...

متنوعه طروقه...

فلان سراب...

وعلان سراب...

وفلنتان سراب...

وكل وذوقه...

أما في مقايسي...

كذاب...

وكذاب...

وكذاب...

والسراب على الأقل...

نشوفه...

لكن النذل...

يعزف علينا دفوفه...

والسلام عليكم ورحمة الله وبركاته،،،

**شيخ النظر** · June 29th, 2009, 20:40

بسم الله الرحمن الرحيم

السلام عليكم ورحمة الله وبركاته،،،

المنتّف

يقولون عيالي كل ماقلنا لك شئ قلت مافيه فلوووووووووس...!!!

وإلا بعدين وإلا أصبروا لين يجي الراتب وإلا أطلب واحد والله يقلعه

ماسددني ياكثر أعذارك ليتك تعلمنا نصرف فيها الأبلات والمدرسين لين

سألونا...

تجي عاد توته تقول لي بابا أنت بترووووووووح للناااااااااار...

قلت أفاااا ليه يا بابا؟؟؟

قالت أنت كذااااااااااااب...!!!

قلت (غيرها هذي قديمة) طيب ليه يا بابا؟؟؟

قالت قلت لك جب لي ألعاب وعرايس ولاجيت لي...!!!؟

قلت يبه كل العرايس أعرسوا ولابقى أحد لأن الناس قامت تصرّف بناتها

قبل الصيفية وبصراحة أكتشفوا الأباء أن إذا مازوج بنته بتقعد في

تسبده خصوصاً إذا تعينت بتكون في منطقه نائيه وعلى بند 105

مايسوى همه راتبها يروح في تسديد النقل وتصليح المدرسة اللي تدرس

فيها مكيف خربااااان مافيه دورات مياااااااااه (ماغير حياييل) وطلبة

تروشوا أيام الأمطار الآخيرة...

فلذلك زوجوهم ومن وين أجيب لك؟؟؟

قالت تصرف يامن عند أبو ريالين وإلا من عند أبو خمسة وهذا حدك

أنتبه تروح للمحلات الكبيرة تجيك سكته وأنت ماعندك ماتورثنا...

قلت طيب أبشري بس دقي علي ذكريني...

قالت من وين أدق عليك!!!؟؟؟

قلت من التلفون!!!

قالت هماك تقول مقطوع من عهد الملك خالد الله يرحمه؟؟؟

قلت طيب من الجوال...

قالت كل جوالاتنا طافيه...

قلت طيب أشحنوها....

قالت ماتدري أن الكهرب مقطوع من عهد الملك فيصل الله يرحمه ؟؟؟؟

قلت طيب من عند الجيراااان...

قالت همانا ساكنين في البر من عهد الملك فهد الله يرحمه وماعندنا جيران؟؟؟

قلت طيب وش الحل ؟؟؟؟

قالت بنشتكيك للملك عبدالله الله يطول بعمره يجيب لنا أبو بدالك يعرف

يتحمل المسئولية ماهوب أنت من عهد الملك سعود الله يرحمه

وأنمت طايح في حلوووووقنا يامنتفففففففففففف.....

والسلام عليكم ورحمة الله وبركاته،،،

**شيخ النظر** · June 29th, 2009, 20:44

بسم الله الرحمن الرحيم

السلام عليكم ورحمة الله وبركاته،،،

وأنا سرحاااااااااااان

ظفر الإبهام يرقل وباقي شوي يطيح من أنصك علي باب الفصل..

وتحت الإبهام بطن الرجل منزلغ يوم جيت أشوت الكورة بوووز شت

معها الأرض...

ومشط الرجل مكسور يوم لعبوا علي العيال وخلوني أشوت الكورة اللي

معبية حصى...

عراقيب الرجل تزلغت من الصاجه حقت وطّاية السيكل...

طيب الكعب وش زلغه ياشيخ وش زلغه أيه تذكرت يوم جيت أشوت

ووطاني نويصر من ورى لين قشع جلدي...

وش ذا كنه حفره يوووووووووووه هذا يوم جيت أكسر سحّارة البرقدان

يوم نشب في بطن رجلي المسماااااااار ثم عطّبته أمي الله يرحمها بغيت

أموت بس الحمدلله...

وذي كنها طقطقت دبّاسه أيه هذي الخياطه يوم غزتني قزازه أيام المطر

وودوني للصحية وخيطوني...

وش ذا المشوخ غاديه رجلي منها كنها بطن سوداني أيييييييييييه عرفت

هذي أيام المشق كنت أحك في رجلي أحككككككككك لين يظهر الدم

ويقول وش تبي توصل له بالضبط....

وأنتم بكرامة حاط الجهاز في حضني وحاط رجل على رجل ولين رجلي

كنها بطن جثة في كلية الطب أنواع المآسي فيها سو زييّ وتشوف

العجايب وهذا اللي طلع معي وأنا سرحاااااااااااان...

والسلام عليكم ورحمة الله وبركاته،،،

**شيخ النظر** · June 29th, 2009, 20:47

بسم الله الرحمن الرحيم

السلام عليكم ورحمة الله وبركاته،،،

مشوارها بمحمود مع متلازمة داون

والله لاأعرف صحبة المدونة ولكنها من أجمل المدونات التي رأيت في

حياتي فشفى الله لها محمود وجميع من يعانون من متلازمة داون

(المنغوليا) وحفظ أطفال المسلمين أجمعين وما وضعي لها إلا ليستفيد

منها الجميع وتعريف من لهم أطفال يعانون من متلازمة داون بها...

ولعل زيارة مدونتها تغني عن أي حديث عنها والله من وراء القصد...

لزيارة المدونة : أضغــــــــــــــــــــــــــــط هـــــــــــــــنا

والسلام عليكم ورحمة الله وبركاته،،،

**شيخ النظر** · June 29th, 2009, 21:24

بسم الله الرحمن الرحيم

السلام عليكم ورحمة الله وبركاته،،،

المطعم العائلي

أم نمر : الله الله وش ذا...؟؟؟

أبو نمر : هذا اللي صاجتني عليه...

أم نمر : الله لايبارتس فيك ظهرررررررررررررررررررني....

أبو نمر : ياأدمية تعوذي من الشيطااااان....

أم نمر : أعوذ بالله منك أنت....

أبو نمر : لاحول ولاقوة إلا بالله وشفيك ماتتعوذين منه!!؟؟؟

أم نمر : وش شايفني مجنونه وإلا وشووووووو إلا أعوذ بالله منك

أنت....

أبو نمر : الظاهر أبليس يقرب لك...

أم نمر : أيه ماتدري أنه أنت....

أبو نمر : لا لا لا شكله فعلاً يقرب لك...

أم نمر : أيه أنت حسبي الله عليك كانك حارمني وأنا توي بزر...

أبو نمر : هو الصدق أنتي توتس بالمهاد لكن حارمتس هذي كفري

عنها...

أم نمر : أجل بالله عليك أقول لك ودني لمطعم تدخلني في صندّقت

حمام (عشّة)...

أبو نمر : أسكتي يالخبلااااااااا هذي مطعمنا كذا...

أم نمر : وشهو والله لو أني طااالعة معك ماتوزيت هناااااااااا!!!؟

أبو نمر : وش تقولين يابننننننننننت....

أم نمر : فيك خير كمّل لللللللللل...

أبو نمر : يابنت حساني وأبوك وصاني لاتبيعين الذهب إلا بالميزاني...

أم نمر : أقول قم بس الله لايبارتس في من دلّك بيتنا...

أبو نمر : شوفي قلتي ماتهتم بي ولاتظهرني زي خليل...

أم نمر : من خليل؟؟؟؟

أبو نمر : اللي يشبهني!!؟؟؟

أم نمر : ورني أشووووووووف وععععععععع مالت عليك....

أبو نمر : بعد وعععععععع ومالت علي صدق من قال (كريم ملكته لئيم تمرد)...

أم نمر : وش تبرطم تقول يالله بس قم خلنا نظهر غمتتتتتتتتته في ذا...

أبو نمر : وين نروووووووووح؟؟؟؟

أم نمر : أمش وأنا بعدين أعلمك أجل عازمني في خزان مويه ماتشوف

خليل وشلون يسوي بميرنا لعللوك أستحى وأثبت للعالم أن السعودي

فالح في شئ واحد على الأقل...

أبو نمر : هذي مطاعمنا وين تبيني أوديك؟؟؟

أم نمر : واللي تظهر في التلفزيون!!؟؟؟

أبو نمر : هذي الله يأخذ العدووووووووووو في تركيا...

أم نمر : يالله قم مشينا لها وذي تركيا وين هي من الفيصلية؟؟؟؟

أبو نمر : أقول أركبي لاأتوطاتس بعد تبين تروحين تركيااااااااا

والسلام عليكم ورحمة الله وبركاته،،،

**شيخ النظر** · June 29th, 2009, 21:29

بسم الله الرحمن الرحيم

السلام عليكم ورحمة الله وبركاته،،،

جاء أبوي

أبو جاسم : جاااء أبووووووي...

نمر : وخير ياطير...

أبو جاسم : تعال نتوزى لايقعد يصجنا بمحاضراته...

نمر : ذاااااااااك أول يصجنا بمحاضراته...

أبو جاسم : ليه وش صار عشان يتغير؟؟؟؟

نمر : له أربعين يوم...

أبو جاسم : وشهو نفاااااااااس...!!!؟؟؟

نمر : أنت صاحي...!!!؟ أبوي رجااااال النفاس لأمي...

أبو جاسم : طيب أجل وشهووووووو!؟؟؟؟

نمر : ماتشوفه من يدخل يسلم ويطق ذيك الإبتسااااااامة ثم يفتح قبره

(مكتبة) ويجلس قدام الكومبيوتر كنّه بوذي قاعد قدام صنم...

ولاعاد يتحرك ماغير ملامح وجهه....

أبو جاسم : شكله طايح في الدردشة ويسولف مع أصدقاااااااه...

نمر : أمحححححححححححق من اللي يبيه هو ويا وجهه!!؟؟

أبو جاسم : عاد اللي يغازلون يهمهم شكله؟؟؟ يقول صققي نصوري مايهمهم غير الكلام الزييين

والفكّ وأبوي أكبر فكاك في العالم...

نمر : يعني ضنّك يسويهاااااااا!!؟؟؟ لا لا هالشايب الكديييييش مايعرف هالسوالف...

أبو جاسم : طيب أسكتتتتتت...

أبو نمر : السلام عليكم ياعيالي.. هاه ذاكرتوا؟؟؟؟

نمر : أيه الحمدلله...

أبو نمر : طيب قل لأمك تسوي لي شاهي وتجيبه على المكتب ولاأسمع

لأحد فيكم صوت...

أبو جاسم : يبااااااااه وش عندك في المكتب....!!!؟

أبو نمر : عندي شغلللللللللللللللللللللللللل وبعدين وش دخلك ياتعباااااان...؟؟؟

نمر : ماقلت لك ماعنده ماعند جدتي؟؟؟؟؟ يالله بس قم نلعب كوووووره...

والسلام عليكم ورحمة الله وبركاته،،،

**شيخ النظر** · June 29th, 2009, 21:30

بسم الله الرحمن الرحيم

السلام عليكم ورحمة الله وبركاته،،،

لا تخلي حقك

الجزء الأول رسالة من قلب الحدث

ماضاع حق وراه مطالب...

بعد مافعلته البنوك معي حز في نفسي أن يضحك علي من هم أقل فهماً

وعقلاً مني وهذا ليس تعالياً بل لأنهم أفترضوا في مواطنتي الغباء...

فقد توجهت إلى إدارة البنك وبحثت عن مدارائهم إلي أن وصلت لأحدهم ولم

أجده حيث خرج في أجتماع وقد وعدني سكرتيره بالإتصال علي فلو ماأتصل

وجدت حلول آخرى وهي إدارة التفتيش على البنوك في مؤسسة

النقد وهي تقاضي البنك عن كل يوم بثلاثة ألآف تدفع للعميل وهي تحت

إدارة رجل شهم يدعى بن سبيل وحلولهم فورية...

والآن سأنتظر رد هذا المدير ولعلها تنحل الأمور على حسب رغبتي وليس

كما يفرضون علي...

فتابعوني ودعواتكم لي بالتوفيق...

والسلام عليكم ورحمة الله وبركاته،،،

**شيخ النظر** · June 29th, 2009, 21:32

بسم الله الرحمن الرحيم

السلام عليكم ورحمة الله وبركاته،،،

لا تخلي حقك

الجزء الثاني

ماضاع حق وراه مطالب...

أتصل علي المدير وحكيت له جميع المهازل التي حصلت من جميع

موظفيه ووعدني خيراً بحلول صباح الغد على أكثر تقدير...

وبصدق معظم المدراء أول ماتوصل عنده فيه أحتمالين إذا كان فاهم

فهو يعرف أن العميل دائم على حق فهو بيأخذ لك حقك...

وإذا كان رخمة من حقين الوسطات فهو بيقلبون مخه ثم ماعاد ماعاد

يرد عليك...

وما على الله بعزيز أسئله سبحانه وتعالى أن ييسر لي أمري وجميع

المسلمين...

فتابعوني ودعواتكم لي بالتوفيق...

والسلام عليكم ورحمة الله وبركاته،،،