يوميات شيخ النظر

**شيخ النظر** · June 28th, 2009, 07:35

بسم الله الرحمن الرحيم

السلام عليكم ورحمة الله وبركاته،،،

المقاطعة السنية للمنتوجات الرافضية

موضوع جميل أستوقفني وكنت سأتطرق إليها من خلال يومياتي لذلك تقبلوا

أسلوبي كما في اليوميات بدون أي أنزعاج...

في السابق قاطعنا المنتجات الدانماركية وغيرها الكثير من المنتجات وأتجهنا

للوطني الذي هو مصنع من أصول دانماركية أو مشتق منها فمثلاً جميع

منتجات الألبان والحليب الأصل فيها البودرة الدنماركية والأوربية فماذا كان

الناتج أجيبوني بعقلانية ودون تعجل فأنا والله مسلم غيور أحب الله ودينه

ورسوله صلى الله عليه وسلم ثم وطني ومليكي...

النتيجة زادت أسعار المنتجات المحلية الضعف تقريباً دون ذكر أسماء

شركات...

وعلى قولة خلف بن هذال

(من دون صيهون بذتنا صهاينا)...

فالموضوع يحتاج إلى تروي قبيل أي مبادرة ففي الأحساء وفي القطيف حتى

في أحدى قرى نجران أسلم ثلة كبيرة منهم وعادوا إلى الله على أيدي دعاة

مصلحين يرجون ماعند الله فهل نتروى قبل المقاطعه وننظر في كيفية وقف

المد الشيعي بالعقل الذي وهبنا أياه المولى عز وجل فلله قوة يصلح بها من

يشاء فلا نعلم لعل الله يردهم للحق رداً جميلا...

وصدقوني نحتاج إلى دعاة حقيقين يبذلون النفس والنفيس فميزانيات التنصير

تصل إلى مئات المليارات ولكن ميزانيات المكاتب الدعوية لاتتعدى الألوف

ولم تبلغ حتى المئات...

أكرر أعتذاري ومخالفتي لعواطفكم الغيورة ولكن هذا ماأراه صواب والله

أعلم...

والسلام عليكم ورحمة الله وبركاته،،،

**شيخ النظر** · June 28th, 2009, 07:37

بسم الله الرحمن الرحيم

السلام عليكم ورحمة الله وبركاته،،،

كتّاب

دول جنوب شرق أسيا ملوا المستشفيات العامه أمثال الشميسي والأمير

سلمان ومستشفى الحراج قصدي الإيمان حتى مواطنين جنوب شرق أسيا

مو عاجبهم وبدوا بهجرات لجنوب أفريقيا وماليزيا للحصول على تأشيرات

عمل في السعودية...

والمعهد الصحي وكليات التمريض تخرج للمراكز الصحيه كتّاب....

والسلام عليكم ورحمة الله وبركاته،،،

**شيخ النظر** · June 28th, 2009, 07:41

بسم الله الرحمن الرحيم

السلام عليكم ورحمة الله وبركاته،،،

كلمة حق

ماشاء الله تبارك الله على معالي وزير الصحة الدكتور عبدالله الربيعة

فبالإضافة إلى نجاحه كعملة نادرة في مجال الطب في مجال جراحة

السياميين الأطفال المتلاحمه فهو شخصية فذة تتمتع بخلق عالي ومحافظ

على صلاة الجماعة وأحسبه من من يخافون الله والله حسيبة...

فما فعله في مدينة الملك عبدالعزيز الطبية لاينكره إلا ظالم لنفسه والرجل

مازال في بداياته وأسئل الله أن يهديه إلى طريق الحق وأن يخول له البطانة

الصالحة...

فقد انشئ في مدينة الملك عبدالعزيز الطبية كليات للتمريض والطب وهو

محب للكوادر السعودية بل أن معظم الفرق التي عملت معه سعودية بنسبة

90% وما يحدث الآن من تخبطات في وزارة الصحة لعلها بسبب عدم

إلمامه التام بمهام المنصب الجديد ونأمل من معالية النظر في شتى أمور

هذه الوزارة الهامه التي تخدم شريحة المواطنين...

فحسبما أعتقادي أن معالي وزير الصحة الدكتور عبدالله الربيعة من الناس

الذين يتمنى المرء أن يعمل معه فهو من أبناء هذا الوطن فقد درس في

الإبتدائية والمتوسطة والثانوية في المربع في مدينة الرياض ودرس الطب

في جامعة الملك سعود ثم أبتعث إلى كندا بفكر مسلم واعي وإن شاء الله

سترونه ممن يثلجون الصدر في تعاقداته وتغييره الجذري لوزارة الصحة

فهو أبن هذه البيئة وقد خرج من أزقتها ويعلم مايعانيه أهلها وخصوصاً في

مجال الصحة...

ونسأل الله أن ينفع به وجميع ولاة أمورنا ووزرائنا لما فيه خير لهذا الوطن

وجميع المسلمين...

والسلام عليكم ورحمة الله وبركاته،،،

**شيخ النظر** · June 28th, 2009, 07:43

بسم الله الرحمن الرحيم

السلام عليكم ورحمة الله وبركاته،،،

يمّـــــــــه

إهداء إلى كل أم من أطفالها فأتمنى أثناء قرأته أن تقرأها بصوت أبنك أو أبنتك حفظ الله أبنائي وبناتي وأبناء المسلمين عامه ولدعوة بالرحمة لوالدتي لهي عندي بالشئ الكثير...

مــامــا...

مــامــا...

مــامــا...

تصدقين كل الأطفال يتاما...

لأنك لي ماما...

وأنتي طيبه معي ياما وياما...

يــــــــمــه...

أحبك يمه...

صدق يـــمــه...

مأأدري كيف أوصف لك...

أيه أيه أيه يمه...

عرفت وشلون أعبر لك...

مووواح مووواحه هذي بوستين وضمه...

تضميني ميت على حنانك...

نفسي عل صدرك أصيح...

مابي فالدنيا إلا أحضانك...

يمه خليني كذا مستريح..

أنا تعبان...

محتاج لحنان...

نفسي في هالأمان...

من زمان...

يالله يمه...

وشكثر بحياتي مهمه...

كل شئ منك جنان...

كلمتك ترن بأذوني...

حبيبي وليدي أنتبه...

ياجعلها ماتفقدك عيوني...

مالك في الدنيا شبه...

مدرستي والشارع والبيت...

على طيبك نشأت وتربيت...

يــــــــمــه...

أحبك يمه...

صدق يـــمــه...

ماأدري كيف أوصف لك...

أيه أيه أيه يمه...

عرفت وشلون أعبر لك...

مووواح مووواحه هذي بوستين وضمه...

هاه وش رأيك يمه...

شطووور وليدك وإلا لا يمه؟؟؟

يمه يمه...

هما هما الشوق عذبني...

يمك حيل يقربني...

وإذا قربتي يمه ماهمه...

أكثر وأكثر يشوقني...

يمه يمه...

ووو وروحي عليك تجنني...

تقول أمك نينتي وإلا نني؟

يمه روحك وش تسمه؟

الطيب الحلم وإلا التمني؟

أصلآ عجزتك الأوصاف...

عن كل وصف...

خذيتي بالتميز الإختلاف...

حرف حرف...

كلامك طمئنينه وإنصاف...

ياقلبيييييه أحبك أمي...

تروحين وأحتريك حزين...

وأصير في نفسك وترجعين...

وأركض لك جت أمي...

جت أمي...

جت أمي...

تضميني وتبوسيني وتبتسمين...

ثم علي تسمي...

تقولين طولت...؟

خليتك ياوحيدي...

ياوليدي وقليبي وسيدي...

تحسبيني زعلت...

وأنا مازعلت...

بس أني عليك أنشغلت...

ثم تراضيني ياحلو مراضاتك...

كل شيك حلو حتى لحظاتك...

وأبداء أتشرط بطلباتي...

أبي وأبي وأبي...

ياأمي وأبي...

أبعجزك بطلبي...

وتقولين أبشر ياحياتي...

يــــــــمــه...

أحبك يمه...

صدق يـــمــه...

ماأدري كيف أوصف لك...

أيه أيه أيه يمه...

عرفت وشلون أعبر لك...

مووواح مووواحه هذي بوستين وضمه...

هاه وش رأيك يمه...

شطووور وليدك وإلا لا يمه؟؟؟

يمه يمه...

ترى أنا كبرت...

شوفي وشلون صرت...

يمه كبرت إلا عليك...

أحس أني صغرت...

أحبي حواليك...

وإذا غبتي صرخت لك...

تعجبني روعتك

وتنطين لي وشفيك!؟

وشفيك!؟

وشفيك!؟

بسم الله عليك...

إلا أنتي بسم الله عليك...

أمي في كل لحظه أبيك...

يمه يمه...

أنتي كثييير حنووون...

ماقد جربتي حنانك...

وإلا ماتحسين بشعورك؟؟؟

تدرين ياروح هالصغينون...

لو مره جربتي أحضانك...

كان أنغربك غرورك...

تهبلييين ياأحلا أميمه...

وش رأيك نلعب غميمه!!؟

ياحبي لك...

حتى وأنا أتخبا...

تشوفيني وتراقبيني...

حتى في لعبك أتربا...

مدرسه وأنتي تلاعبيني...

من يقول في الدنيا أم!!؟

أقول له يالله بس قم...

غير أمي مابه أم!!!

تدلعني تهنيني...

يمه يمه...

هبلتيني ياربيييييييييه وش أسوي؟

وش أسوي؟

وش أسوي؟

أيه لقيتها...

يالله تربعي وأفتحي يديك...

روحي ونفسي عليك حطيتها...

يالله ضميني بقوووووووه عليك...

نوميني على رجولك يمه...

ولاغفيت حني علي...

ببوستين وضمه...

يــــــــمــه...

أحبك يمه...

صدق يـــمــه...

ماأدري كيف أوصف لك...

أيه أيه أيه يمه...

عرفت وشلون أعبر لك...

مووواح مووواحه هذي بوستين وضمه...

هاه وش رأيك يمه...

شطووور وليدك وإلا لا يمه؟؟؟

والسلام عليكم ورحمة الله وبركاته،،،

**شيخ النظر** · June 28th, 2009, 07:48

بسم الله الرحمن الرحيم

السلام عليكم ورحمة الله وبركاته،،،

السيرة الذاتية

في الصباح الباكر بعد صلاة الفجر في حي سكيرينة أجتمعت عائلة أبو غانم

على ذيك القهيوة والحليبة وسلطة ذيك الطماط بالحبحر النعجاني وخبز

العايدي جايبه غانم أربع حبات من مخبز حمدان اللي لوحته للحين حديد

ماتغيرت من التسعينات الهجرية...

الخبز ملفوف في فوطة البيالات ويجيبه وهو يصبح على البركة أبوه وأمة

ويحب روسهم ويدياتهم ويجلس على ذيك السفرة الخوص اللي أطرافها

سوداء عليها بقايا قرصان من حق البارح اللي روحت لهم أم بنيدر جزاها الله

خير...

ويفطرون بحب ووئام مامثله ومن خلصوا وشربوا الشاهي رفعت أم غانم

السفره والخبز حطته في الخبّازه والدله والبريق على الوجار في مسووّا

القهوه...

قام أبو غانم كالعادة يهندس في سيارته اللي قدام الباب فئة ماركّتو قيرها

علاقي مزبرق وهذا النوع أنقرض لذلك تلاقي أبو غانم ساخط على النظام

والمسئولين وتعب من تلفيق القطع لها السيارة اللي لوحاتها زرق

خصوصي السعودية وكل يوم فاتح كبوت هالماركتو وقاعد يهندس في

هالسيارة تحت سدرة مزروعه من عهد الملك عبدالعزيز طيب الله ثراه حيث

كان محباً لهذه البلاد ويريد أن يراها بأبهى حلّة....

وغانم طلع فوق لصندقة الحمام ورش لهم الحب وحط مويه وقعد ينظف

الصندقه من الضواطير (الوزغ) والفيران عشان مايخربون العشّه وطلع

الكويتيات وحطهم على جدار السطح وبدى يطير القطايف بعسيبه اللي

مربوط في طرفه شماغ برتقاليه...

وأم غانم قاعده تجهز للغداء شوي وشوي ترتب بسطتها عشان تروح تبيع في

حلة القصمان وكانت العائلة سعيده جدأً رغم الفقر المقذع ولايدرون أن

الدنيا تعيرت إلا من عزبة الزيود اللي جنبهم كل ماجاء واحد بيسافر حمّل له

ديّنتين وإلا الباكستانية اللي لاجاء واحدهم بيسافر حمل طعشر ليموزين

وتوجه للمطار العجيب أن عائلة أبو غانم مازالوا يعتقدون أن المطار مازال

في نهاية طريق الملك عبدالعزيز في الملز (مطار الرياض سابقاً) لأن ابعد

ماوصلوا له سوق عتيقة وحلة القصمان...

وذيك الصبحية جاء أبو سالم على سيارته أمبالااا خضراء (معطيها أيّاه واحد

من الشيوخ في التسعينات هجرية) ومازال محافظاً عليها لدرجة مركب لها

دبل مساعدات لدرجة قفا السيارة مرتفع كأنه تقول شتني...

ودق أبوسالم الباب (الساعة ثمانية صباحاً) وينتبه له أبو غانم ويقلطه في

في الروشن (مجلس علوي للضيوف الشخصيات) وتصلح القهوه والشاهي

وينشده أبوغانم مفطّر قال أجل تحسبني مثلك مصفّر لهالحزه (التصفير نوم

الضحى)مساكييييييين مايدرون بشئ ولالهم دخل في الدنيا مايدرون أن

الناس مايصحون إلا الساعة ثنتين الظهر...

المهم وأبو غانم يصب القهوه من ذيك الرسلانيه اللي جنوبها مسوده من

الحطب وريحة الهيل تفوح منها مع ذيك التميرات نبوت سيف ويقول أقدع

ياأبو سالم وابو سالم يعدل جلسته على المركا ويدف نظاراته البشاوريه

ويقول أيه والله ياأبو غانم تصدق أني مبطّي من القهوة من عقب صلاة

الفجر ماشربتها...

ويقاطعه أبو غانم ياجعلها مداهيل العافية...

والحديث هنا لأبو سالم أسمع ياأبو غانم لقيت لك وظيفة عند معالي الوزير

الجديد اللي من أشد المناهضين للسعوده خصوصاً في مثل وظيفتك اللي

جايب لك عسى الله ييسرها لك...

ويتبسم أبو غانم وتغدي كشرته البنيه كنّها بادية غضّار حمراء على أصفر

فيها مرقوق (عاد هذي أشرحيها ياأم مالك)....

ويستطرد ابو سالم ومثل هذي الوظايف من تغسيل سيارات وخياطه

وحلاقين (الله من الفراغ يامعاهد عبداللطيف جميل هذا اللي ناقص البلد من

صناعات) هي مايدعمه معالي الوزير أما بالنسبة للوظايف الثانيه ذيك عاد

للمتعاقدين لأنهم جايين من ديارهم متعلمين وحنّا ماعندنا مباني نعلم فيها

السعوديين وندربهم يامعظم المدارس والمراكز الصحية أجااااااااااااار الله

بس يعظم أجرنا...

عاد هالله الله لاتفشلني تروح للملز وتخليهم يسوون لك سيرة ذاتيه وتحط

لك صويرة زينه فيها...

أبو غانم : سيرة ذاتيه وشهي ووش بأشتغل؟؟؟؟

أبو سالم : بتشتغل قهوجي عند معاليه عاد أنا أخبر قهوتك مامثلها...

أبو غانم : مبتسم طيب وشهي الأوله؟؟؟

أبو سالم : هذي وريقه تكتب فيها مؤهلاتك وش عندك من شهايد...

أبو غانم : قصدك ملف علاقي أخضر؟؟؟؟

أبو سالم : لايا أبن الحلال ذاك أول...

أبو غانم : أجل وشهو؟؟؟

أبو سالم : هذي ورقية بيعلمونك عنها في الملز مكاتب خدمات الطالب

ويسوونها لك بخمسين ريال بس...

أبو غانم : طيب وين أجيب خمسين منه؟؟؟

أبو سالم : لين استلمت الشووونه (الضمان الإجتماعي) سوّها ولاتنسى

تصور!!!؟

أبو غانم : خاف تروح علي الوظيفه يأخذونها أهل هالواسطات...

أبو سالم : أفااااا عليك بس وأنا وين رحت تحسبني سهل أنا لي خمسه

وثلاثين سنه مراسل على بند مأجور الله يجيرك من النار ولي كلمتي

عندهم وبعدين إن شاء الله لين توظفت عند معالية سنع عمرك عشان

توظف غانم عند الوكيل ثماً تزوجه...

أبو غانم : أيييييييييييييه والله كانه شاقاً بي أنا وأمه مع ذا الحمام ودّه يعرس،

طيب تكفا أكتب لي أسمها في وريقه عشان ماأنساها...

ويكتب أبو سالم أسمها السيرة الذاتية ونهاية الشهر يروح أبو غانم لابساً

البشت وملابس العيد على خط البلدة (توبيسات أبو ريالين) للبطحاء يصور

بالبشت والكشخه ويصرف الشووونه (الضمان الإجتماعي) من الغرابي

ويركب للملز ويجيك مشي لمكاتب الخدمات ويعطيهم الصور وملفه العلاقي

الأخيضر (من الشموس قلب أشهب)...

ويسوون له السيرة الذاتيه اللي كانت مكتوبة في وريقة ويحطون الصورة

فيها ويطبعونها له ثلاث نسخ...

المهم ويأخذها ويروح للوزارة ويوصل لين مكتب الوزير ويعطيها ذاك

الشاب اللي شايفاً نفيسته وقال له أنا من طرف ابو سالم...

المهم ويطالعها ويهز رأسه خلاص خلّها وتلقى العلم عند أبو سالم...

ويروح الضعيف يسحب رجيلاتها مبسوووط بما أنجزه لهذا اليوم...

وهو في درب الرجعه مر على الخياطين وفصّل له ثويبين وشرا غتره

وشماغ ونعيلات زبيرية (حاشاكم) خلاص بيودع العطالة...

وبعد أسبوع يدخلها السكرتير على معالي الوزير...

ويطالعها معالي الوزير وينفجر من الضحك لين طلعت كريشته على الطاولة

وهو يقول من زين الطبايع هالوجه الودر مصور ببشت ذا يبيني أنا اللي

اصبّ له القهوة ماهوب هو اللي يصبّها لي ويصفط السيرة في مخباته ويقول

خلني أوريها باقي أصحاب المعالي الوزراء وشلون هالرعاع مستهترين ذا

مقدمعلى وظيفة معالي وزيرماهوب قهوجي....

وينادي ذاك البنغالي اللي ملبسه ثوب ومسعوده ويقول صب القهوّة ياولد....

والسلام عليكم ورحمة الله وبركاته،،،

**شيخ النظر** · June 28th, 2009, 07:50

بسم الله الرحمن الرحيم

السلام عليكم ورحمة الله وبركاته،،،

يومية إنسان

ياصباح الأضداد...

وجهآ متبسم وعبوس

والزمن لوجاد

عطى الأجواد بدبوس

سبحان مقسم الأرزاق

هذا مقبل

وهذا في فراق

هذا محظوظ

وهذا منحوس

ناس وناس

ركض وجلوس

أمل يذبحونه ياس

يومية إنسان

روتين خالي من الجديد

غيرها يافلان

ماوقفت عليك بالتحديد

كأنك لحالك تبيد

في هذا الزمان

أصبح كل شيئ معكوس

السعادة...

تقاس في النفوس

حسب ماتملك من الفلوس

من الدنيا صباحات

وين صباحك منها

تتعب النظر مسافات

من تصبح وأنت تلعنها

تغدي وتروح سيارات

كلآ في خاطره غايه

شوارع وزحمات

وشكوى في النهايه

ليه تبقى الغايات

سجينة في جبروت إنسان

رغم أن الإنسان

يحتاج الإنسان

يبقى الطغيان

حاكم للإنسان

بأسم الحريه

الرق والخذلان

من الصباح جنان

وفي الظهر

من الحر طفشان

آه يالقهر

جوعان

وفي الليل

دايخ ونعسان

وراحة البال

ولافي البال

ياردى الحال

مسكين هالإنسان

ياصباح الملبوس المنكوس

السعادة...

تقاس في النفوس

حسب ماتملك من الفلوس

الحياة ثلثها نوم

وثلثها عمل

والثلث الثالث هموم

طيب أيش العمل؟

هالآدمي خبل

يقاوم الفشل بالفشل

والأمل...

فاتح يديه

تعال خذ اللي تبيه

ويرفض بعناد

وأن زاد الأمل

في عناده زاد

قمع في نفسه

وأضطهاد

يابوي فلها...

ربك بيحلها...

والحزن

وحدك تحسه

منغبن؟؟؟

في نفسك تدسه

والتبن

وحدك تأكله

كل هالناس ولاسأله

يالله بس تبسم...

أيوه أيوه...

شكلك كذا أوسم...

أبعد عنك الهجوس

وألعن أبليس اليؤوس

والسعادة...

لوتقاس في النفوس

حسب ماتملك من الفلوس

تبقى الحياة دروس...

ياتدوس...

على الهم...!

وإلا ياعم...

تراه عليك بيدوس...

السعادة...

تقاس في النفوس

حسب ماتملك من الفلوس

والسلام عليكم ورحمة الله وبركاته،،،

**شيخ النظر** · June 28th, 2009, 07:58

بسم الله الرحمن الرحيم

السلام عليكم ورحمة الله وبركاته،،،

سعودي المستهتر

فيه عزيمة بنااااات يوم الخميس الجاي والبارح غالية وجميلة مسويّن

إضراب عن الأكل والشرب يبون أسواق العليا وخصوصاً مركز النمر أحد

لاعب في روسهم في المدرسة ويقولون فيه عندهم أشياء خيااااااااااااااااالية

والصدق أنا ماأدري وينه فيه؟؟؟

قمت خذتهم والعائلة الكريمة حفظها الله لسوق سويقه عند قصر المصمك

اللي متأكد معظم الناس مايدري وينه ولاشافوه إلا في الصور (أصبر لين

أخلص وبعدين أطلع دوّره ياحرصكم ياهالناس)...

المهم ونزلتهم ورحت أوقف السيارة في مواقف شلّقا مقابل سويقه اللي

صارت حجز للمرور لأني وين ماوقفت ألآقيها فيها وغرامة 300 ريال

وأستلم سيارتك بس صاروا يعرفوني فدخلوني ببلاااااش...

واجيك مدرعم قاطع الشارع بثوبي الكويتي وغترتي الزبيراويه اللي عليها

تطريز بنفس اللون وطاقيتي الشاخول (المخرّمه) ومنسف بنت البكّار

(تشخيصت الأولين)...

ياولد السوق مكتوب عليه أقل من ألف على شوي خلاقيين مافيه وأنواع

تزوير الماركات (ياحليلكم يالمواصفات والمقاييس (شهادة منشئ))...

المهم مرينا كل شئ بعشرة وكل شئ بخمسة كلها خلاقيين يعني من بنلبس

له وإذا على الماركة أنا أطبع لهم أستيكرات أحلا الماركات ولزق على

الملابس يعني من بيطّل من داخل!!!؟؟؟؟

وبميئتين ريال حملنا صندوق الونيت...

المهم قلت أنتظروني بأجيب السيارة وأجي أركبكم وراح نمر يجيب مويه

عشان تبريدت السبد...

وآخذ الونيت وأوصل قبل نمر وأرفس في هالليموزينات لين قدرت أقرب

جنب الرصيف وهم يركبون يجيني ذاك العسكري ويمسكني من كتفي اليسار

هات الرخصه والإستمارة وأطالع فيه قلت أكيد ذا واحد من الجماعة ليني

والله ماأعرفة بس ريحته خليط من السنان والدخان (حاشاكم)...

قلت وخر يدك جعلها الشلل لا وبعد قدام عيالي ماتحرم وجود عايلة ويبعد

يده وقال يالله تحرك بسرعة قلت مخلي كل هالليمزينات ومتسلط علي

وبعدين تراني ماني سعودي وكفيلي أمير وبيربيك أيها الوغد فقال

هههههاي قلت وين في المسنجر قال واضح من كشرتك وسيارتك أنك

سعودي وبعدين أكياس ابو خمسة وعشرة مايشتري منها إلا أشكالكم يالله

تحرك لاأحجز لك السيارة ولين هذا نمر جاب المويه وركب وأنا أغدو في

حال سبيلي...

وبمجرد ماطلعت على طريق الملك فهد لين راعي ذا الكابرس عسكري أمن

عام ماسك الجوال ويسولف ومعطل السير(مخالفة الجوال لي ولأشكالي)

وأكبّس له ولاهو يمي وأسقط عليه من اليمين ومادريت إلا ويلحقني

ويحدني ويلعن ويتفل (حاشاكم) ويبي يوقفني لين وراي سيارة مرور يكبس

واقوم أحدّه وقلت هذا المستهتر لابد يعاقب قال ياخي مجنون وش تبيني

أسوي له (ياحليلي رضيت وقلت صادق)....

والسلام عليكم ورحمة الله وبركاته،،،

**شيخ النظر** · June 28th, 2009, 07:59

بسم الله الرحمن الرحيم

السلام عليكم ورحمة الله وبركاته،،،

تعليم أبنائي

جميلة تدرس البرهي...

جميلة :

درسا...

زرعا...

حصدا...

البرهي :

حرسا...

نزعا...

قصدا...

البرهي : يووووووه وش ذا يباااااااااااااااااااااه ترى جميلة ماتعرف

تدرسني...

جميلة : الكذااااااااااااااااااااب يقرى بالغلط ويورطني معه!!!!

شيخ : ياعيالي كلكم صح أول كان فيه دراسه وبعدين وظيفة بالتالي الواحد يزرع

أرض الوطن فيحصد الأجيال القادمة مازرع من خيرات...

أما اليوم فقط حراس أمن برواتب مغريه 1200 ريال غير البدلات...
ولايوجد غير سرقات ونزع للبركة من كل مكان في هذه الأرض الطاهرة...

وكثر عندنا الشعر وقنوات الشعر وخصوصاً شعر الشحاذة...

والسلام عليكم ورحمة الله وبركاته،،،

**شيخ النظر** · June 28th, 2009, 08:01

بسم الله الرحمن الرحيم

السلام عليكم ورحمة الله وبركاته،،،

مقاطعة للآخر...

أستكملاً لمداخلتي في موضوع (المقاطعة السنية للمنتوجات الرافضية) للكاتب دايم الجرح وهو عبارة عن إيميل أرسلته لجميع

المضافين لدي نظراً لكثرة الإيميلات التحذيرية التي تصلني...

أولا: المقاطعة:

قاطع المنتجات الأمريكية لأنها تدعم اسرائيل...

قاطع المنتجات البريطانية لأنها تدعم أمريكا...

قاطع المنتجات الدينامركية عشان الكاريكاتير...

قاطع المنتجات الهولندية عشان الفلم...

قاطع المنتجات الألمانية لأنها جنب الدول السابق ذكرها...

قاطع المنتجات الرافضية لأنها تخدم المد الشيعي وأيران...

و بالنهاية كل الناس يرسلون الايمالات لبعض من لاب توب كل البرامج اللي

فيه أمريكية، و هم قاعدين في ستاربكس بعد ما اتعشوا في كنتاكي و معاهم

"تيك أوي" من ماكدونلدز.

والتجار الوطنين بلا رحمة يرفعون علينا الأسعار بلا رقيب أو حسيب!!!!؟

ثانيا: الصحة:

لا تشرب بيبسي لأنه يحتوي على مواد تنظيف و عصارة خنزير.

لا تشرب ريد بول لأنه يسبب عقم..

لا تستعمل مزيل العرق و لاالشامبو و لا الصابون لأنه يسبب سرطان.

لا تأكل لحم البقر لأنه يسبب جنون البقر.

لا تأكل دجاج بسبب انفلونزا الطيور

لا تأكل سمك بسبب المد الأحمر

لا تأكر خضار و لا فواكه لأنها كلها هرمونات

لا تشرب ماء لأنه معالج بالكلور

لا تأكل معلبات لأنها تحتوي على مواد حافظة

لا تشرب عصير طبيعي لأنه يأتي على شكل عصارة مركزة

لا تشرب عصير غير طبيعي لأنه كله ألوان

طيب يعني آكل هوا؟!!! ..... لأ طبعا لأنه الهوا ملوث بعوادم السيارات و
المصانع.

و اذا خالفت النواهي السابقة كلها، دخلنا على العادات:

لا تشرب ماء بعد الأكل.

لا تنام و لا تمشي و لا تقعد بعد الأكل.

لا تشرب شاي و لا قهوة بعد الأكل

أحسن شي .... انك تأكل و تنتحر!!!!!!

لا تخلي الماء في الثلاجة داخل علب بلاستك لأنه مسرطنة

و لا تخليه في زجاج لأنه ممكن ينكسر بدون ما تعرف و تشربه و تموت.

و لا تخلية برا الثلاجة لأنه ممكن يتلوث.

و لا تشرب من البزبوز لأنها مش نظيفة

و لا تشرب موية صحة لأنها معبئة من الحنفية أو مكررة و فيها مواد
مسرطنة.

لا تتكلم في الجوال بدون سماعة عشان الموجات تقتل خلايا المخ

و لا تتكلم عن طريق السماعة عشان الكهربا الساكنة

و لا تتكلم عن طريق البلوتوث عشان الموجات برضوه تقتل خلايا المخ.

(يعني كل العالم الي عايشين هالأيام عايشين بدون مخ)

لا تخلي الهوا يدور في السيارة لما تشغل التكييف لأنه يتلوث من التنفس.

و لا تخلي الهوا يجي من برا لأنه ملوث.

لا تعبي بنزين الصبح عشان الكثافة عالية

و لا تعبي في الليل عشان الكثافة واطية

و اشرب خل عشان يحرق الدهون .... و لا تشرب خل عشان يسبب قرحة

و اطلع في الشمس عشان فيتامين "د" .... و لا تطلع في الشمس عشان

الأوزون.

ثالثا: الدين:

ابعث هذا الايميل لجميع من عندك الله يعطيك 999999999 حسنة .... (لأنه

الي مرسل الايميل مكشوف عنه الحجاب)

و يجيلك ايميل مكتوب في أولة قسم انك تبعث الايميل لكل الي تعرفهم و بعدين

يقعد يذكرك انك أقسمت.

(ماسك عليك ممسك)

و ايميل فيه الجملة الحلوة اللطيفة (اذا لم تبعث الايميل فانت لا تستحق أجره)

و ايميل يقولك أحاديث كاذبة و اذا ما بعثتها فأنت مقصر

و ايميل يقولك "دعاء مرة واحدة في العمر" (يعني ادعية و أفجر!!!!)

و ايميل يقولك "دعاء هز عرش الرحمن"

و ايميل يقولك "دعاء من دعاه حققت له 100 أمنية" (مصباح سحري مش

دعاء!!!!)

و بعدين فتوى الرضاعة

و فتوى تحريم "البوكيمون"

و فتوى تحريم "البلايستيشن"

و أحلا فتوى فيهم ............ فتوى قتل "ميكي ماوس" وكف البحث عن فضولي...

يعني أحسن حل .... انه الواحد لا ياكل و لا يشرب و لا يتنفس و لا يتكلم على

التلفون و لا يطلع من البيت و بس يقعد يرسل ايميلات ....

ملاحظة: اذا أرسلت إيميل لي راح يطلعلك جني سويسري

راكب بنتلي، و اذا ما بعثته راح أطلعلك أنا كل يوم في المنام و اقولك "ليش

ليش ليش ليش تحرمني من جديدك" للصبح...

من المروج ومن المستفيد ومن ومن؟؟؟؟

لايوجد إجابة صالحه للنشر...

وهذه مقالة أعجبتني من موقع أنباؤكم لعلها تثري الموضوع...

منذ فترة ليست بالقصيرة ونحن نشعر بأن الصراع الخفي بين التجار والمستهلكين للسلع المنتجة محلياً والمستوردة بدأ يبرز بشكل واضح مع تجاهل

الجهة المختصة ( وزارة التجارة والصناعة) لدورها التنظيمي والرقابي على الأنشطة التجارية للوصول لقيمة عادلة لسعر المنتج سواء للتاجر او

المستهلك! فتجاهل ذلك الصراع تسبب في بروز تنظيمات غير رسمية في عدد من الأنشطة تمثلت في وجود تكتلات للتجار يقابلها حملات شعبية

للمقاطعة! ليتحول الوضع ل"حرب تجارية" بين تجار النشاط والمستهلكين! ولتمارس خلالها كل الأسلحة بما فيها الإعلامية ولكن كلا حسب إمكانياته!

ومع استمرار الوضع الغير صحي في النشاط التجاري نتساءل: لماذا ظهرت حملات المقاطعة التي أقلقت المسئولين والتجار؟ وهل صمت وزارة التجارة

عن تكتل التجار وقراراتهم الموحدة دور في ذلك؟ أم أن صراع التجار والمستهلكين يمثل احد أشكال المنافسة التي نطمح لها!

إن عدم فهم جهاتنا المختصة للمفهوم الصحيح لرعاية الدولة لمؤسسات القطاع الخاص والتفريق بين مفهوم الرعاية والاحتكار تسبب في دخول تلك

المؤسسات في صراع كبير مع المستفيدين من خدماتها، فالواضح أن كل جهة حكومية تهتم بالمؤسسات التابعة لها وتراعي مصالحها، فمؤسسة النقد

تدعم البنوك! ووزارة الزراعة ترعى الشركات الزراعية مصانع الألبان ووزارة الحج تهتم بمؤسسات الحج والعمرة... وهكذا، ولكن في وزارة التجارة

سنجد أنها يجب أن تهتم بمصالح التجار والمستهلكين على حد سواء، ومن هنا فعندما خاض منتجو الألبان حرب أسعار قبل سنوات، سارعت وزارة

الزراعة لتكوين تكتل لمنع انهيار ذلك النشاط خوفا من أن يترتب على ذلك خروج لصغار المنتجين واحتكار شركات محدودة لذلك النشاط! فتم النجاح

في إيقاف حرب الأسعار حينها ولكن هذا التكتل ادخل فكر جديد لمعظم الأنشطة الاقتصادية، ولتبرز لدينا تكتلات كبرى للتجار تتخذ قرارات جماعية

وتنفذها في ظل صمت الجهة المختصة بمحاربة الاحتكار! فقد شاهدنا ماقام به تكتل منتجي الألبان قبل عامين عندما قرروا في يوم واحد رفع الأسعار

وتخفيض الكميات لمنتجات الألبان والعصائر وليتم تحييد وزارة التجارة بالتبرير بارتفاع تكلفة الإنتاج! ولكن هل قامت وزارة التجارة بالتحقق من

صحة تلك التبريرات؟ اعتقد أن نتائج شركات الألبان خلال عام 2008م تثبت بأنها نجحت في رفع أرباحها بنسب عالية لاتتحقق في أي دولة واعتبارا

من الربع الأول الذي شهد رفع الأسعار وتخفيض الكميات! هنا هل نلوم باقي تجار الأنشطة الأخرى على التكتل لخدمة مصالحهم؟ فهم يرون نتائج

شركات الألبان وردة فعل الجهات الرسمية، فالاحتكار لدينا لم يأتي من شركة او شركتين وإنما من مجموعة مسيطرة على كامل النشاط والمؤسف هو

المجاهرة بالتكتل بان تكون بياناتهم من هيئات رسمية!

أما في الجانب الآخر فان ثقافة المقاطعة للمنتجات التي انتشرت بمجتمعاتنا برزت في البداية لأسباب تتعلق بمشاعر الشعوب الدينية والعاطفية مثل

مقاطعة السلع والمنتجات الدنمركية والأمريكية..، والتي دعمت واستغلت إعلاميا من تجارنا ومصانعنا وتمت الاستفادة منها في بيع سلعهم البديلة

للسلع المقاطعة حتى ولو بأسعار أعلى! ولكن بسبب ردة فعل المستهلكين على لجوء التجار الى ثقافة التكتل في تسيير أعمالهم التجارية اختلف الوضع

تماما، فحماية المستهلك لم تفعل ووزارة التجارة لم تهتم في منع تلك التكتلات والاحتكار الذي استفحل مؤخرا واتخذ أشكالاً جديدة فالمستهلكون لم

يقبلوا ذلك التكتل وعبروا عن ذلك بحملات المقاطعة ، فسعى التجار الى إنهائها ومطالبة الجهات الرسمية بتعقب من يقودها في الوقت الذي يمارس فيه

تجارنا نفس الفكر بالتنظيم المخالف والغير رسمي!

إن سوء التقدير لخطورة تلك التنظيمات (تكتل التجار والمستهلكين) سيهدم أساسيات التجارة الحرة وسيلحق الضرر بمصلحة كل من التاجر

والمستهلك، فالتاجر هو بالتأكيد مستهلك لسلعة أخرى، وأي تجاوزات من بعض المواطنين أثناء التعبير عن الرفض لتكتلات التجار ستسيء للجميع،

والملاحظ مؤخرا هو ارتفاع حدة الصراع ووصوله الى التهديد بفصل الموظفين للضغط لتمرير المطالب! والذي يمثل احد أشكال استعراض القوة بسبب

عدم قيام وزارة التجارة بدورها الرقابي! فتجاهل التحقق من صحة مايدعيه التجار من إيضاحات عن مبررات الأسعار سيؤدي الى لجوء المستهلكين

الى قنوات غير رسمية! فوزارة التجارة مطالبة أولا بسرعة منع تكتلات التجار التي تسببت في بروز حملات المقاطعة، كما يجب أن تسرع بتفعيل

جمعية حماية المستهلك التي يجب عليها أيضا أن تفتح قناة اتصال مع المواطنين( موقع الكتروني مثلا) لتلقى الشكاوي والمرئيات! ففي ظل الوضع

الغامض عن حقيقة مايحدث في بعض الأنشطة وعدم استفادتنا من انخفاض الأسعار العالمية لبعض السلع سيستمر الصراع وبدون تدارك ذلك ستبرز

أساليب جديدة قد يتضرر منها الجميع، ولكنني أخشى أن يكون التدخل متأخرا!

وتقبلوا فائق تحياتي مسلم عربي سعودي محب لله ولرسوله صلى الله عليه وسلم ولاأحب أن أغفل من قبل الآخرين...

والسلام عليكم ورحمة الله وبركاته،،،

**شيخ النظر** · June 28th, 2009, 08:03

بسم الله الرحمن الرحيم

السلام عليكم ورحمة الله وبركاته،،،

دوامي تغير

تصبحون على خير بكرة أول يوم دواااااام صباحي والله يعين على زحمات

الرياض وقلة أدب التريلات مع أحفادهم السيارة الصغيرة وتيتي تيتي مثل

مارحتي نشبتي في الزحمه ولاجيتي....

وبعدين تراني أقلقت البشر في هالساحات وين القراء وين الناس وإلا البنوك

أيام الإكتتابات أحسن مني...!؟؟؟

حسسوني بصوت قاعد في هالمتصفحة أسرح وأمرح ولاأحد يمي يقول

أبو جاسم الله يصلحه جنّه بدون ناس تعتبر خارج التغطيه ماتنداس...

وشلون أنهي الموضوووووع وشلووووون ياربيييييييه أيه عرفت أرعص

على الزر الأحمر...

توت توت توت توت توت توت ماهوب توته الله يصلحها مع السلامات...

والسلام عليكم ورحمة الله وبركاته،،،