يوميات شيخ النظر

**شيخ النظر** · June 27th, 2009, 15:11

بسم الله الرحمن الرحيم

السلام عليكم ورحمة الله وبركاته،،،

العلاج

مستشفيات وصيدليات للسعوديين وآخرى للأجانب...

ماأجمل أن نرى دويلات داخل دوله وأنظمة على السعوديين لاتطبق على

غيرهم من الفائديين...

بعد صلاة الجمعة أمس صابني صداع وأنا في السيارة وبماأني لاأحب أكل

العلاجات فلا أحب وضعها معي في السيارة المهم وأوقف في حارتنا عند

صيدلية مليانه (حاشاكم) حفايظ وأنواع الحليب وخرابيط تلقاها في

السوبرماركت وخمسة أنواع علاج من أغلى شئ وأطلب منه حبتين

بندول فأستغرب وهو مطير عيونه فيني...

فجلست أتلفت وراي قلت يمكن مطير عيونه في أحد فقال بسخافة

المصريين أيه يابني داخل بئاله قلتأولاً أبلع ريقك لاتطيح عيونك وأناداخل

أكبر صيدلية في مصر ياواطي ياأجرب وش تعرفني عشان تستظرف

وهم كذا إذا شديت عليهم أرتخوا قلت فيه وإلا لا؟؟؟

قال لا أحنا مانبعش إلا بالعلبه!!!!؟؟؟

ولين فيه شاب أربعيني سعودي قاعد يمترني بعيونه كنه بيفصل لي ثوب

العيد قلت سلامات يالحبيب وش عندك تطالع قال لا بس مستغرب أن

فيييييييه ناس تسأل عن بيع بالحبه في الصيدليه ماعندك تشتري علبة

شريتها لك (عاد أنا أستمخخخ وأنبسط على هالأشكال اللي علمه بالدنيا

التفتيش على طريق الخرج)...

قلت له معك وإلا بتتسلفها وإلا بتروح تجيب من البيت ؟؟؟

إذا عندك دراهم وحاب تفزع أيه والله تصدق علي بألفين ريال؟؟؟

عادي عادي ألحقك للصراف وإلا للبيت!!!؟

من شافك أنت ووجهك لابس قميص البيت (مغربي) ومبينه أباطك من

ورى هالفنيله المشقوقه قال ذا جاي يشحذ في الصيدليه ماهو جاي

يشتري...!!!

لمعلوميتك الواقف قدامك وملبسينه حماية البيئه جكيت أبيض تراه هنا

عندنا بس وإلا في ديرته ييبيع في أطلق صيدليه بالحبه وأثناء أنتشار

الفيروسات يبيعون الأدويه المشروبه بالملعقه والحين مسوي لي هنا فيها

دكتور والله مايعرف إلا عشرة أنواع ومغيبهم والباقي حفايظ (حاشاكم)

وحليب وبودرة وشمبو...

المهم وسحب قميصه على تحت ودف النظارة على ورى وقال ياأخي هذا

أنظمتهم في بلدهم بينما أحناااااا في هالبلد كذا نظامنا ويؤيد كلامه الصيدلي

ويطلع لي ورقه تعميم كنه ورقة شحااااذ وبصراحه أفحموووووني....

ولاشريت البنادول وأستمريت في طريقي متجه لأحد المكاتب اللي بأشتغل

لهم معقب في البطحاء وأقابل مهندس هندي صديق ويلززززم علي نتغدى

سوى المهم ورحت معه لمطعم كل اللي فيه يحكووون ماأدري من اللي

يسمع (هز روس وككرورغم) المهم ويطلب أكلات هنديه دجاج تكا ولحم

بالرز برياني ومرق وبطاطس والحساب لنا الأثنين مع عصير برتقال

كبس (22 ريال بيجيك واحد يقول عشانه أكل هنود رخيص أقوله رح

للتحليه وشف كم تحاسب أنت وزوجتك على غير نكهه ولاطعم في المطعم

الهندي) وأفتح معه سالفة صداعي وتعبي وعرض علي نروح لأحد

المستوصفات المنتشره في البطحاء لين مراجع في مستشفى كبير قالوا لي

بعد مامصوا دمي وفلوسي فيك الشقيقه (Migraine)

وعطوني بخاخ كنه سياراة الفليت (حاشاكم) بصراحه خفت أستخدمه...

قلت شوف ترى مامعي إلا مئتين ريال قال ليه بتسوي عملية
جراحيه!!!!!!!!!!؟؟؟

قلت في نفسي يستهبل علي وإلا وش القصة قلت يعني تكفي قال وزيادة!؟

قلت نروح ونشوف...

المهم والله يشهد بدون مبالغه دخلنا ذاك المستوصف اللي أتمنى وزارة

الصحه تأخذه معيار للنظافة والترتيب وذيك الوجيه المبتسمة والروائح

الزكيه من الديتول وغيره والحمامات (حاشاكم) نظافه ومناديل وأنواع

الصابون السائل والبودرة وعامل مخصوص لها بصراحه طارت

عيوني...

المهم على الإستقبال ستة موظفين بينهم حرمتين كلهم من الجنسيه الهنديه

وأبتساماتهم على وجيهم (كأنهم قراء يوميات شيخ النظر (مآخذ في نفسه

مقلب)) أتوماتيك للمرأة تتقدم لخدمتها مرأة والرجل رجل وبكل أدب نعم

سيدي قلت أعاني من صداع وأبي دكتور العيون فقال أستشاري وإلا عام

قلت بكم هذا وبكم هذا قال العام بعشرة ريال والإستشاري خمسطعشر

ريال قلت غالي قال عندنا خطة نرخص لإثناء عشر ريال لأن المنافسة

مشتده بينا والآخرين بس نتميز عنهم بتوافر جميع أنواع الإستشاريين

المهم وأقطع تذكرة مراجعه لإستشارية العيون لين ذاك الوجه الباسم

ومعها ثنتين ممرضات ولما عطيتها معاناتي وأنخفاض النظر عندي

حطتني قدام كاشف النظر وبدأت تضغط على حواجر عيوني وعلى جبيني

وكان الألم يزداد مع الضغط ثم كتبت لي تحويل لأستشاري الأنف والأذن

والحنجرة والتحويل من دكتور إلى دكتور مجاني فلما تكلمت معاه لأنها

رافقتني له تفحص وجهي وعلى جوانب خشمي ومباشرة أعطاني تذكرة

لعمل أشعة للوجه وأروح للصندوق وأدفع عشرين ريال قيمة الأشعة

ويسوون لي أشعه لينها كبر جوالي صغيره وكان مبين فيه زي الدوائر

حول العين والأنف وقال لي أنت مشكلتك بسيطة قلت وش فيني!؟

قال عندك أحتقان في الجيوب الأنفيه هو اللي مسبب لك الصداع طيب

والحل قال عشرة أيام لاتأكل لحوم حمراء ولاتشرب ماء بارد وتأخذ هذا

العلاج لمدة ثلاثة أيام وتمرني بعد عشرة أيام...

المهم نزلت الصيدلية (عامه) وأعطيه الوصفه وأشوفه يفكك من العلب

ويقص ويعد ثلاث حبات وست وتسع حبات ويقوم ويحطها في أكياس

صغيرة ويقسم لي الشراب في قاروره صغيره ويكبسها من جديد وقال هذا

حبه كل يوم وهذا حبتين في اليوم وهذا ثلاث حبات في اليوم والشراب

تشرب خمسه ملل في اليوم وكم الحساب 17 ريال يعني مجموع ماخسرته

52 ريال قيمة الدخول لطبيب عام في مستوصفاتنا في الحواري لدرجة

من أستهتارهم فينا هاللصوص ، السعوديه ارخصوها وهانوا عملتها مع

العلم أن التقبيل في البطحاء والإيجارات توصل لأرقام فلكية والفارق بين

البطحاء وغيرها أن الزبون غير سعودي إذا مامشيت على مزاجه عطاك

ظهره ومشى ويعلم جميع بني جنسه...

واللي غيره يبي يبيع لو بنص وربع حبة البنادول ...

وعلى فكرة صيدليات البطحاء تتنافس بإحضار مجموعة مختلفة

من العلاج الواحد كي تتباين الأسعار والعجيب الغريب عندهم تعميم من

وزارة الصحة بأحيقة البيع القطاعي أو بالحبة ولاهم مهتمين بالحفايظ

(حاشاكم) والشامبوهات بقدر ماهم يبعون ماتعنية الصيدلية وهي الأدوية...

وهذا أنا ولله الحمد في ثاني يوم وضعي تحسن بنسبة 80 % وراحت

فلوسك يالمواطن على علاجات ومستوصفات وصيدليات السعوديين التي

لاتبيع إلا بالكرتون والعلبة والباقي أقرب زبالة (وأنتم بكرامة) أرم فلوسك

قصدي الزايد من العلاج...

والسلام عليكم ورحمة الله وبركاته،،،

**شيخ النظر** · June 27th, 2009, 15:16

بسم الله الرحمن الرحيم

السلام عليكم ورحمة الله وبركاته،،،

500

كانت في جيبي...

ساتره عيبي...

رازها قدام...

عليها مغاط...

وطقطق...

من زود الأحتياط

مشتق...

ورابطها برباط...

من الخيوط القدام...

ومخيط الجيب عليها...

وكل دقيقه أتحسس وألآقيها...

وفي مره...

ياقردها من مره...

أضطريت...

وأنحديت...

على صرفها...

ومن طلعت من مخباي...

وأنا أمشي خلفها...

لين راحت بلياي...

ودموعي تقطعني...

راحت الخمسمية...

المكينه تقول ميه طعني...

ولاطعتها مولية...

من فكيتها...

مالقيتها...

كانت بيديه...

وتبخرت يعني...!!!؟

نصيحه ياسامعني...

أياك تسحب خمسمية...

والسلام عليكم ورحمة الله وبركاته،،،

**شيخ النظر** · June 27th, 2009, 15:17

بسم الله الرحمن الرحيم

السلام عليكم ورحمة الله وبركاته،،،

المقاضي...

أم نمر تكتب قرطاسة المقاضي...

سحارة طماط (وأنتبه تنسى تقّلبه وتشوف علوووه وأسفله لايضحكون

عليك زي المره اللي راحت ويعطونك مفغص)

صنيديق خيار (اللي لين كسرت حبته يطلع منها مويه وتجيك الحبه زينه

ونظره كنها وحده بتروح لعرس )

خيشة بصل أحمر(شمممممه زين وقلّبه حبه حبّه ولو بغى يخيرك أختر من

اللي في الظل ولاتنسى تشممممه)

كثر كيذيا بيدجان (اليدين مبسوطتين مضموتين لبعضهما) (تأكد لايكون

مسري وفيه دود وناظر طاقيتة الخضراء أن لقيت فيها سواد تراه مخيس

لاتأخذه وأنتبه تجيب ضاك الأبيض اللي كنه أبرص)

محفّرة كوسه (ألا ياعارفينها) (وتأكد زين لاتكون مرطبه كنها تكرونيه

حاطتن لابيلو) إذا جتك حرشا فهذي الزينه خذها...

وجب معك زبيل بطاطس وأكتب قيمته بلحاله عشان أم فهد تبي نصه بس

تقول يتأكد أنه ينفع للقلي والطبخ وأن حق مزارع حايل ويقلّبه لايكون

ظاهره كبار وباطنه صغار....

علوب حباحر حق عريفجان اللي يبخر المخ لاتنسى تذوقه...

ملي طاقيتك فاصوليا جرب أكسرها لين تشوف الثمره كبيره...

ولاتنسى الخضره...

بردوق صندقان أبو صررررررررة

وملي سجّك تفيفيحات ولاتكثر موز تراه يجيب الحساسية.....

وخمس دجاجات بلدي خله يذبحهم قدامك ويعطيك القوانص والسبد في كيسه

بلحالهم عشان نمفطر عليهم الخميس الجاي...

18 بيضه عشان لك واحد من عيالك ثنتين ولي ولك على ثنتين وثنتين

بنصلح بهم كيكه...

وأنتبه تضيع الصرف صك عليه بيديتك ولاتعطي البنقالي اللي يوصلها لك

للسياره شئ (البخشيش أو التيب عادة سيئه ودخيله على مجتمعنا وللأسف

لاتجد من يستنكرها)....

(ومع حكة رأسسسسس) وش بعد وش بعد ياأم نمر!؟؟؟

شفني بأكتبها لك في ورقه وعشان ماتضيع بأرسلها لك وسايط وعن

لاينسرق الجوال بأرسلها على إيميلك بس أياني وأياك تنسى شئ ماتجي به.....

والسلام عليكم ورحمة الله وبركاته،،،

**شيخ النظر** · June 27th, 2009, 16:01

بسم الله الرحمن الرحيم

السلام عليكم ورحمة الله وبركاته،،،

ملحق المقاضي

أيييييييييييييه أصبر نسيت أقول لك بدال ماتمسك الدراهم في يديتك جب بهم

ورقيات وأنتبه تأخذ من اللي في الشمس وإلا اللي مغطيهم بخيشة خذ من

حقات الأسواق اللي مغسلينها وجب معك زهره وملفوف وزود البقدونس

وأن بقى معك شي أشتر لك مويهه برد بها على سبدك عن هالشموس...

ولين جيت بالمقاضي أنتبه تضرب بوري إلا أنزل وأفتح الباب ونزلها أنت

وعيالك عن عيون الناس لاينظلون وهذي أو ل مره أحصل من مشروعي

جريش ومرقوق وقرصان أم نمر...

وذكرني ترى أم فهد مادفعت لي أجرة أستخدام سارونه مع نص زبيل

البطاطس شف أحسبها لي كم تصير..؟؟؟؟

المقر بما فيه زوجتك بنت عمانك أم نمر

والسلام عليكم ورحمة الله وبركاته،،،

**شيخ النظر** · June 27th, 2009, 16:06

بسم الله الرحمن الرحيم

السلام عليكم ورحمة الله وبركاته،،،

شقاوة عيال

البرهي وتوته

البرهي :توته تعالي شوفي وش يسووون...

توته : أهاه يوالله وش ذااااااااا

البرهي :أسكتي لايسمعونك

توته : كل هذولي على ذي بالحالها...

البرهي :شوووووفي شووووفي يؤؤؤؤؤؤؤ يقلبونها...

توته : أي والله شف حماااااااارهاااا...

البرهي :أيه والله يقطع القلب...

توته : وش رأيك نخرب عليهم...

البرهي :لا لا خلينا نشوف وش بيسووون بها...

توته : يالله لزقت في الأرض ولاعاد قدروا يحركونها...

البرهي : وش رأيك نكب عليهم شوي مويه عشان يبردون شوي...

توته : لالا خاف يدرون أنا نطالعهم ثم ينحاشون ويخلونها مفصخه ويجي

لها غيرهم أحد...

البرهي : طيب وش الحل؟؟؟؟

توته : نجيب لهم وحده ثانيه ونخليها بعيد...

البرهي : طيب وبعدين...

توته : أكيد بيشتهونها أكثر صح!!؟

البرهي : ماأدري ماجربت المهم كملي...

توته : بعدين بينقسمون نصين نص بيروح للجديده ونص بيقعد مع
القديمه...

البرهي : طيب وبعدين...

توته : ثم إذا ركبو عليها نجرها من رجليها...

البرهي : ونغسلها ونأخذها لنا...

توته : وحده لك ووحده لي...

البرهي وتوته قاعدين يطلون من ورى الجدار على نمل متجمعين على

حلاوه مصاص حمراء وخايفين من النمل ويخططون كيف يفرقونهم

ويأخذون الحلاوة...

والسلام عليكم ورحمة الله وبركاته،،،

**شيخ النظر** · June 27th, 2009, 16:07

بسم الله الرحمن الرحيم

السلام عليكم ورحمة الله وبركاته،،،

أستدراك

قد لاأجيد فن الكتابة ولكني أجيد نقل مايجول في خاطري لأضعه أمام أعينكم

فأن أصبت فمن عندالله وأن أخطأت فمن الشيطان أنسانيه الشيطان فلا

تبخلوا على أخيكم بالنصيحه في الله فأنا بشر لاأعدو عن كوني أفضفض

عن مافي نفسي بلاهدف ولاعن أحد غير أنها أنّات تدور في ذهني عن

حياتي وعن الآخرين راجياً المولى أن لاتجعلها مصدر إزعاج للآخرين...

والسلام عليكم ورحمة الله وبركاته،،،

**شيخ النظر** · June 27th, 2009, 16:52

بسم الله الرحمن الرحيم

السلام عليكم ورحمة الله وبركاته،،،

عند باب المدرسة

بعد مادمجت رئاسة البنات مع وزارة المعارف قلنا ياهووووووووه لايكون

نظرتكم ضيقة وقاصرة قلت خير إن شاء الله...

يالله الأنظمه في وزارة وحدة ولافيه شئ كويس يحتذا فيه بل فقط السئ ليه

يامربين الأجياااااااااااااااال وإلا أنت تاخذ راتبك آخر الشهر وتمشي وعيال

الناس في حريقة!!!؟

عند باب مدرسة أولادي طفل عمره الثاني عشره ينتظر ولي أمره ويأتي

شباب ويتحرشون به دون وجود معلم مهمته المراقبه على غرار مدارس

البنات لايسمح للأطفال بالخروج من المدرسة حتى يأتي ولي أمرهم؟؟؟

ولماذا لايسمح للفراش الذي يسكن المدرسة بإحضار مواد تمونية لبيعها

للأطفال كالماء والبارد والإيسكريم وإلا مسموح يطلعون الأولاد للبقالات

ويتعرضون للمفحطين والمتحرشين بهم!؟؟؟؟

لماذا نزين أولادنا بشعور طويله وملابس براقه على خلاف ماكان في

السابق ممنوع الدخول للمدرسة بدون الزي السعودي وكنا نأتي بلبس

الرياضه في أكياس بلاستيك ونغير في غرفة الرياضة ثم نلعب...؟؟؟؟

هل يتحتم وجود دورية وسيارة مرور ورجال حسبة لنأمن على أولادنا؟؟؟

أين الرقابة الداخلية التي تمتد من البيت إلى المدرسة؟؟؟

أين مثيل أمهاتنا اللاتي لم يقرأن أو يكتبن ولكن كنا ينثرون شناطنا

ويعرفون مافيها ويسئلون عن ماهو مكتوب بالقلم الأحمر وإلا الحياة شغلتنا

عن هذه الأمانة؟؟؟

ولماذا أسمح لبنتي بقص شعرها على غرار الأولاد وأسمح لأبني بعمل

قزع أو كدش أو طليانية؟؟؟

أين الحب وجمعت ذاك الصحن لتناول وجبة الغداء الذي كان بمثابة مؤتمر

للأسرة؟؟؟

لماذا أندثرت التربية مقابل التعليم؟؟؟؟

أين القلب والعقل الواعي لإدراك الخطر المحدق بنا وبأولادنا؟؟؟

أين وأين وأين؟؟؟؟

مازالت الإجابات معلقة والأفواه مفتوحه لاهثه وراء المال ونسينا البنون

الذين هم من نجمع المال لهم.....

والسلام عليكم ورحمة الله وبركاته،،،

**شيخ النظر** · June 27th, 2009, 16:54

بسم الله الرحمن الرحيم

السلام عليكم ورحمة الله وبركاته،،،

أحمد ربك

الرياض ستصبح شيكاغوا من كثرة السرقات...

في يوم من الأيام قبيل بداية العام الدراسي وبماأني عندي ستة أولاد حفظهم

الله أستدعت الحاجة إلى ذهاب أم نمر مع خالها للتقضي للمدرسة من مراييل

وملابس وغيرة فكانت أم نمر حريصة كان معاها في شنطتها الراتب كامل

3200 ريال مخصوم منه كثير من الأقصاد وبماأنه تعي خطر الأسواق

خلعت الذهب من أيدي وأعناق بناتها ووضعتها في الشنطة...

وبما أن أبو ناصر شيخ كبير ومعه ليموزين فقد وقف بهم في المواقف

وبمجرد نزولهم إذا بشباب معهم دباب (اللي كثرة بدون رقيب أو حسيب

كالسابق) وكانت الشنطه في يديها وهي تنزل الأولاد وإذا بالشابين يسحبون

الشنطة التي كانت متشبثة بها مما دعى بهم لسحبها في الشارع دون أن

تتنازل عن الشنطه إلى أن جاء أحد أهل الخير وضرب قائد الدباب بعصاه

حتى طاح في الأرض ومن ثم رفس الراكب أم نمروسحب الشنطة وهرب...

فلولا وجود خالها للحقت بهم هي وأولادها...

فعندما ذهب خالها لقسم الشرطه يفاجئ بالضابط المناوب يقول له أحمد

ربك ماسرقوا الحرمه أما الدراهم تعوض...

أيضاً نمر أوقف وهو ذاهب لصلاة الظهر في أحد الخميسات والذي كنت

أعمل فيه ظهراً من قبل شباب وأغتصبوا جواله فرددت عليه على غرار

ضابط الشرطه أحمد ربك ماسرقوك فالجوال يعوض...

أيضاً عندما سرقت من بيتي ثلاثة أسطوانات...

أيضاً عندما سرقت من أمام الباب سيارتي...

والحمدلله ماخطفت وطولبت الجمعيات الخيرية بفدية عني....

والسلام عليكم ورحمة الله وبركاته،،،

**أم مالك الأزدية** · June 27th, 2009, 19:45

[align=center]السلام عليكم يا أبا النمر
نتابع بشغف هذه اليوميات ولا نملها
لكن نشاطك يجعلنا نطالبك بتجديده
يا شيخنا الكريم
كتب الله لك الأجر فيما تقدمه
فوالله أنك تدخل البهجة إلى قلوبنا وقلوب من معنا
يكفيك أننا نقرأ لك وننسى ما وراء كتابتك
فأستمر ولو لم نتداخل معاك
وستثمر هذه اليوميات حيث سنتبنى طباعتها ونشرها
وسنعمر لك مسجدا في تورا بورا
ونبدل لك الونيت 79 بونيت 2002
شف كيف نقدرك
والله لو أنك المنفلوطي
ونسيت الوسام ومشلح وغترة وعصابة وطاقية أم قمر
فشد عزائمك ولا تتراخى
عجوز الدرة
أم مالك الدرية [/align]

**شيخ النظر** · June 28th, 2009, 06:44

المشاركة الأصلية كتبت بواسطة أم مالك الأزدية

[align=center]السلام عليكم يا أبا النمر
نتابع بشغف هذه اليوميات ولا نملها
لكن نشاطك يجعلنا نطالبك بتجديده
يا شيخنا الكريم
كتب الله لك الأجر فيما تقدمه
فوالله أنك تدخل البهجة إلى قلوبنا وقلوب من معنا
يكفيك أننا نقرأ لك وننسى ما وراء كتابتك
فأستمر ولو لم نتداخل معاك
وستثمر هذه اليوميات حيث سنتبنى طباعتها ونشرها
وسنعمر لك مسجدا في تورا بورا
ونبدل لك الونيت 79 بونيت 2002
شف كيف نقدرك
والله لو أنك المنفلوطي
ونسيت الوسام ومشلح وغترة وعصابة وطاقية أم قمر
فشد عزائمك ولا تتراخى
عجوز الدرة
أم مالك الدرية [/align]

بسم الله الرحمن الرحيم

وعليكم السلام ورحمة الله وبركاته

سيدتي الفاضلة...

أدام الله عليك اليمن والمسرات...

جميل أن تحضى يومياتي بمتابعه منك والأجمل أن تداخلينها بقلمك الفصيح...

جزاك الله خير وبارك الله فيك وأنا بإنتظار ماوعدتم فالعرض مغري وخايف

يكون زي سيارات المولات إذا جيت تسأل ليه مافزت قالوا لك أنتهى العرض

وأعتقادي أنكم لو تجمعون من الآن كل يوم ريال يمكن تفكون لي ونيت وكالة

لأن 2002 هالأيام مكاينها ماش ويقولون فيها عذروب كهرباء الدرايش على

أحجار تحتاج تغيرها كل فترة...

,أدام الله عليك نعمة العقل والدين ياسيادة الشباب

والسلام عليكم ورحمة الله وبركاته