يوميات شيخ النظر

**شيخ النظر** · June 26th, 2009, 16:51

بسم الله الرحمن الرحيم

السلام عليكم ورحمة الله وبركاته،،،

ظاهره عجيبه

البنت ذيك الأيام كانت تتغطى من عمرها سبع سنوات واليوم الظاهر

مايغطونها إلا ليلة عرسها ماأدري وش الحكمه لاومسوين عليها عروض

بلبس التنوره القصيره والبرمودات ثم إعلانات بنتنا أنخطفتّّّّّّّّّ.....

والسلام عليكم ورحمة الله وبركاته،،،

**شيخ النظر** · June 26th, 2009, 16:54

بسم الله الرحمن الرحيم

السلام عليكم ورحمة الله وبركاته،،،

حز في خاطري...

اليوم بعد الظهر وأنا جالس أغير عشان باطلع للدوام وأسمع إلا صرخات

الغنيمه وأهازيج المنتصريين وأطلع من غير وعيي هاه وش فيه ياعيالي

قالوا تبسي عليه مفطح جابه المطبخ لنا وقال نمر قلت له وشهو ذا قال

هديه لكم يقول فقلت له ببلااااااااااااااااااش قال أيه ببلاااااااااااااااش (جنقل

باند كرو ملاهي بلاش وتطلع عليك مديونية متراكمه أعظم من مديونيات

فيزا على المواطنين) قلت أكييييييييييييييييييييييييييد قال آفا يباااااااااااه

يعني معودك أكذب عليك قلت ياوليدي هذا تعجب أستنكاري وليس

بتكذيب(لعبت في مخي اللغة عقدوني في الساحات) المهم قلت نعطيهم ربع

ساعة قالت غاليه يمكن أم فهد (عمدة الحاره) مروحته قال البرهي

لااااااااااااا السياره مكتوب عليها طخطخ اللقافة (ماأدري وش يدرسونهم في

هالروضه) المهم وأدق عليه لأنه يمكن تلخبط خصوصاً أني طالب عشاء أم

نمر منه يوم عندها حريم ويرد علي السوداني باللاهي يابونيمر تطلعوه

لجارك قلت لييوووووه أزمممممع شغال عد أبووووووووووك أنااااااااااا قال

خلاص ويرسل لي السواق ويأخذه ويطلعه لجيراني شوي إلا جوال غريب

يدق علي (ويمغصني بطني الله يستر عسى ماهوب(اللهم سكنهم

مساكنهم)) إلا واحد يقول طااااااااااااااااالبك يابونمررررررررر قلت سم وش

طالبني على الأقل سلم (قال ليه ورديه أو مناوبه) من أنت ووش تبي؟؟؟؟

قال أنا جارك اللي فوق قلت أبشرك تغديت أنا وعيالي والحين بأروح للدوام

وترى ذبيحتك لم يمسسها أحد وأحنا اللي دقينا على المطعم يجي يأخذها لك

قال الله يجزاك خير...

جاري هذا أجودي لكن وبصراحه عمري ماتكلمت معه أو تكلم معي إلا سلام

وعليكم السلام لاأقل ولاأكثر وبصدق حز في نفسي أنه ماعزم إلا يوم شفت

الذبيحه ياأخوااااان في بنت غاليه وحم لأن جيراننا كانوا يشوووون وأنا

مداوم وأجي وألقى أم نمر سعابيلها واصله الشارع تبي تأكل الله يرحم أيام

زمان أيام أمميتي الله يرحمها وأبيي وخيي وجميع المسلمين عندنا درزن

قدور أبو لقمتين من نصلح شئ إلا ونذوقه الجيران والجيران كذلك وكل

وحده واسمه قدورها بميسم بعير...

والسلام عليكم ورحمة الله وبركاته،،،

**شيخ النظر** · June 26th, 2009, 21:04

بسم الله الرحمن الرحيم

السلام عليكم ورحمة الله وبركاته،،،

تمتمات

الهلل يغني فقراااااااء معدمين فياناااااااااااااااااااس حرااااااام عليكم تخلونها

للمولات والصيدليات...

وبعدين ترى اللي يراجع فاتورته ماهو غبي الغبي اللي يعفطها ويرميها

ويمشي...

وبعدين نفسي أعرف الناس في حارتنا ليه تشتري عودان أسنان يعني هو

من رخص اللحم وإلا ينظفون به أظافرهم؟؟؟

وياعجايب ليتكم تشوفون في هالمولات وش يصير بصراحه ذكروني بأول

مادخلت الرياض أتلفت وأقلب رأسي كني ضايع...

هايبر فيه بضائع بالملايين وعرضه أطول من كبري الخليج وتاليتها مافيه

الأ كاشير واحد والسرى واصل بلوتو...

والسلام عليكم ورحمة الله وبركاته،،،

**شيخ النظر** · June 26th, 2009, 21:10

بسم الله الرحمن الرحيم

السلام عليكم ورحمة الله وبركاته،،،

برميل المتقاعدين

التقاعد هبّل بالناس برميل الزباله (وأنتم بكرامه) تحركه أيدي خفيه في

شارعنا كل يوم عند بيت ولين قعدت يومين ألقاه بين أبوممدوح وبيت أبو

خالد وخفت لا يتطاقون عليه فجبته عند بيتي العجيب جاوا وطقوا على بابي

كل شيبان الحاره يقولون يعني نخلي خداماتنا توصل لبيتك قلت طيب وش

الحل أنا بعدته عنكم عشان المشاكل وعادي بأتحمل ريحته وغثاه قالوا

لااااااااااا نعقد أجتماع قلت علموني بالنتايج وأنا حاضر ياخي البنك العبري

وهالتقاعد لعبت في الناس وهبّلتهم ماعاد بقى شئ يتطاقون عليه...

والسلام عليكم ورحمة الله وبركاته،،،

**شيخ النظر** · June 26th, 2009, 21:25

بسم الله الرحمن الرحيم

السلام عليكم ورحمة الله وبركاته،،،

وش تعود؟

إنتشرت ظاهرة جداً غريبة ومزعجه في نفس الوقت وتحرق الكبد حيث

يسولف لي أبني البرهي خمس سنوات يقول تقول البنيه بنت آل فلاني في

المدرسه ليه تمشي مع ذاك الولد يقولون أنه قليل أصل فجاني البرهي

يسألني يعني أيش قليل أصل فسألته وش هالحكي ومن علمك أياه؟؟؟

قال شما بنت آل فلاني قسمت البزران وقالت أنتم عيال عبيد وأحنا عيال

حمايل وأصلنا وفصلنا وأنت ماعندكم أصل...

وجاني أبو جاسم يقول أخطاء المدرس في أسمي وقلت ياأستاذ أنا أسمي

أبو جاسم شيخ النظر من قبيلة المتشردين فقال والله ونعم يعني بن

أخخخخخخخخخي!!!!

فجاني الولد مستغرب ليه يقول لي المدرس بن أخخخخخخخخخي وأيش

معناها قلت يعني بن عمك قال يخسااااااا قلت ليه؟؟؟ قال يدخن ولايصلي

معنا الظهر وشيخ الحلقه يقول مافيه أبن عمك وإلا خالك كلنا إخوان في

الله والشرط بيننا الإسلام ....

وقد لاحظت آسفاً أننا لانعلم أولادنا إلا الكلام الفاضي الذي سيحاسبنا الله

عليه فللأسف في طيات هذا المنتدى وغيره يعتقد أن الصالحات فقط من

بنات الحمايل والمتبرجات هن فقط من بنات اللحوج والعبيد والزيود

والتكارنه وغيرها وهذه عنصرية كانت تمارس في الجاهلية واتى الاسلام

ونهى عنها واصبحنا ندرك انه لافرق بين عربي واعجمي الا بالتقوى

اقتداء برسول الله صلى الله عليه وسلم ولكن يبقى هناك من لم يستوعب

هذا النهج الاسلامي القويم وتراه يفخر بجاهه ويتعدى حدوده مع الاخرين

مع العلم ان ذلك الاخر ربما يكون خيرا منه وهاهو مؤذن الجنه سيدي

بلال بن رباح رضي الله عنه وأرضاه أسوداً حبشي عزه الله بالتقوى ومن

أهم أسبابأنتشار الإسلام وهو عدم التفريق بين أتباعه فالناس كلهم لآدم

وآدم من تراب…

قال صلى الله عليه وسلم : " لا فرق بين عربي وأعجمي إلا بالتقوى "

وقال صلى الله عليه وسلم : " لا فرق بين أبيض وأسود إلا بالتقوى " .

فلم يفرق رسول الإسلام بين الناس لمجرد لونهم ولمجرد مكانتهم في

المجتمع .

فالوزير والأمير والخفير سواء أمام الله والفارق الجوهري الوحيد هو

التقوى ....

إن التقوى هي اللباس الذي يميز بين عباد الله ومقياس أفضليتهم عند الله

أما خلاف ذلك فلاااااااااااااااااااااااااا

قال تعالى

﴿ إِنَّ أَكْرَمَكُمْ عِنْدَ اللَّهِ أَتْقَاكُمْ ﴾

أنا أعلم أن معظم الناس يتحرجون من المداخله في هذه المواضيع

فأطمئنكم فأنا عبدُ أسود لاأصل ولافصل لي ولكني مسلم أخاف الله وأرجو

لقائه وأنا على دينه ومقراً بنبيه صلى الله عليه وسلم…

فأنا بإنتظار آراء الأخوه وأريد أن لانتمايز في هذا الدين فوالله أنه من

المخجل أن نكون في جزيرة العرب ورثة الإسلام وأول من يسئ له بالقبليه

الجاهليه وإثارة النعرات وبدوها مزايين وشعر وأنتهت بإثارة مشكله بين

قبيلتين كانت قبل 300 سنه...

والسلام عليكم ورحمة الله وبركاته،،،

**شيخ النظر** · June 26th, 2009, 21:28

بسم الله الرحمن الرحيم

السلام عليكم ورحمة الله وبركاته،،،

العنصرية

المحزن وسبب طرحي هذا الموضوع (وش تعود؟) سألني أمريكي مسلم

(هذولي إذا أسلموا يتقيدون صح بالتعاليم الإسلاميه ولايخلون لاسنه

لولافرض وليتك تشوفهم عندنا في العمل وشلون في المسجد هم وعيالهم

الفروض الخمسه) عن العنصريه في السعوديه وليه بلاد الحرمين وورثت

هذا الدين متمسكه بما منعه إبراهام لينكولن (سنة 1809 - مولد إبراهام

لينكولن رئيس الولايات المتحدة الأسبق) على النصارى حينما حرر السود

في أمريكا سنة 1865 محكاة لما حدث في إنجلترا حتى سنة 1840 ، وفي

فرنسا حتى سنة 1848 ، وفي هولندا إلى سنة 1863 وللأسف مازال

قائماً في بلاد الإسلام فلم أجد ماأجيبه ولما صارت المواقف مع أبنائي

أحببت أن أرى آراء أساتذه أفاضل في هذه الدرة...

والسلام عليكم ورحمة الله وبركاته،،،

**شيخ النظر** · June 26th, 2009, 22:04

بسم الله الرحمن الرحيم

السلام عليكم ورحمة الله وبركاته،،،

من كنا صغار في الحاره...

كان في الحاره واحد ماشاء الله عليه في ثالث ثانوي لكن ماشاء الله

تبارك الله كف يده كبر خبزة التميس (أسمه خبز حساوي من أول)

وكان حجم جسمه سته في أربعه أكبر من بيت عمدة الحاره وكانت

عيارته (شيكيتا) (الله يمسيه بالخير لو ذكر هالموقف فهو الآن

دكتور أستشاري في جراحة القلب) وبماأني بثيررررررررررر

وراعي مشاكل فكان شيكتا أعز أصدقاي لأن عند أخوي مصنع

حلويات والناس تحب الصديق اللي يعطي والوالده الله يرحمها جابت

للحاره النمل من كثر ماتروح لهم حلويات...

المهم جالس مره أنا وشيكتا في أحدى العصاري نغسل السياره

(هايلكس نص هنقلين) قام مع شدة المسح كسر المرايه قلت له

ياأخي أنت ثور ويديك كبار ومادريت إلا ويلقطني بحلقي ويرفعني

عليه (لين غديت كني ميداليه في يديه) وقال أيششششششششش

قلت أمزح وراك صدقت المرايه والسياره تفدااااااااك أصلاً المرايه

بخمسه ريال...

قال شف ياشويخ ونزلني (لين ثوبي كنه توه مطلع من فم بقره

عالجته (ماضغته) لين قالت بس) تراني أحترمك بس إلا تطول

لسانك علي قلت أفااااااااااا يعني ماأمزح...

والرضاوه ذيك الأيام سهله تأخذ الواحد للتسالي وأثنين هامبورجر

زياده كتشب وجبن وبطاطس مع عصير تانج برتقال وأحنا نأكل قلت

له (يعني رجعت المويه لمجاريه) وش أطرف موقف واجهك من

المشاكل شكوتا (ينبسط لادلعته) ضحك (أشوا رضى) قال مره لقيت

دخان ووزني الشيطان أجرب ولالقيت مكان غير الملحق في بيتنا

أجربه وتخبر بيوت المسلح صغيره وتكشف الريحه فقلت بماأن

الوالد ينومنا من بعد العشا (كان للأباء هيبه أعظم من هيبة أمريكا

في الشرق الأوسط وكان تشيكتا إذا شافه أبوه في الشارع جاه

إسهال) فقلت بأجرب الدخان لين ناموا المهم ومن نامو وأولع

الزقاره وتوني ماخذ موشين (يعني شفطتين) إلا والباب ينفتح

بقوووة (مداهمه) إلا هذا أبوي ووراه أمي بعصاته ويليخني تلييخ

(أي ضرباً مبرحاً) ماخلا فيني مغز أبره (كنايه عن شمولية الضرب

لجميع أنحاء الجسم) المهم وأمي تدعي علي يالفاجر ياللي فيك

مافيك (كان المنكر صعب ذيك الأيام قبل لايصير واحد منا وفينا)

المهم ويطردني للشارع وأطلع لين الدنيا مسوده في وجهي وبيتهم

قريب من شارع الكباري (طريق الملك فهد حالياً) وأركب الهونداي

(كانت توها طالعه ذيك الأيام يعطونك أياها لاشريت غساله(أمزح))

وعلى فكره كان يتصفط جوا السياره مايركبها كبير الله يهديه...

يقول وأطلع على طريق الكباري إلا راعي كابرس معه حرمته

يضرب بواري الظاهر أني حديته وألتفت له إلا وهو يسب وأستحيت

لما شفت معه مرأه يقول وأعتذر له وأطنشه (كان للمرأه أحترام في

مجتمعنا لأنها متستره)...

لين وقف جنبي على الأشاره ويقوم ويتفل (حاشاكم على قزازة

الراكب) قلت لاحول ولاقوة إلا بالله وأعدي الإشاره ويلحقني

ويحدني ويوقفني وينزل بالعقال علي ومن أقبل لين وجهه يقول

هيت لك أصفقني تكفا يقول وأصفقه ذاك الكف لينه طاير عند باب

حرمته (خبزه بخبزة التميس(أسمه خبز حساوي من أول))

ودردببببب المهم وتنزل زوجته بسرعه وتصفق رأسه بالباب (كملت

الناقص) تصايح وتدعي الله لايوفقك ذبحت رجلي ويتمت بزراني

يقول وأركب السياره وأروح بسرعه لأن الشارع كان فاضي ومن

بعيد مطفي النور وأشوفها تسوي له أسعفات أوليه لين ركب

السياره ومشوا وأقعد أضحك...

وهذي مشكله كبيره في مجتمعنا الواحد لاصار معه حرمته ماأدري

ليه يستقوي ويدور المشاكل....

ولي موقف مع أم نمر صار وبأذكره فيما بعد...

وبحب في الله نلتقي

والسلام عليكم ورحمة الله وبركاته،،،

**شيخ النظر** · June 26th, 2009, 22:16

بسم الله الرحمن الرحيم

السلام عليكم ورحمة الله وبركاته،،،

الرياض

اللي يسمع اللي يتكلم عن المحميات يقولو أننا ماتشوف البعارين والجيوب

الونيتات فيها...

ومن ناحية السياحه وش نبي يعني أكثر من هالحدايق اللي على مشارفها

شباب مشغلين البلوتوث ويرسلون لخلق الله وشكلنا عفنا الرياض من تنظيم

الدخل المحدود بيت ملاصق لبيت تقول كنهم أطفال سياميين (الأطفال

المتلاحمه من الولاده)...

وبعدين وين نلقى فنادق فيه؟؟؟

حنااااااااااا في الرياض اللي يبني عماره ومايمشي سوقها يقلبها شقق

مفروشه عفشها من الحراج مستخدم...

وأكيد لاحظتوا في الرياض كل حي سكني حاطين لهم بر متنكر بلوحة

أراضي للبيع عادي هذا بر نخيم فيه أهل العاصمه عشان الزحمات أقرب

لنا...

تلاقيك رحت للثمامه اللي فيها شوي للأسعار على الفحم مع بركه ماتنظفت

من فتح هالمنتزه...

يالله بأنتظار رأيك الصريح عن ديرتنااااااااااا...

ودمتم على خير وبالحب في الله نلتقي لنرتقي...

والسلام عليكم ورحمة الله وبركاته،،،

**شيخ النظر** · June 27th, 2009, 08:25

بسم الله الرحمن الرحيم

السلام عليكم ورحمة الله وبركاته،،،

الفلوس والفلوس...

يقول لي أصلاً لوأنك عندك مخ ماصرت منتف ماتشوفني بعقلي وشلون

جمعت هالدنيا كيف ونسى قوله تعالى:

﴿ ولولا إذ دخلت جنتك قلت ما شاء الله لا قوة إلا بالله إن ترن أنا أقل منك مالا وولدا﴾

معك ريال تسوى ريال واللي مامعووووووووش مايلزموووووووش...

أي شئ بفلوس والفلوس صارت مثل الزيقب (الزئبق) تشوفه ولاتقدر

تمسكه ويكون قدامك كبير ولما تلمسه تلاقيه تفرقع لقطع صغار...

بارك الله فيه وفي دينه ومزاحمته للحجاج في كل سنه وأنه مغبوط على

مداومته على الفروض والسنن الرواتب وكل الناس تدعي له ويقولون ونعم

فيه بس ياحسره من سلفته كرهته لأنه ضعيف فقط قدام الفلوس مايحب

يسدد ولايبي حتى حلول للتسديد والمشكله لسانه طويل يقلب الحق باطل

والناس مالها إلا الظاهر فحسبنا الله ونعم الوكيل...

اليوم صار الإنسان يكره الفلوس لأنها مثل مايقولون العامه (وسخ يدين)

ويغلونها أكثر من أرواحهم والقهر لما تشوف أخوان واقفين في محكمه

على الفلوس...

تفضيل الله ناس على ناس له عدة أوجه منها العلم ومنها الأولاد ومنها

العقل وغيره كثير لكن اليوم المعيار لأن تكون كذا (مضمومه الأصابع لراحة

اليد والإبهام مرفوع (thumps up)) لابد تكون عندك دراهم والغبنه

راعي الدراهم يحسبنه ماخلا ولابقا في كل مجال...

والسلام عليكم ورحمة الله وبركاته،،،

**شيخ النظر** · June 27th, 2009, 08:28

بسم الله الرحمن الرحيم

السلام عليكم ورحمة الله وبركاته،،،

إيميل

قلت لعمي راعي غنم ليه ماتسوي لك إيميل لأنك عندك أمر أستيراد عشرة

ألآف رأس وماشاء الله بيكون لك طلب في دول الجوار ولابد تتراسل معاك

الناس بدال خساير هالجوال وغيره قال وصليعته بينه شوي أيام كان شعري

تواليت (يعني قصة في التسعينات هجريه) جاني واحد شامي وقال سوي لك

صندوق بريد عشان نتراسل وأعلمك وش عندي ماعندي من الغنم وأزوعه

(يعني حاشاكم أطرشه بمعنى أطنشه) وأمشي على طريقتي وهو للحين

يترزرز في السوق كيف نتواصل ونتراسل وأنا شوف عينكبخير ولله الحمد

فالإيميل أخاف الحين أسويه وأرجع مصفر لأيام التواليت فخلني الله يرضى

عليك (منطق)...

فإذا صار عندي فلوس بأكون مثل ومثل ومثل ماأقدر أجزم أو أنفي لكن

نشوووووووووووووف....

ودمتم على خير وبالحب في الله نلتقي لنرتقي

والسلام عليكم ورحمة الله وبركاته،،،