ماتشوف شر
تعاتب الآخرين على مزاجك رغم عيوبك وأخطائك في حقهم ثم تزعل وتبيهم يراضونك ماتشوف شر مردك ترضي نفسك وترجع..
تجحد صنايع المعروف وتعتقد أنه حق مطلق لك!! ماتشوف شر مصيرك تشرب من نفس الكاس وتتجرع المرارة..
تسرق وتسرف وتكذب وتكذب ومطلوب أننا نصدقك ونكذب الواقع لأجل نكون مغفلين في نظرك!!
ماتشوف شر مردك تلاقي مايكشفك أمام الآخرين وتكون عبرة لغيرك..
تتقوى على الأضعف منك وتصرخ في وجه الأكبر تحطم وتكسر ماحولك لإثبات رجولتك ماتشوف شر راح تكبر وترى ماأريت غيرك وتتجرع مرارة قسوتك في صحتك فهذا زمان سيعبر بك إلى نفس المحطة التي سحبت غيرك لها..
عندما يكون أغلى ماتملك الذهب والمال وتهجر صغير الأطفال لتثبت ذكائك أمام الأغبياء أمثالك ماتشوف شر سيفنى الذهب والمال وسيعرف الأطفال يوماً ما أن قيمة الأشياء يحددها مدى الفناء...
أنقطعت عن دفتري ورجعت له على الرف القديم أنفض عنه أغبرة المشيب وأجمع فيه بعثرة الحروف عندما فقدت القدرة على البوح لغيركم حبايبي والحمدلله ماشفت شر ولقيت في تفاعلكم الخير وها أنا رجعت أسرح بأفكاري وأرعاها في مرابعكم فتحملوني فمازال الخير باقي الى قيام الساعة والشر مهما طال ليله فلابد للشمس أن تمسحه بيوم جديد يطويه للماضي...
ستي وسيدي
على حضني
يضني لك حنان
ولايمرضني
غير بعدك ثوان
حبيبتي حبيبي
والله أن قليبي
أنقسم بينكم حيران
لك نص ولك نص
ستي وسيدي
بنتي ووليدي
نص ونص
فرحة وأمان
كلي لكم حب
وجسد تجمع في قلب
يطلب لكم الرب
هناء على مر الزمان
رحلة أعرج
على شط البحر
ماشي..
على جاشي..
وقلبي عطشان
ماأدري ليه!؟
رغم كثر الماء..
والمطر بكبد السماء
ليه ضميان..؟
الموج..
يلامس رجولي..
ويبعد جفول..
هل حرارة اللهفة..؟
خلته يتعسس طولي..!
وينسحب خجول...
تناقض عجزت وصفه..!
ولا عدت أدري
من ضيق صدري
وش أقول..!؟
من كثر المطر حولي..
داخ البحر...
وبلع الشمس بنادول..
واللي مكذبني!؟
يشوف القمر..
كيف من شيعه الليل..
طلع على طول...
ماطاب الوقت...
ولا أرتوى الشط...
علتي من أشتقت...
حال بيني..
وبين ولفي خط...
عجزت أعبره...
وعجزني كل الميول..
آه ياعيني...
أنا عنك ويني..!؟
في ثرثرة الصمت...
سكت البحر مجهول...
هيه يابحر..
معقول!؟
في عيون البشر..
صرت مهبول!؟
أنا الصبر...
عقدين ونص...
أمشي عليك حنين..
أروي وأقص...
قهر ذبحني سنين...
لين عجزت الرجول...
وقعدت وحدي...
تكتب الحب يدي...
شيخ النظر...
بكى المطر
وأصبح بحر...
وسط الصدر...
وأبتسم ملول...
أزرته الحلول...
وصارت حياتي...
خطر بخطر...
نعم.. نعم..
معقوووووول...
كثر ماراح
من الجراح
وش بعد بياتي...
ياعيال الأصول...
ماني رايح لمماتي...
مقتول...
بأعيش الطيش...
وبأعيش العيش...
في دربي ماشي
على البحر ماشي
على جاشي...
ولا أدري متى الوصول...!؟
أعجبتني
مالك من مالك إلا اللي تصرفه ولالك من عيالك إلا واحد
شيختي لم تؤثر في مشيبي أنسانه غيرك فأنتي جامعة الشيوخ
لاتحب ولا تكره خلك في المنتصف فالناس بين رايح وجاي
الصبح للصبح والليل للنوم فحافظ على ساعتك البيولجية لتعيش
زائرك يتحدث للبعيد على هاتفه ويتجاهلك وكاشير المطعم يستقبل طلبات الهاتف والبرنامج ويتغافلك
عندما يتحدث لك الكبير والمحتاج والصغير والفقير والمراجع أو أي أنسان فقط تبسم وقل له أبشر وراقب ردّة الفعل فأحياناً لايحتاجون لفعلك بقدر ردّة فعلك وأبتسامتك
رَبِّ أَعِنِّي وَلَا تُعِنْ عَلَيَّ،
وَانْصُرْنِي وَلَا تَنْصُرْ عَلَيَّ،
وَامْكُرْ لِي وَلَا تَمْكُرْ عَلَيَّ،
وَاهْدِنِي وَيَسِّرِ الهُدَى إِلَيَّ،
وَانْصُرْنِي عَلَى مَنْ بَغَى عَلَيَّ،
رَبِّ اجْعَلْنِي لَكَ شَكَّارًا،
لَكَ ذَكَّارًا،
لَكَ رَهَّابًا،
لَكَ مِطْوَاعًا،
إِلَيْكَ مُخْبِتًا أَوَّاهاً مُنِيبًا،
رَبِّ تَقَبَّلْ تَوْبَتِي،
وَاغْسِلْ حَوْبَتِي،
وَأَجِبْ دَعْوَتِي،
وَثَبِّتْ حُجَّتِي،
وَاهْدِ قَلْبِي،
وَسَدِّدْ لِسَانِي،
وَاسْلُلْ سَخِيمَةَ قَلْبِي
تخاريف شايب وعجوز
أبو نمر : ماشاء الله وش عندك على هالإبتسامة!؟ أول مرة من خمس وعشرين سنة أشوفك مبتسمة من تقومين من النوم..
أم نمر : بلاني والله أتصبح بوجهك من وين تجين الفرحة وانا انام مغبونه واصبح على وجهك غثاك..!
أبو نمر : يالله صباح خير توك مبتسمة رغم كشتك اللي أذتني في ليلي كلما جت على وجهي احسبها نامسة وافز مرتاع...
أم نمر : ماتشوف صدوع رجليك اللي تسوي لي بها صنفرة وانا راقدة الله يرحمك ياخالي ناصر من مات وانت طايح فيني يتيمة تلعب فيني بلا والي...
أبو نمر : الله يرحمنا جميع وراك قلبتيها مواجع وانتي صاحية مبتسمة!؟
أم نمر : نظلتني يالحسود لين قلبت مزاجي حسبي الله عليك ماطلعت على هالرجاجيل دمك خفيف كانك ثقيل طينة ونظوووول
أبو نمر : لاحول ولاقوة الا بالله العلي العظيم الآن بتقولين لي وش اللي مبسمك والا صكي الموضوع...
أم نمر : هذا أنت ياشايب الخلا الواحد مايعرف يقول لك مافي قلبه نقاد تحطم الواحد...
أبو نمر : يابنت الحلال أنا أسوء واحد في العالم خليك مني وعلميني وشفيك!؟
أم نمر : فيني حرررره مايعلم بها إلا رب العالمين كاني كنت احلم ان الأمير مشعل تزوجني وليلة الدخلة مات الله يرحمه ثم جوني يبشروني بالورث مليارات وقصور وخيرات وخدم وحشم وسعة صدر لدرجة أني مابغيت أصحى...
أبو نمر : ياشيخخخخخخة الأمير مشعل مررررة وحدة وين لقاك فيه!؟
أم نمر : شافني معك وحسبني بنتك وخطبني منك فتزوجنا لكن عينك الحارة حرمتني حتى أستمتع في حياتي..
أبو نمر : الظاهر أنك مكثرررة البارح لين وصلتي مرحلة لايمكن أستيعابها...
أم نمر : وش ألعابها أنت ووجهك!؟
أبو نمر : أستيعاب يعني فهم يعني أنتي المفروض مثل هالحلم تصحين منه على المباحث دون المرور بالنيابة وهيئة التحقيق هذا حلم يستحق سجنك المؤبد...
أم نمر : الله يجعله فالك حتى الحلم في شرعك حرررررام
أبو نمر : أقول قومي عطينا نفطر وأياني وأياك حتى تحلمين بمثل هالأشياء...
أم نمر : ماهمك الا بطنك وتكسير مجاديفي لكن ربي بينصرني عليك وأتزوج ولد ديانا وأقهرك...
أبو نمر : تزوجي سلطان بروناي بس عطينا نفطر وجيبي لي حبوب السكر والضغط والكليسترول..
أم نمر : ممرضة عندك ياشايب الهم الله يرحمك يمّه زوجتيني هالمهبول تقول رجال وصخي مادرت أنه كل سنتين مغربلني شدّه من بيت لبيت أجل سندريلا تعطينه لها المحتضر وعلاجاته...
أبونمر : مشكلتكم يالحريم لوكم على فراش الموت تشوفون عماركم توكم مولودين وتشوفون رجالكم لوهم في قمّة النشاط والرجولة يالله حسن الخاتمة...
أم نمر : أقول رح جب خبز واسحب لي دراهم خلني أروح للسوق مع صديقاتي أبرررد على تسبدي من غثاااااك..
أبو نمر : همسة (صديقاتك اجل هذولي معك حطب جهنم ياعجايز الغيبة والحش وين النسوية عنكم والا طايحين في بنياتنا المراهقات هجرة ولجوء وأشكالكم من يستحقون ذلك لعل مجتمع المتعلمات يصعد بنا لكنه للأسف يبي يسقطنا)...
أم نمر : طبعك ماتواجه حسبي الله عليك تتمتم وتنحااااش...
الأخ شيخ النظر
وعليكم السلام
حطوة مباركة بتوفيق الله
وعليكم السلام أخي شيخ النظر
الانستقرام يأخذ وقت لجلب الإنتباه ويأخذ وقت في المتابعةللأسف الانستقرام تجربة لم تستهويني لذلك لم أواصل فيها فسيكون هذا المتصفح متنفس من جديد لي
شرفني مرورك واخجلتم تواضعنا فما نحن الا هاوين نفرغ جعبتنا على اعينكم فان اعجبكم فحمدلله وان
لم يعجبكم فسامحونا وانتم الكرام
ومرحبا بعودتكم
الذين يشاهدون الموضوع الآن: 1139 (0 من الأعضاء و 1139 زائر)
مواقع النشر