بسم الله الرحمن الرحيم


السلام عليكم ورحمة الله وبركاته



من العايدين



من صلينا الفجر أسمع البرهي يسولف مع توته وهم كاشخين بلبس العيد حق

العام صحيح قصر عليهم بس يالله باقي عليه لصقات الجديد...



البرهي : أسمعي غذا رحنا نصلي العيد لاتقعدين مع الحريم ترى الحريم بس

يعطون حلاو أما الرجاجيل يعطون ريالات جديدة الظاهر مغسلينها وكاوينها

مع ثيابهم...



توته : زاد أقول وين جايبنها منه وبصراحة بعد الحريم حوموا كبدي

بحلويات سورية رخيصة وإلا حلقوم ينشب في الضروس...



البرهي : خليكي كووول ياهووووه إذا رحنا لبيت عمي لاتسلمين إلا على

عماني كل واحد بيعطيك خمسة ريال ويمكن يخطي بحكم أن الدراهم الجديدة

تلخبط ويعطيك مية...



توته : ليه وحريم عماني...!؟



البرهي : هذولي سلمي عليهم في الليل عشان يعطونك لأنهم في الليل

بيكونون في الإستراحة ويبون يستعرضون قدام بعض وعادة أكثر مايعطون

ريالين والمدرسات خمسة وإلا عشرة حسب ماخسرت عند المشغل إذا كان

كثير فهي بتعطيك خمسة وإذا صار شوي فهي بتعطيك عشرة عاد أنتي

وحظك...



توته : طيب وأبوي...



البرهي : أي أبوي هذا يقول أن له 10% في المية من العيديات عشان يعبي

بها بنزين بس لاتعلمينه كم جمعتي إذا جمعتي ميه قولي له خمسين عشان

تعطينه خمسة زي مايسون التجار في شهادة المنشاء ويضحكون على

الجمارك...



توته : طيب وأمي...!؟



البرهي : أمي هذي عطيها عشرة ولين خلصت فلوسك قولي لها ضاعت ثم

تعطيك عشرتك مرة ثانية عشان تفتك من صجتك...



توته : أها والله فكرة...



البرهي : ترى العيد بس أول يوم وثاني يوم إذا قابلك أحد عادي لو ماشافك

من سنه سلامه بارد كنه جالس معك البارح ولابه عيديات ولاهم يحزنون...



توته : والعيد الكبير الأضحى...


البرهي : هذا عيد اللحم بس عقب ماغلت الذبايح أتوقع كل عشر أسر

يتقاطون في ضحية وكل واحد يعطي الثاني من قسمه...



توته : الحمدلله أنك اخوي وإلا كان تورطت في هالعيد...


والسلام عليكم ورحمة الله وبركاته