بسم الله الرحمن الرحيم
السلام عليكم ورحمة الله وبركاته،،،
قريب الفرج
اليوم كاشخ بالغتره البيضاء والثوب السعودي ومتبخر ودهن العود اللي
تفوح ريحته في هالمنتدى من طيب أهله....
ياشين التزكرت على جيب فاضي...
عشان مودي أم نمر لأهلها (كلهم خالها في منفوحه وأختها في خلة بن
نصار) والله وكيلك يجينا ذاك العج اللي رجعنا كننا عمال صيانه في وزارة
المعارف...
وصك ولاتصك الدرايش وانواع الكحه والأوجاع ولو رحت لحدا
هالمستشفيات الحكوميه (ماينس ستار) لقيت سلندر واحد بخار والناس
زحمه عليه...
أما المستشفيات الأخرى (فايف ستار) فهي فقط للأخوه المغتربين من
السودانيين واللبنانيين وغيرهم وإلا يادافع البلا في الأسياب وبكره يطلع لك
واحد من شركة قوارير الصحه يقول هذا الكلام مردود عليه (عيال منسوبي
وزارة الصحه يعالجون في المستشفيات الأهليه)...
ماعلينا المهم وصلنا لمنفوحه إلا كل عايره فيه باكستاني وإلا تكروني
يشرون بقوارير صحه ومناديل قلت (أسمع ياراجنو تغير الولد مبدئ حسن
النيه) يمكن يبيعون للي مسيريين على أقاربهم وجاهم عج مويه ومناديل
يغسل وجهه ويمسح إلا هذا ابوناصر خال المدام وتنزل والبزران يحبون
راسه وأنا قبل أسلم قال وأنت يالقاطع(وأغطي ورقي قلت من تسجيله؟)
المهم وكالمعتاد في هالديره قهوه وشاي يعني من حراره في حراره
ومجلس أبواصر يذكرك بقصر المربع والمصمك مازال طين في كنديشه
صحراوي والمساند حمر أم حمامتين ووجار وكمار ونص الجدار جص
والأرضيات سمنت عليه زل أحمر والمويه في زير وأسلاك الكهرباء على
الجدران طالعه كأنها توصف لك الفيش واللمبه والمروحه....
ويأذن وقال يالله نقوم نصلي وأول ماطلعت إلا وأدور سيارتي ولاألقاها
وأتلفت يمييييييييين وأتلفت يساااااااااار وأشوف إلا سياره كأنها هي بس
ذي بدوووون خطوط ومرفعه على بلك وأقرب لينهم جيرانه التكارنه
نافضينه نفض حتى الخطوط مغسلينها (مالهم قلب على سياره وصخه)
ويشوفون هالكشخه ويصفون طابور يحبون رأسي وخشمي وقال هاه أأأم
شيخ أيش رأيكي؟؟؟
قلت بارك الله فيكم وثبت خطاكم في تنظيف أي سياره والمهم نروح المسجد
لين هالمسجد مايصلي فيه إلا صفين وكل صف فيه 13 شخص كلهم من
السعوديين القدامى أهل منفوحه الأصلييين (للي لين نشدته وش ديرتكم قال
لك الرياض يعني متمدن الرياض كانت منفوحه) والأمام هو أبوناصر
ويصلي بنا ومن يسلم يقوم واحد من المصليين يشكي فواتير الكهرباء
والماء والديون وأنه محتاج ويقوم ويجلس في الصف الآخير ويفرش
فواتيره إلا ويقومون المصلين ويصفون جنبه فارشين فواتيرهم يحسبوني
أمير يسمعون بمغامرات اللي عطاهم فله وسيارات وأرصده في البنوك
وشاعر تكفا تكفا ماخذ إلا ثلاثة ألاف ريال...
ومن تسنن أبو ناصر وسلم قال يالله نمشي فقمت ومشينا ولما شافوني مع
أبوناصر عرفوا أني نسيبه فيقال أنهم بيصرفونها فقعدوا يسبحون ويهللون
وهم منزلين روسهم...
وأنا أقوووول قريب الفرج إن شاء الله فدعواتكم...
والسلام عليكم ورحمة الله وبركاته،،،
مواقع النشر