حصاد الأيام والأحداث

[نجم سهيل]

معذرة على تأخر ولادة الحصاد في موعده فحصاد هذا الأسبوع اصفر مثل الجرجير القديم ومصدي مثل باب بيتنا اللي كل شوي تنخلع مفصلاته من كثر ما يصفقونه العيال وانا كل شوي اروح أنقذ مايمكن إنقاذه وارقع مايمكن ترقيعه بمكينة اللحام اللي عندي اللي اضطر لها كطواريء بعد أن صار من الصعب العثور على بنقالي في ظل مغالاة الباكستان وتحدثهم إليك من طرف الخشم ولكي يتخلص منك يضع لك رقما ماليا خرافيا

فاقوم بالواجب فوق السلم وأجبر الطارف من عيالي البطرانين ليكون عامل معي يناولني بعض الاشياء ويمسك السلم لايطيح بي خاصة إذا تنافضت كراعيني وتعالوا شوفوا عاد شايب وشايف عمره وراسه ناشف وتعالوا شوفوا عاد شكله وهو لابسن طربوش اللحام الاسود تقول كنه من خبراء لحام أنابيب البترول مع فارق بسيط انه يدوخ ويضيع وتبحلص اعيونه وبدل مايلحم المفصلة يلحم على الباب ويهاوش ولده اللي يقول يابوي انت تلحم غلط ولكن بعد جهد جهيد تنجح السالفة ويلحم المفصلة الله لايعودها

انا وين رحت ؟؟؟

مقاول حفريات الصرف الصحي وعماله سكروا علينا الشوارع وجو يبون بيسكرون قدام بابي اللي على شارع الخدمات بدون داع وتهاوشت معهم وادعيت ان سياراتنا من ضمن افراد العايلة ولايمكن اسمح أن تبيت في الشارع كله عاد الا شرف سياراتنا وعقبها بيومين حفروا الشارع الرئيسي المقابل وحطوا ماصورة ودفنوها وانا قاعد اتفرج من الطاقة ابشوف وش يسوون أثرهم طاحوا في مياه متسربة من بعض البيارات اكرمكم الله وقاموا يشفطونها وتروح من داخل الماصورة على كتف الشارع اللي قدام بيتي من الجهة الأخرى

وانزل واتهاوش معهم وانا استنجد بعمليات البلدية 940 اللي عطوني رقم البلاغ وشوي ولاهم يتصلون بي تعال حنا في الموقع والله ياهي عمليات سنعة بالخيل والله ولا حتى 911 الأمريكية عزتي لحال من يطلبون عمليالت المرور والحوادث تشوفهم ايتثاوبون والا ايتسدحون من طول الانتظار حتى اللي ايتهاوشون يعودون ايتصالحون واكثر الناس يصبحون المرور على شان الورقة التعسة لإصلاح سياراتهم أظن المرور تعود على هالشغلة واشترى راسه من الركض وي وي وي وي ورى السيارات المتصادمه لكن والله ماتشوفهم الاكان تفقع راس خصمك او يفقع رويسك ابشربهم ومن المستشفى إلى السجن وبس

سبحان الله الديك الرومي تشوفه هاجد ألين يشوف الدم ويجيه شعاف ويجيك يطامرومن شدة حرصه وبأسه يمكن يخطي الدرب وينطح الجدار

انا وين رحت ؟؟؟

قبل أكثر من عشرة أيام سمحت الحكومة بفتح البوابة البحرية أما الخروف السواكني ولكن الخروف العملاق لم يصل بعد ولم تكتحل أعيننا برؤية وجهه المميز وشخصيا أنا لاأحبه لحما ولكني أحبه كبشا محبوبا إقتصاديا فقدومه سيبعثر أوراق تجار الغنم ويشفي البشر من جنون البطر في أسعار الغنم والبقر فالناس تنتظر بفارغ الصبر إطلالة الكبش السواكني

فشغل الناس الشاغل الآن هو التصاعد المقلق في أسعار الغنم فالأضاحي ستصل أسعارها إلى أرقام فلكية قياسا على إمكانيات الأفراد متوسطي الحال خاصة الذين لديهم
فرق من موتاهم تتطلب أضحياتهم عدد من خمسة إلى سبعة رؤس من الغنم وربما أكثر ومنهم محدثكم

فقد فكرنا في البدائل كالجمل والثور اللذان يغني واحدهما عن سبعة كبوش مقابل سبع أضاحي للمضحى لهم ولكن مشكلتنا بين الجمل والثور تنحصر في نحر الجمل وذبح الثور حيث ستكون المسالخ والمطابخ في حالة استنفار قصوىوالجزار حينها يسوى وزنه سكاكين وسواطير وحتى أدعياء الجزارة يشوفون شغلهم وبعضهم من شدة احترافه ربما ذبح الخروف من خلف رقبته وليس من نحره وكله ذبح إسلامي
هذا الزحام الشديد على مستوى الخراف فما بالك بمن معه بعير أو ثور فمعضلته الكبرى كيف يسوق يسحب ثورا ويقود جملا ؟؟

فعلى المستوى الشخصي وبعد مداولات ومماحكات وبعد استبعاد فكرة ذبح الخراف بقي أمامنا الخيار بين الجمل والثوروأخيرا استقررأينا على الثور وخروفين فالموقع المثالي موجود في بايكة سيارة والونش موجود وبعد التخطيط لكيفية تجهيز مقصلة الذبح و نصب مشنقة كراعين الثور بعد الذبح

بعد ذلك قررنا أن نأخد دورة نظرية في أحد المسالخ الكبرى حيث تربط قائمة الثور الخلفية اليمنى في عقلة الونش ومن ثم رفعها رويدا رويدا حتى يضطجع الثور بمساعدة الشجعان على جانبه الأيسر ومن ثم يتم ذبحه ولكننا نحرص على تلافي مشكلتين كبيرتين

وقد رأيتها في مقاصل البقر مرات كثيرة وهي إفلات قائمة الثور من الخطاف أثناء ذبحه فاستنبطنا فكرة تقييد قائمتيه الأماميتين من باب الإحتياط والإحتياط واجب وقد يهون على الواحد التصدي لسبع ولا يتصدى لثور نصف مذبوح واللي مايخاف ما يسلم ومحدثكم سبق أن فر فرارا وقفز الحواجز قفزا وهو يهرب من ثور نصف مذبوح بحجم سيد قشطه وتكرر معي الموقف ثلاث مرات وكله بسبب الفضول


أما المشكلة الثانية التي ستواجهنا فتتمثل في اللغبوب المتد لي من طول عنق الثور التي تحول بين السكين ونحره ولكننا توصلنا إلى حل لهذه المعضلة لن أخبركم به إلا بعد نجاحها بإذن الله تعالى