بداية ... فليعذرنى اهل بلاد الحرمين بانشغالنا عن كربهم وحربهم فنحن مشغولون بكرة القدم
وليتجاوزوا عن زلتنا بتجاهل محنتهم ودماء شهدائهم فكأس العالم ينادينا

واسمحوا لى ان اضيف ذلك الموضوع الذى كان كرد على احدى المواضيع فى الساحة الرياضية ولكنه كرسالة لم تصل فاحببت ان اضيف اليها ونجعلها موضوع مستقل




]
"]


اسمحوا لى أن انقل لكم مشاعر المصريين بصفتى واحدة منهم

وأعتذر ان تلك ستكون المشاركة الاولى لى فى ذلك المنتدى بعيدة عن مجاملات المنتديات والكلام المرتب

اخوانى الافاضل .....

نحن لسنا فى حالة حزن لأن الكرة دخلت فى الشباك بين القائمين واحتسبت هدفا !

نحن لسنا فى حالة حزن لان الجزائر ذهبت الى كأس العالم ونحن لا !!!

نحن موجوعون !!

اهل مصر كلهم يتألمون...

بجد بجد بنتألم

واسمحوالى ان تكون مشاركتى بالعامية المصرية فهى لغتنا فى التعبير الصادق عن ألمنا ....



احنا موجوعين مش عشان احرزت الجزائر هدفا فى مرمى مصر وذهبت وحدها الى المونديال

احنا موجوعين عشان وجدنا الموضوع دخل فى الجد ولم يعد مباراة كرة قدم ..لم تعد لعبة !!!

احنا موجوعين عشان اتضربنا فى السودان من اخواتنا !!

احنا موجوعين عشان فى بنات مصريات اتصلت تستغيث من ان الشباب الجزائرى المسلم محاوطهم فى الخرطوم ولجأوا للاحتماء بالاسر السودانية !

موجوعين
 عشان سعر السكبنة فى السودان تضاعف بعد نزول الجزائريين للبلاد !

موجوعين عشان مشجعين الجزائر وصلوا فى طيارات الطيران الحربى !!

موجوعين عشان شبابنا اللى عنده 18 سنة صحى فى يوم الصبح لقى كل الدنيا بتقول العرب بيكرهوا مصر !! وهو ميعرفش ليه ؟!!!

موجوعين عشان الناس بتقول البادى اظلم !!

حتى بفرض ان حادثة اتوبيس الفريق الجزائرى صحيحة وفعلا فى شوية شباب قذفوا المنتخب بالحجارة !
محدش مننا قالهم برافو عليكم .. احسنتم !!

وموجوعين ان لما الهمج والغجر اعتدوا على المصريين فى السودان محدش قال ده حادث فردى ونشجبه ولا حتى ندينه !!

لو الاتوبيس اتقذف بالحجارة ده شىء مؤسف لكننا مش موافقين عليه ولا نؤيده

احنا اذا كان اللى عمل كده من عندنا شوية عيال اتنوا اللى عملوا كده من عندكو كثير وبتأييد شعبى !

وجعنا اوى ان محدش قال ان دول قلة وشرذمة من اهل الجزائر !! زى ماحنا قلنا على المعتدين على الاتوبيس انهم لا يمثلونا وانهم قلة وشوية عيال !

اللى وجعنا انكو مقلتوش دول مش مننا ومش موافقين على اللى عملوه ؟؟؟!!!
محدش استنكر ولا حتى شجب كعادة العرب !!!!

موجوعين انكو قلتوا اننا قتلنا سبعة مشجعين جزائرببن على الرغم ان محدش مات !!

ممكن حد يقف لحظة ويفكر الصحيفة دى المفروض جزاءها يكون ايه ؟؟؟؟

صحيفة كاذبة تنشر صور لقتلى مزيفين لاشعال نار الفتنة !!!!

ايه مصلحتها ؟؟ ومين هيحاسبها ؟؟

(الفتنة نائمه لعن الله من ايقظها ..))

محدش مات......... محدش مات من الجزائريين فى مصر .


وجعنى اوى ان كل اهل مصر بيقولوا الحمد لله اننا اتغلبنا لاننا لو كنا كسبنا كنا هنرجع فى توابيت

وجعتنى اوى انكو فى نشوة الانتصار وسكرة الفوز تجاهلتوا مشاعر اخواتكو اللى تغيرت من ناحيتكو

وجعتنا اوى اننا بنتعاير بفيفى عبده !!! الفاجرة الراقصة !!!

ماذنبتا فيما اقترفته !!!
ليه مش قادرين تفهموا ان الممثلين والمشاهير دول طبقة ومصر كلها طبقة تانية
ليه بتحكموا علينا من افلامنا ؟!!!!
ليه متخيلين ان كل نساءنا ليلى علوى وكل رجالنا عادل امام وكل بناتنا روبى ؟!!!!!

مصر زى ماهى بلد فيفى عبده هى كمان بلد البنت المنتقية اللى سنها لم يتجاوز الثانية عشر التى وقفت امام شيخ الازهر
على الاقل البنت من طبقة الشعب انما فيفى عبده مش مننا !


عمرنا ماعايرنا اللبنانين بهيفاء وهبى !!
وعمرنا ماعيرنا السعودية بعارضة الازياء التى لاتعرف كيف تستر جسدها .!

ليه بتعايرونا بسياسة حكومتنا واحنا عمرنا ماعايرناكم بها

مش اهل مصر هم اللى قفلوا المعابر ايام حصار غزة ..احنا صرخنا وشعبنا كان بيغلى وقلنا افتحوا المعابر

ماعيرناش شعوب بسياسات حكومتها لانه لاذنب لها فيها .

وماعايرناش نساء تونس العفيفات بان حكومتهم تعادى الاسلام وتمنع الحجاب !

ولم نعاير بلاد الحرمين ان وزير خارجيتهم قال لا يمكننى منع البترول عن امريكا فالبترول مؤثر فى اقتصاد السعودية !!

فنحن نعلم انه ليس هذا راى الشعوب !! ولا صوتها !

وجعنا كلمة (( يااكلى الفول !))


ومنذ متى كان تقسيم رزق الله لارزاق عباده فى الارض محط سخرية ؟؟
وان كان الطعام معيرة لكان اوجب ان نعاير الصومال والنيجر ونقول لهم (( ياللى مش لاقيين تاكلوا !!)))


وجعنا ان تعليقات الجرائد واليوتوب كلها منصبة على فكرة اننا غير متقبلين للهزيمة !!

وجعنا ان المصريين فى الجزائر اتهددوا ومصالح المصريين اتكسرت واتخربت واهالينا واخواتنا رجعوا من الجزائر بعد تلقى تهديدات بالاعتداء عليهم وعلى اهاليهم ونساءهم !!! وشعب الجزائر صامت او مشغول بالاحتفال بالنصر الساحق وفتح عكا !


ووجعنا ان لاعبتنا وجهازنا الفنى اكلوا وجبة مسممة على ارض الجزائر فى الفندق !!! هل ذلك هو اكرام الضيف ؟؟

كم مسؤل وشخص مرت عليه هذه الوجية قبل ان تسمم شبابنا ؟!!!!
ومع ذلك لم نقل ان كل الجزائريين يريدون لنا الموت


احنا كنا فى استاد القاهرة 80 الف مشجع ومشجعى الجزائر كانوا الفين فقط !

ومع ذلك لم يمسهم احد بسوء بالعكس......
تطاولت بعض بناتهم بحركات حتى الان لااعرف معناها الا اننى اعرف انها حركات عيب !
(وبالطبع لا مساس ببنات الجزائر المحترمات نحن نتحدث عن حادثة فردية ))

ومحدش مننا قال كل بنات الجزائر على نفس الشاكلة !!



اكثر حاجة وجعتنا انكو مش فاهمين مين اللى له مصلحة فى الفتنة !!!

ممكن حد فيكم يسال نفسه ليه السفارة الجزائرية بعتت استفسار رسمى عن عدد القتلى الجزائريين فى مصر على الرغم من انه لااايوجد قتلى من الاساس !!!! وهم يعلمون ذلك جيدا !!!!


حد ممكن يجاوبنى ليه الصحيفة الكاذبة ماتحاسبتش ؟!!! على صور القتلى المزيفة ؟!!!

عارفين ليه ؟؟؟

عشان حكومتنا وحكومتكم اللى عمرنا ماكنا ملتفين حولها اخيرا كسبت ودنا وصداقتنا !!

الجزائرين الذين لم يكونوا يوما راضيين عن حكومتهم اصبحوا الان ملتفين حول قيادتهم واختزلوا كل معانى الوطنية فى كرة القدم !!

ونحن ايضا التففنا حول حكومتنا لتأخذ لنا حقنا المسلوب وحق اولادنا اللى فى الجزائر !!!



اذا كان على الفوز فى المبارة .............. فمبروك عليكم الذهاب لجنوب افريقيا

لا مصر ولا الجزائر ستأخذ كاس العالم !!! _ الا ان يشاء الله _

واقصى امالنا كان هيكون الخروج من دور 16

وارجو انكوا تفهموا فعلا ماهى المؤامرة ومن يقف خلفها ومن المستفيد !!!؟!





وبما إن اغلب تعليقات الاخوة الجزائريين فى المنتديات كانت كلها بتدور حول فكرة رد واحد ألا وهو :

(ماحدث فى السودان كان رد فعل.. واكتشف الجزائريون بعد ذلك أنه لم يكن هناك من الاصل.. فعل !!)

...........فلم يقتل منكم أحد على أرضنا ...... وبالتالى فان رد الفعل غير مبرر ومبنى على باطل . واحنا اتظلمنا .

وبما أن شعب مصر ماشى فى الشارع بيكلم نفسه
(هو ليه الجزائريين عملوا كده ؟؟!!) = حقيقة فعلا.

وبما أن شعب مصر لحد امبارح لم يكن مدركا لابعاد المؤامرة ولم يكن يعرف انكم تظنون أن لكم قتلى عندنا فهم متعجبون
( لم كل هذا الغضب !!!)

وبما أن الحدوتة كلها من أولها لاخرها طلعت لعبة .. ولعبة قذرة .. وعلى أعلى المستويات .
فعايزين نسمع منكم حاجة تزيل الوجع

عايزين نسمعها منكم

عايزين نسمع :( احنا مش موافقين على اللى حصل فى السودان )

عايزين نسمع :( احنا اتضحك علينا زى مااتضحك عليكو )

عايزين نسمع :( احنا ضد البلطجة )

عايزين نسمع :( احنا لنا وقفة مع جريدة الشروق ..اللى باعت بارقام خيالية مكانتش تحلم بيها على حسابنا وحسابكم)

عايزين نسمع :(احنا اسفين على اللى حصل فى السودان واللى راحوا دول مش مننا ومش دول شعب الجزائر المسلم ومش بيمثلونا )

عايزة اسمع لاول مرة فى حياتى كلمة :( نشجب ونستنكر !!)

عايزين نسمع :(متخافوش على ولادكوا وأخواتكوا اللى فى الجزائر دول فى عنينا .. وهنوضح سوء التفاهم واحنا أوعى من كده )

عايزة اسمع :( شاب جزائرى مسلم يقولى : لو كنت موجود وبنات المسلمين متحاوطين بالسكاكين والمطاوى كنت أنا اللى هدافع عنهم بنفسى )


أقسم بالله العظيم انى كتبت مشاركتى وأنا أبكى من الوجع والألم .

وفى النهاية

على الرغم من أننى لا أستمع الى الاغانى ولا أتابعها ولا أحبذ الاستماع اليها الا اننى لم أستطع منع نفسى من اضافة ذلك المقطع لتلك الاغنية

فــــــــــوقــــــــــــــــــــوا


http://www.youtube.com/watch?v=WReBMfj5PVw&NR=1




وعذرا بلاد الحرمين فنحن مشغولون عنك بلعب الكرة
وعذرا ياقدسنا فكأس العالم ينادينا .


!
[/size]
[/