إضحك مع العرسان

**المغتربه** · May 6th, 2008, 23:24

أولاً
تقول الاخت زياراتها للمطاعم مع اهلها كانت قليله
المهم اول ايام زواجها دخلت مع زوجها المطعم قال زوجها للجرسون جيبلي منيو.. وسألها وش تبين؟ قالت مثلك ابغى منيو.. زوجها تسدح من الضحك وهي تقول احسبها وجبه او طبق معين
ثانياً
وحده كان الخجل ذابحها تقول زوجها كان كل يوم يجيب بهالاكل في الفندق وهي البنت مسويه ما تشتهي وما تحب ومن هالكلام وما غير تناظر فيه وهو يلهط بالاكل
وذاك اليوم بالفندق جا الغدا وكالعاده زوجها سالها يلا يا حياتي تعالي نتغدى قالت لا كل انت بالعافيه انا ما اشتهي وهي مييييييته جوع وشبع الرجال ودق الباب ذاك الوقت المهم زوجها طلع وغاب اشوي وهي قالت في نفسها اكيد انه بيطول وما قدرت تمسك نفسها ومن كثر ماهي جوعانه ماسكه الدجاجه بكبرها وتأكل فيها !!! وفي هذه الاثناء وش صار >>> طب عليها عريس الهنا وهي متلبسه بالجرم المشهود ومقبضه بيدينها الثنتين في الدجاجه والفم مفتوح عالااااااااااااااااااااااخر وقال لها ها اشوفك منتي مشتهيه
وهي خلاص دوروها مسكينه ما تلقونها
ثالثاً
في وحده شعرها دايم يحتاجله سشوار مهو بناعم المهم السشوار اخترب مادري وش صار فيه عاد هي ذكاءها قادها لفكره جهنميه وش سوت
راحت على طاولت الكوي وانسدحت وهاتك يا كوي بهالشعر
وبرضه زوجها سوالها صادوه يوم دخل واختنا في الله تكوي منسجمه
الرجال انهبل على باله تزوج وحده ماهي صاحيه
رابعاً
وهذا موقف لوحده بشهر العسل تقول كنت مسافره خارج السعوديه واشتهيت مطعم عربي الله لا يعيدها المهم لقينا مطعم لبناني ورحنا له وحطوا لنا طبعاا قبل ما نطلب زيتون ومخلل
وجا الجرسون واقف فوق روسنا ياخذ الطلبات وزوجي يقوله الطلبات وانا احاول اصيد الزيتونه بالشوكه
مير تطير الزيتونه وتصقع وجه الجرسون وهو ياخذ الطلبات
قام قال عنا في لبنان ناكل الزيتون بايدنا
عاد مير ما اسكت وأنثبر
قلت غريبه حنا عنا بالسعوديه نصيدها بالشوكه
وماسكها زوجي علي للحين كل ما شاف زيتون قال هاه بالشوكه والا بيدك خخخخخخخخ
خامساً
وحده تقول انا متزوجه ولد عمي
و أول ما تزوجنا رحنا بريطانيا منها شهر عسل ومنها هو عنده دوره
المهم تقول مره دخلنا المطعم واخذت المنيو وقعدت اناظر الكلام كله انجليزي وانا ما اعرف ولا حرف بالانجليزي
تقول هو اختار والجرسون واقف عند راسي يحتريني اختار قالي زوجي تبين اساعدك بالاختيار
قلت ليش طايحه من عينك انا اعرف اختار المهم تقول اخترت طلب محطوط في اطار وحركات
قلت اكيد هذا شي حلو وقلت ابي هذا قال زوجي متاكده قلت ايه اصلا من زمان اطلبه لما كنت اطلع مع أهلي
تقول قالها طيب ابشري وهو يضحك ويوم جابوا الطلب هو مكرونه وحركات وانا وجبة أطفال !!
سادساً
يقولون فيه وحده تستحي من زوجها بالمرة تضايق الزوج وكلم خواته يكلمونها وكلم أم زوجته كذلك المهم أزعجوها امزحي مع زوجك أمزحي والعـبي واضحكي معه قالت ما أقدر المهم طولوا عليها بالكلام
وفي مرة من المرات وهي مع زوجها سبقها زوجها بينزل مع الدرج قالت فرصه امزح معه شوي علشانه مايشوفني المهم دفته مع الدرج الا وهو في آخر الدرج متشقلب وقاعد يون ويصيح من الألم قالها وش فيك كذا جلست البنية تصيح وتقول كله من أهلك يقولون امزحي معه وهذي آخرتها
سابعاً
بقولكم اليوم عن وحده اعرفها اول ايام زواجها تقول كنا طالعين واحتجت الحمام مرررررررررره بس مستحيه اقوله وهو شكله ماعنده نيه يروح لمكان فيه حمامات المهم تقول عجزت اتحمل وجلست افكر باسلوب حلو ما يخرب برستيجي عنده قلت خلاص بقوله ابغى دورة المياه احسن من كلمة الحمام
تقول وانا ميته من الفشله قلت ابغى اروح لدورة الحمام مادريت الا الرجال يضحك ويقول يا عيني على الاتيكيت
ثامناً
هذي وحده تقول اول ما تزوجت كنت ادرس وكان يوديني زوجي للجامعه وياخذني ..
المهم .. انا جالسه انتظره وكنت واقفه في الشارع واشوفه بعد كم سياره .. المهم جلست استـناه
يوم وصل عندي .. وانا امشي بغنج الا واطيح ذيك الطيحه طراااااااااااااااااااااخ
جلست على ألارض ما يشوف الا راسي من عند شباكي جالسه اناظره ولا اتحرك ..
وكان الشارع مليان رجاجيل وبنات
واركب في السياره وهو ميت من الضحك واجلس اصيح قلت ما تعرف تسمي علي !!
وإليكم هذا الموقف الذي سمعته:
وحدة تقول اول ما تزوجت طحت عند باب المطبخ وانهبل زوجي وبسم الله عليك سلامتك حياتي وبعد مرور سنة طاحت بنفس المكان قالها عمى ما تشوفين!

**نجم سهيل** · May 6th, 2008, 23:56

المشاركة الأصلية كتبت بواسطة المغتربه

أولاً
تقول الاخت زياراتها للمطاعم مع اهلها كانت قليله
المهم اول ايام زواجها دخلت مع زوجها المطعم قال زوجها للجرسون جيبلي منيو.. وسألها وش تبين؟ قالت مثلك ابغى منيو.. زوجها تسدح من الضحك وهي تقول احسبها وجبه او طبق معين
!

اصبري اصبري وعلى الهون ياالمغتربة وقبل ما اقرا الباقي
وشهو ( منيو ؟؟؟؟)

**مزاااج** · May 7th, 2008, 01:09

ابغى اروح لدورة الحمام

هذي خبصت الدنيا ههههههه

اصبري اصبري وعلى الهون ياالمغتربة وقبل ما اقرا الباقي
وشهو ( منيو ؟؟؟؟)

ماعليكيِ يالمغتربة هذا حبيب الكل ابو سعود استغرب الكلمة مايعرفها لانه من شبّابين الضو ومكرمين الغريب قبل القريب مهو من اللي يروحون للمطاعم .

**المغتربه** · May 7th, 2008, 20:14

المشاركة الأصلية كتبت بواسطة مزاااج

هذي خبصت الدنيا ههههههه
ماعليكيِ يالمغتربة هذا حبيب الكل ابو سعود استغرب الكلمة مايعرفها لانه من شبّابين الضو ومكرمين الغريب قبل القريب مهو من اللي يروحون للمطاعم .

ياهلا أخي مزاج

ويسعدني مرور أبو سعود في كل صفحاتي

أكثر الله من أمثاله

**المغتربه** · May 7th, 2008, 01:01

حياك الله أخي نجم سهيل

(منيو ):قائمة الطعام

**نجم سهيل** · May 7th, 2008, 01:27

المشاركة الأصلية كتبت بواسطة المغتربه

حياك الله أخي نجم سهيل
(منيو ):قائمة الطعام

مهو من اللي يروحون للمطاعم

.

والله ياجماعة الخير أني ماعرفت هالكلمة الا منكم خاصة
وانا ماعندي علم بالجليزي
وبالمناسبة فإن أكره ما إلي طعام المطاعم ومن فرط كراهيتي
له يصيبني الوسواس الخناس إلى درجة الشعور بالمرض وخاصة
السلطات التي لاتدري عن يد من أعدها وأين كانت يده ونوعية الدهون
وماهيتها

وأسافر عادة بالسيارة بين الرياض وجدة وطوال الطريق يستحيل أن
آكل في مطعم ولكن في الرياض الله لايخلينا من بيوت ومطابخ الأقارب
والأصدقاء
شكرا لكما وأعتذر عن إثارة هذه البلبه اللي سببها جهلي ( بالمنيو )

**سلمان السلمي** · May 7th, 2008, 01:49

السلام عليكم...
نكت رائعه ومضحكه
الله يعطيكي العافيه
...

**المغتربه** · May 7th, 2008, 20:18

المشاركة الأصلية كتبت بواسطة سلمان السلمي

السلام عليكم...
نكت رائعه ومضحكه
الله يعطيكي العافيه
...

يعطيك الف عافيه أخي الغالي على المرور والتعليق

**المغتربه** · May 7th, 2008, 20:17

المشاركة الأصلية كتبت بواسطة نجم سهيل

.

والله ياجماعة الخير أني ماعرفت هالكلمة الا منكم خاصة
وانا ماعندي علم بالجليزي
وبالمناسبة فإن أكره ما إلي طعام المطاعم ومن فرط كراهيتي
له يصيبني الوسواس الخناس إلى درجة الشعور بالمرض وخاصة
السلطات التي لاتدري عن يد من أعدها وأين كانت يده ونوعية الدهون
وماهيتها
وأسافر عادة بالسيارة بين الرياض وجدة وطوال الطريق يستحيل أن
آكل في مطعم ولكن في الرياض الله لايخلينا من بيوت ومطابخ الأقارب
والأصدقاء
شكرا لكما وأعتذر عن إثارة هذه البلبه اللي سببها جهلي ( بالمنيو )

حياك نجم سهيل منور صفحتي اخي الكريم