بســم الله الـرحمــن الرحيــم
السلام عليكــم ورحمـة الله وبركاته ،،

يقولون المسولفين ان هذي القصه حصلت بين بنت اسمها سعدى والفارس المشهور خلف بن دعيجا(مهودي على روس الفطر) ,من شيوخ قبيلة الشرارات .وسعدى تسمع عن غزوات خلف وبطولاته , فأ اعجبة به من صيته الطيب وشجاعته وكرمه , وتمنت انه تشوفه وفى يوم من الايام شافته واعجبتها هيئته وشكله زياده على طيبه وكرمه و فروسيته رغم كثرة مغازيه ومايلحق الفارس فى المغازى من تعب وشموس , وهى شافته عن بعد وهو ماشافها ولايدري عن غلاها له .و فى يوم من الايام غزى خلف بن دعيجا , على قبيلة البنت , المهم , حاصرو اهل البنت القوم وكسروهم , و خلف ابن دعيجا اسر بدون منع! والأسر بدون منع يحق للآسر في هذه الحاله اما قتله او العفو .. او طلب فديه , كلن وشيمته!وكان خلف دايم يغزيهم وياخذ منهم , ويتمنون الخلاص منه على شان يرتاحون منه ,لـكنهم يوم طرحوه , مايعرفون شكله!؟وناويين اذا كان خلف انهم يذبحونه لأنهم ولوه بدون منع!واذا هو من عرض هالناس يتركونه .. لأنهم قبل يكرهونه بسبب شراسته في قتالهم ,لاكن الجماعة مايعرفون شكله وشكوا انه خلف لأنهم شافوا منه فعل عظيم قبل الأسر , لكنه أنكر انه خلف بعد ماتمكنوا منه. واحتاروا فيه , وتذكرو ان سعدى تعرف شكله , بس مايدرون انها تعزه وتوده !قالوا نسأل سعدى لأنها هي الوحيده اللي شافته؟!ويوم جتهم قالوا لها هذا خلف؟وهي عرفت انهم يبون يذبحونه.وهو عارف ان مصيره القتل اذا قالت هذا خلف!والرجال محاوطينه يبون ياخذون راسه وهو وجهه اسمر من كثر المغازي ..ضحكت وقالت : تحسبون هذا خلف! . لا هذا عبد من عبيده؟!قال اخوها : خلوا هالعبد يولي ...

قال خلف على هونكم مانى عبد وقال هذه االابيات :-

سنٍ بدالي ذوق سكـر ولاذيـق
......................... وعينٍ قزت من عقب ماهي قبالي
وابدت علي بريطمٍ به زواريـق
............................. وبمفرق القذله سـواة الهلالـي
استغفري يابنت يام العشاشيق
............................ عن قولك اني من عبيد الموالي
حنا عبيد الرب سيد المخاليق
................................ ومماجرى يابنت هذي فعالي
انا خلف زبن العيال المشافيق
................................ لياحل في تال الركايب جفالي
يابنت حماي النضا ساعة الضيق
.............................. شيخ تخضع له سباع الرجالي
حمايهن في ساعة ييـبس الريق
............................... ومن دورن يلقان عندالتوالى؟!
انتم خزايزكم طوال السماحيق
............................. وخزايزي شمط اللحى والعيالي ..!!
فلماسمعوا قصيدته عرفوا بانه (خلف) فاعجبتهم شجاعته واطلقوا ســراحه وخــرج منهم معززا ...
ارجو ان تنال استحسان الجميع ,والمعذرة عن كل نقص او تقصير ...والسلام عليكــم ورحمـة الله وبركاته ،،