يوميات شيخ النظر

بسم الله الرحمن الرحيم

السلام عليكم ورحمة الله وبركاته،،،



تقاسموه


ذبحونا هالعيال الله يصلحهم ويهديهم متقاسمين البيت عاد من زينه جحر

هالضب...



نمر حاط شبك وفيه عناقين وتيس وكاتب عليه محمية طيورمهدده

بالإنقراض تمويه...



أبو جاسم مربي حمام في صندقه وكاتب عليها حديقة حيوانات مفترسه...



والبرهي حاط لي شبك فيه دجاج وجنبه شبك فاضي لعانه وكاتب عليها

مخططات للبيع بالمزاد العلني...



والغاليه شبك وزارعه فيه بصل ونعناع وكاتبه عليه محميه روضة شحيم...



وجميله شبك كبير مكتوب عليه أبتعد 100 قدم ناقلتها من وايت بنزين تراه

مكهرب بمليار واط ملكيه خاصه وعليه نحلتين تدور سانين أشواكهم...



وتوته ناثره ألعابها ومطوقتها بالمراكي والمساند وتقول شاليهات في البر

الليله 1500 ريال وفاتحه الخزان للي يبي يسبح...



وأم نمر منثره القدور في البيت وكاتبه عليهم بليلة وذره وفشار على عشره

الكاس...



والخدامه بالمكنسه الكهربائيه تغبر على البيت كلما ماشافتنا جالسين رايحه

جايه...



وأنا قاعد على زلفة الباب معي بروشور مكتوب فيه صيف بيتنا أروع من

المسيار على الجيران أتصل على الهاتف الموحد

9200000000000000000000000000000


عشان تعرف وين بتنغث الليله...

والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



عيالنا والمقيمين


دقت علينا أم نمر بعد الصلاة وقالت خلص البصل كانك تبي غدى جب معك

وأتذكر أصحاب سيارات من عيالنا المثابرين يبسطون بسيارتهم ويبيعون

خضار ولايأخذون منك إلا ريال مكسب لا ويحمل لك البضاعه نفس خفيفه

وضرساً ضاحك وتوني وقفت إلا وتجي ذيك السيار الصفراء (كنها علبة

فيري) اللي مكتوب عليها لعانه في مدينة الرياض لأني ماكنت لابس

النظارات فيبدو ماقريتها زين...


ينزلون منها شباب (المتميلحين بأسم النظام) معهم جوالات كبار سود

سبيكرها عالي قال للبياع هات إثباتك وأستمارة السياره وصادروا بضاعته

وأنقلبت أبتسامة الضعيف لنفثات كأنه يقرى على نفسه....


إلا وينط أبوجاسم قال ليه يأخذون بضاعته ولايحاسبون قال نمر هااااااااع

إلا هو اللي بيحاسب مخالفه تقضي على ماجمعه في سنه الله يهدي هالعيال

طالت ألسنتهم الله يصلحهم...


ونتجه للمول لين نفس الخضار ملزق عليه باركود وسعر وكيسة البصل

بثمان طعشر ريال والضعيف يبيعها بسبعه وحدى عشر ريال حلال يامهلكة

المستهلك وفيه عند الخضره شامي وجهاً ودر شكله مابعد غسل وجهه من

البارح قلت ممكن تحمل لي الكيس قال شووووووووو مالك معاق (وألتفت

بسرعه قلت ولد أم مالك الله يمسيها بالخير) وطلع مالك حق المنتخب قلت

لاسمعت أنه بيلعب المبارة الجايه قل شووووووو هالرواأن على هالصبح

والساعه وحده الظهر ماعلينا هالشامي معها ماجستير فيزياء نووويه

وباكالوريوس أحياء دقيقه ودارس ثانويه صناعيه عشان يتمكن من بيع

الخضار والغبن جاي بفيزة راعي ولاهو على كفالة راعي السوق...


تعوذت من الشيطان وحملة البصل ورحت أحاسب إلا وأشوف موقف

سأذكره لكم لاحقاً....


والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



دجاج بلاديك


الديك حيوان لابس شماغ (العرف) منسفه بنت البكار ويلبس ثوباً مزركش

وملون (هذا البلدي الأصيل ولد الحمايل) أحسن من الرومي الأبيض اللي

رزته بالكيماويات وكلاهما شنبات يعني عندهم غيره غير طبيعيه واحدهم

مايرضى يشاركه في الدجاج أحد وإذا كنت ماتعرف بروتوكول تربية الدجاج

وحطيت ديكين راح تلاقيهم مضارب (كأنهم عيالنا في الطلعه عند المدارس)

لحد مايذبح واحدهم الآخر...


ولوحظ في الأونة الآخيره أنتشار آخر للهيوايات السابقه فقد أستعاض

الناس عن المراسله بالبريد إلى المراسله بالإيملات والأس أم أس والوسايط

المتعدده بالجوالات وبدلاً من الطوابع البلوتوثات...


وعاد شبابنا صاروا يتنافسون على جمع الطوابع قصدي البلوتوثات بشتى

الطرق والوسائل بعد وحده الوسائل (جازت لي) المهم وأشوف مع نمر في

جواله (يعني تراني متابع عيالي) أثنين هنود يمشون لابسين وزره (وزار

ولونقي بالهندي) ووراهم شباب وواحد يصورهم المهم ويجي واحد من

شبابنا ويرفع الوزار إلا بانت محاشم الهندي عزكم الله...


اليوم من صلينا الجمعه أنا ونمر وأبو جاسم بيجيني واحد مسوي نفسه

متابع ويقول وين البرهي؟؟؟ أقول أنك مامن أحد لأن البرهي ذكرت سابقاً

أنه حرك وعمره خمس سنين وعنده هيوايه عجيبه لما دخل للروضه

مايشوف ناس إلا ويعدهم ولين راح معنا للمسجد طلع من الصف وجاء

جنب الإمام وقعد يعد المصلين...


المهم ونلقى في أحدى المولات ثنتين من فصيلة البقر اللي لابسين فساتين

سود (راجع العبايه الإسلاميه) يتضاحكون عند الكاشير والسواق واقف

بوزاره (الوزره) ينتظرهم عشان يشيل المقاضي وفاتح الصدر والشعر

بربطه وحاط بكله يعني شباصه يعني مغاط يعني ذيك اللي تسوي كعكع في

الراس اللي لين أنكسرت تصير دبق...


وصدق من قال لاتأخذ معك بزر يفشلك...


ويصيح نمر يباااااااااااااه لين كل المجمع شافوني كني فرحان أني أبو قلت

سم وش عندك قال السواق ترى ماعليه سروال تحت تنورته (الوزار) قلت

اسكت قال والله العظيم زي البلوتوث اللي مسحته من جوالي ويسمعونه

البنات ويركضون لسيارتهم وأن وعيالي لسيارتنا قلت لازم نتابعهم ونكلم

راعي البيت (يقال أننا عندنا سر نوووي) وشوي إلا هم دخلوا حارتنا عاد

حنا في الرياض يدوب تعرف جارك بوجهه لما تسلم عليه وأنتم رايحين

للمسجد بس هم في الشارع اللي ورانا عشان كذا ماعندي له سفاره في

بيتنا(أحد عياله اللي يعرفون عيالي وإلا زوجته اللي تعرف أم نمر) المهم

وألقى رجال في الخمسه والأربعين (ماأنتب سهل يالفطين حدد عمره باليوم)

ويوم دخلوا الحريم وقفت عنده وأبتسامتي كانت أكثر شئ متواجد في

خشتي وقلت السلام وعليكم وقال وآثار الإستغراب باديه على محياه رد

السلام إلا ونط نمر ترى سواقكم ماعليه سروال تحت تنورته (الوزار) قلت

أسكت قلت ماعليش أناااا إلا ويعصب والسواق ينزل المقاضي بدون أحم

وإلا ياولد فقال وش دخلكم هذا الضعيف ماقصر يشتغل في يوم راحته

وبعدين ملابسه ماتشوفها تغسل وناشرها جنب الباب قلت طيب آسفين

ومشيت وخليته وقلت سبحان الله حافظ حقوق العامل وناسي حقوق الله...


آآآآآآآآآآآآآآآآآآآآآآآآه ياحليلك يالديك والله أنك عندك دم وغيره على كثير من

ربعنا...


والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



سعودي كخخخخه


وش السر أن السعودي مايهضم السعودي ودايم يقاشره والسعوديه تتغطى

عنه وتفتش للأجنبي ولاتواطن حتى تشوفه يترزق الله...



اللبناني(شيعي وإلا نصراني) ياروووووه ألبي ومن تقفي يتفل عليك...



الشامي (درززي) تأبريني ومن تقفين شو هالزباليي(حاشاكم)...



وأبو يمن (زيدي) عمي عمتي ومن تقفي يتنهددددددددددددد....



والبنغالي (جرذي بوذي) يبيعك الشئ ومن يحطه في الكيس يشقه وإلا

يخربه ومن تقفي يقول كلووووه هزا مافيه إنسان (حاشاكم حيوان

مشفره)...



والمصري (نصراني) حدرتك وحدرتيك ومن تقفي يبي لك كرتون حق وجع

الراس ويالله يروح الصداع.....



وغيرهم ياما في الجراب ياحاوي في سرك شوارع الرياض.....



طبعاً التعميم سمة الجهلاء إلامن رحم الله....

والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



رف الحمام


فيه صندوق جنب باب بيتي من طول ماهو مهجور لقيت فيه اليوم حمامه

بيضت فيه وقالت قديمك نديمك أنا من سلالة الزاجل أسرع من الدي أتش إل

وجزاهم الله خير حطوا لي رف عشان أعيش فيه...

والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



رحلة الشرقية


رحنا للشرقيه وجينا نستأجر جحر نمله غرفه مع المطبخ ودورة مياه

((وأنتم بكرامه)) بعد بحث وعناء من المكاسر بأربع ميه وخمسين

ياخييييييييييييموسم قلت كلها يومين وتو الراتب طالع نهيص ونتقشف

ماتبقى من الشهر...



ياأخي حلوووووووووه الخبر...



لكني لاحظت أنها تغار من الرياض أن مافيه بحر وهذي مشكله عندما تغار


مدننا الحبيبه من بعضها...



حيث قبل عدة سنوات وبعد ماخُسر على الكورنيش (كلمه من أصل غير


عربي وتعني ساحل البحر أو مواجهة البحر) أموال طائله بعد رصفه


وتشجيره ووضع أكشاك للبيع بسعر الدبل للمشروبات والمأكولات الخفيفه


ودورات مياه (حاشاكم) تفرغ مباشرة في البحر بين كل واحده والآخرى


حوالي خمسه كيلو وكل 30 كيلو متر تجد مسجد فقط لأداء صلاة الجمعه...



لاحظت الغيره العجيبه في هذه المدينه التي أسافر إليها منذ طفولتي حيث


بدأت تحجب اليحر وبدأت في إقامة مراكز تجاريه ومولات أمام المتنزهيين


(اللي جاي بقرشين بيتفسح فيهم يشتري بهم وإلا يرجع لأهله) بحيث أصبح


هدؤء البحر فنون العماره في جدران هذه المراكز والمولات واللي يبي

البحر يروح يدور عليه (واحد متميلح أصلاً وش نبي بالبحر وأنا عندنا

دراهم زياده نبي نصرفها) وأصبح الكورنيش لايرى إلا من على متن

الطائرات...


أخذت عيالي الحبايب ورحنا للبحر من عند الفندق يسار وفرشنا الفرشه


ونزلنا ترامس القهوه والشاي والعصيرات والسندوتشات وتونا بنقول بسم

الله إلا وصاحت توته (عمرها حوالي الثلاث سنوات) يبااااااااااااااااااه قلت

الله يستر لبييييييييييييييييييييه وشفيك قالت أبي حماااااااااااااااااام (وأنتم

بكرامه) وقامت تتراقص من الحسره وألقطها للسياره عشان نسافر لدورة

المياه (وأنتم بكرامه) وأمشي عشره كيلو ولالقيت دورة مياه (وأنتم بكرامه)

المهم وألبق على جنب وتصرفت ثماً مشينا لمكان وين كنا جالسين ولمار

جعت صاح البرهي وأنا بعد قلت أقول تاليتها في البحر يالله يانمر خذ أخوك

وخله يتصرف....


ومن بكره قالوا العيال نبي نروح نسبح ونصور بالجوال عشان نوري عيال


الحاره وأصدقانا في المدرسه أنا سافرنا....



ولما جاء بكره رحنا للثقبه لين المطاعم أكثر من عدد الناس وأدور لي

مطعم على قدي حبه بخاري (لأنه أرخص شئ وبما أنه في الرياض اللي

مافيها سياحه 24 ريال هنا قل بثلاثين) إلا ويقول الأفغاني ب 38 ريال قلت

ليه مطبوخه على الطاقه الشمسيه وإلا فيها زئبق أحمر قال مافيه كلام

زياده يبغى وإلا روح قلت لاوالله أروووووح والحسره تعتصر قلبي (ذا

القلب اللي كل شئ عصره) وأروح لمطعم ثاني إلا نفس الحكايه قلت (ياخي

طيب عطني من حق أمس عادي) أمزح وأدفع(يعني أحرم عيالي) حوالي

100 ريال على رز ومرق وبارد ومويه ونتوكل على الله....



وأتجه للعزيزيه اللي كانت بر ذيك الأيام ...



وطول الطريق بيوت بينا وبين البحر وإذا فيه أرض فضا تلاقيها مليانه


دبابات وخيول وبعاريين وسيسيات وبساطه على البحر يعني بتشتغل على


أذني إذاعة (يبااااااااااااااااااااااااااااااه عطني فلوس) قلت أروح لهاف مون


وخمسه وأربعين كيلو من الجامعات والمساكن والملكيات الخاصه لين

وصلت لمضلات على البحر (مير وتدمع عيني من الفرحه ماني مصدق أنه

مازال فيه بحر) وعلى طووووووووووووول أتأكد أن فيه دورات(وأنتم

بكرامه) مياه عشان مايتكرر موقف أمس والمهم حطينا الغدا وتغدينا ولما

جينا نغسلللللللللللللللللل (دننننننننننننننننان تم إيقاع موسيقي كنايه عن

الفزع) إلا دورات المياه موصده بسلاسل أعظم من السلاسل اللي على

محلات الذهب غادي الباب كنه (أندرتيكر) المهم قلت يالله ياشباب البحر

غسلوا وأسبحوا وأنبسطوا وعاد عيالي الله يصلحهم راقدين بلبس السباحه

ويفصخون ملابسهم ونطل على البحر لين غدى الشاطي كنه شقة عزوبيه

من الخلاقين وتوهم داخلين البحر إلا ويصيح أبو جاسم يباااااااااااااااااااااه

أنشقت رجلي غزتني قزازه وأركض للولد لين أخوانه واقفين ماطبوا قلت

الموضوع فيه إن وأشوف لين البحر كله قزاز وحاشكم بقايا أكل وأسيام

وشغلات عجيبه وتأخذ أم نمر أبو جاسم وتحط عليها قهوه ومسمار وتلفها

بطرف شيلتها وعيالي واقفين على البحر والدموع تملى عيونهم ولسان

حالهم يقول (غدار أعرفك يابحر دمعت أموجك تسل قزاز يطعن في

الرجل)....

والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



هويتي


من أنا...؟؟؟



ياللي تعرفني...



علمني...!!!



ويني أنا...؟؟؟



ووين الهنا...!؟



بحثي يألمني...



في صرٌه على الرف البعيد...



دورتني ساعات...



في صندوق الوارد من البريد...



مالقيتني آهات...



في كل سكه وطريق...



مالقيت غير الضيق...



يجمعني شتات...



لحظة سكات...



خلها تتذكرني وين...



أيه يامسكين...



لقيتك...



صدق لقيتك...



دمعه في العين...



تغرر شفاهي بكلمات...



تصرخ بي نسيتك...



لأنك أنت...



مثل ماأنت...



تغيرت الحياة...



وللحين...



في بيت ماسكنت...



والناس في قصور وفيلات...



ياغباك يامسكين...



من بسمني الصمت...



قمت وتوضيت...



أعوذ بالله من الشيطان...



ليمتى وأنا أحلم؟؟؟



لو حرمتني الدنيا بيت...



ماحرمنيه من صبري الرحمن...



أنا وكل مسلم...



في عاليات الجنان...


والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



حوار أب


في برنامج أبناؤنا كبروا ولابد نصاحبهم جاني نمر والولد بداء يكبر وتبان

عليه علامات النضوج وبماأن أبو نمر من جنبها فعرف يحاور الولد...



نمر : يباااااااااه وشهي الشدّة...!؟



أبونمر : هذي لعبة الورقة عند الفلسطينين والأردنين...



نمر : أممممم طيب وشهي الكسرة...!؟



أبونمر : هذا فن فلكلوري عند أهل الحجاز مثل الرديه عند البدوووو...



نمر : طيب وش الضمّة...!؟



أبونمر : الضمة هي الكنّه أو الحضنه أو العناااااق...



نمر : طيب وش السكووون...



أبونمر : هذي ماتعرفها يالثوووور هذا الهدوء اللي أتمناااااه في هالبيت...



نمر : طيب والفتحه...!؟



أبونمر : ياواطي ياحقيييييييييييير أنت ماينفع معك صحبة ولاحواااار هذي

حقت المتزوجين يابزر ياسافل...



نمر : والله أنك من جنبها يابوي.. طيب ليه حاطينها في كتاب النحو وكاتبين

جنبهم حركات تشكيلية للحرووووووووف...



أبونمر : يعني يالتسلب تصدق الكتاب وتكذب أبوووووووك يالعاااااااااق...



والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



قصة حكيم


في بداية الصيفيه جاب سواق كبير في العمر عشان يضمن أنه يكون في

حاله ولايتعدى على محارمه ومن جابه وهو يتقاسم وأياه حبوب الضغط

وأبر الأنسلين ومن مستشفى إلى مستشفى إلين بدت الدراسه فيموووووت

السواق وإنا لله وإنا إليه راجعون مطلوب 18 ألف ريال عشان يدفع

مصاريف التابوت عشان إرساله لأهله...



برضوه ماعقل جاب خدامه طاعنه في السن عشان يضمن ماأحد يشوف

فيها من عياله ومن جابها وهي رابطه راسها وماتقوى تمشي من رجليها

وقهوه وشاهي وأسبرين لين جاها تصلب في الشرايين وجلطه وللآن في

العنايه المركزه الله يشفيها....


أستخار الله وصلى الشفع والوتر ثم جمع عياله وبناته وقال لهم كالآتي ...



يالأولد اللي بيشوف البيت فيكم ويودي أمه وأخواته بأعطيه ضعف راتب

السواق 2000 ريال...


ويالبنات اللي بيشوف البيت فيكم ويطبخ وينفخ له مثل أخوانه

2000ريال...


وبعد شهرين إلا لقى أن الأربعه اللي يعطيها عياله أوفر بكثير من اللي

يعطيها السواق والخدامه بأكلهم وشربهم وتأمينهم الصحي وسكنهم مع

إقاماتهم وتذاكرهم والعجيب أن عياله يصرفون مايعطيهم في البيت وحققوا

الدوره الإقتصاديه للمال ومنها فك عياله من التفحيط والعربده وفك بنياته

من التسكع في الأسواق وضمن سلامة محارمه وتحصين أبنائه...



إهداء إلى برامج السعوده اللي نسمع بها ولانشوفها....


والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



قصة عملة


كان الريال شويب يالله يمشي يتسدح ويتبطح في الجيوب والأبواك وأن طلع

له هيبته يجيب أشياء كثير مثلاً كان يجيب كيس فول وأربع خبزات

عايدي....



كان يجيب أربع قوارير كعكي كولا وإلا أورنجينا وإلا كندادراي اللي ماتدري

مصانعهم في الشميسي والملز موجوده للحين ليه...؟



كان عيال الريال تفسح أربعة عيال مع سندوتش الفول....



ومر الزمان وبدى الريال يمشي لدرجة صار يجيب بسكوت وحلاوه...


أربع حبات خبز عايدي وإلا كيس صامولي...



والأن كأن الريال طلع له جنحان وبدى يطير..


لدرجة مايقنع أبو عشر سنين خمسه منه كفسحه للمدرسه وأصبح غير

موجود في حانات الكوفي شوبات والمطاعم وغيرها...


يالله صحن الفول بخمسه ريال لاحظ الريال ماعاد له ذكر إلا جنب رقم

قبله...



تبخرت الهللات من فئة خمسه وعشره وخمس وعشرين وخمسين ومئه مع

تلاشي كباين الهاتف فهل يجي يوم هالريال يتبخر؟؟؟



الله يهديك يامرت جدي(90 سنه أمدالله في عمرها على طاعته) كل ماجيت

بعيالي أسلم عليه فكت هالشيله وطلعت ريالات وعطت كل واحد وعيالي

يأخذونها ويعطونها لتوته أختهم عشان تحطها في الحصاله عشان بعد 15

سنه تشتري بها لعياله عرايس إذا رجعت أحواله وإلا تبيعها كعمله أنقرضت

مثل الريال الفرانسي والأربعه قروش...


والسلام عليكم ورحمة الله وبركاته،،،