يوميات شيخ النظر

بسم الله الرحمن الرحيم

السلام عليكم ورحمة الله وبركاته،،،



أبومحمد




قبل 16 سنه كان أبو محمد مثل حالتي الآن يرقل كنه ضرس بزر بيطيح من

كثر الحلويات عند طاري أم محمد لدرجة مره أتصلت على الشقه ورديت أنا

وعرفت صوتها لما قالت أسكت يامحمد فقلت نعم قالت وين أبو محمد قلت

أنتي أم شادي السوريه وإلا أم محمد النكديه فقامت مشكله بينه وبينها

والله كان يحلف ويدعي على نفسه أنه ماتزوج عليها وأنا والشباب كنا

نضحك...


ومرت السنين وطلع عندنا أبو محمد سي السيد وأنا مثل ماتشوف فتحمد

الله ترى الهزوه شينه...


ومرحباً بك أخ وصديق في كل حزه وستبدي لك الأيام ماكنت جاهلا

(هي كذا؟)

والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



من اللي يتقضى!؟




سوق الخضار من الزحمه تقول نمل متجمعين على بسكوت وحلاوه مصاص

ياولد ماتجي إجازه ورواتب إلا تلقى سوق الخضره زحمه والعجيب في

الليل والظهر والصبح (قلبت روسكم وهذي مشكلة اللي ماحكى إلا وعمره

13 سنه) زحمه عند هالمطاعم ضنّكم من اللي يتقضى المواطنين الوافدين

وإلا مين؟؟؟؟


والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



عبايه أسلاميه؟؟؟؟



بالله نفسي أعرف وشهي العبايه الإسلاميه؟؟؟؟


العبايه وحدددددددددده ياناس والله أنها وحده سوداء ماتلمع واسع على

الرأس تحتها شيله مربوط في طرفها قطعة ديرم وفي الطرف الثاني خمسه

ريال للخبز والطحينيه والجبنه الحامضه وغطاء الوجه من ثلاث طروق إلى

خمسه على حسب قوة الشوف وضعفه أيام أميمتي الله يرحمها وأبيي وخيي

وجميع المسلمين وأيام أم نمر الله يسترها ويستر بنياتي ونساء المسلمين

أجمعين...


ماعدا ذلك فهي والله فستان سهره سواريه أو متنييه ومن الأسماء توضح

أنها فرنسيه دخيله من مستشرقين....



حيث للأسف أصبحت المولات دور عرض للمنيكانات اللي لابسينها على

شرشف أسود شيفون مغطين به الكرب وجيههم...



لا والعجيبه طايحين في اللطمه (((مايسمى باللثام))) وأنواع الفليت

والبويات اللي تلق تقول مغسلاً وجهها تكروني من اللمعان ...



لا والبخاخات والكتابه على الجدران أقول ليه أندثرت ياخي هالجيل واعي...



أثرها أتجهت لظهور هالبقر اللي كاتبين على ظهورهم باللماع

(((take me as slave))) خُذْني كعبده أو كجاريه وأنا متأكد هالبقره

ماتدري وش معناتها والله لولا خوفي كان قلت لها تعرفين وش معناها بس

خفت تجمع علي البشر والثانيه حاطه قلب في ظهرها وسهم متجه

للأسفل...



بالله اللي سمح لها تطلع كذا مين؟؟؟؟؟


والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



تصبحووون على خير



الحروف غدت كنها بيض مكسر ورموشي غدت الملعقة ودمعي يملحهم

والشاشة المقلى والظاهر الكي بورد هو الفرن وبأسوي عجه في

هالمتصفحة وأنسدح نووووووم وأكلها حلممممممم...


لذلك يجب ان أنااااااااام تصبحون على حب وغداً يوماً أجمل...


والسلام عليكم ورحمة الله وبركاته،،،

[align=center]وعد لك مني أن تصبح هذه البقعة بعون الله وتوفيقه
وبدعمك المستمر
وبكتاباتك الهادفة من خير ما يكون في فضاء النت
صبرا يا شيخنا صبرا
فالعزيمة بعون الله متقدة والهمة عالية
والمخزون كثير والخير وفير
فقط هو فراق من يعزون علينا أصابنا بشيء من الوهن لن نستسلم له
وسننتفض وسترى ما يسرك
وأثمن لك ما قمت به لأجلي
ولن أخذلك
بحول الله وقوته
نحن هم نحن سواء هنا أو هناك
لكنهم فرطوا والحمد لله على نعمه[/align]

بسم الله الرحمن الرحيم

السلام عليكم ورحمة الله وبركاته،،،



ثقافة أم نمر



أم نمر : ياشيخ ياشيخ أصحى...




أبو نمر : نعم وشهوووووووو...!؟



أم نمر : أصحى ياشيخ...




أبو نمر : نعععععععععععععم وش تبين...!؟



أم نمر : أبي أسولف معك شوي...





أبو نمر : بكككككرة سولفي معي وااااااااجد بس خليني أنام...



أم نمر : قم تكفاااااااا عيّا يجيني النووووووم...





أبو نمر : أقري المعوذاااااات...



أم نمر : قريتها كلها...





أبو نمر : طيب أقري قرآن...



أم نمر : ختمته مرتين (ذا صاروووخ للمجرة اللي جنبنا)...





أبو نمر : طيب أستغفري...



أم نمر : أستغفرت لين قلت بس...





أبو نمر : زيدي بعد وبكررررررة نسولف...



أم نمر : لا لا لا الحين في خاطري حكي تكفاااااا قم...





أبو نمر : أوووووووووف شكلك صرتي قلللللللللق هذاني قمت...



أم نمر : تحبني...!؟؟؟؟؟؟؟





أبو نمر : نعععععععععععم....!!!!؟؟؟؟؟



أم نمر : أقول تحبني وأنا غالية عندك...!؟





أبو نمر : لييييييييييه...!؟



أم نمر : علمني أول وأعلمك...





أبو نمر : بعد طعشر سنة جايه تسأليني أحبك...!؟



أم نمر : وشفييييييييييها شفت أنك تغيرت...!؟





أبو نمر : لا ماتغيرت للحين منهبل فيك وعلييييييييك...



أم نمر : أحلف...!؟





أبو نمر : والله العظيم...



أم نمر : والله العظيم وشهوووووووو...!؟





أبو نمر : أني بأنهبل من حبك...



أم نمر : طيب أجيب لك القرآن تحلف...





أبو نمر : ليه جاحدك في قطعة أرض عشان تحلفيني على القرآن...



أم نمر : عشان أرتاااااااااااح...





أبو نمر : لا والله ماأحلف على القرآن...



أم نمر : شفت أنك تكذب...!؟





أبو نمر : لاحول ولاقوة إلا بالله الحين مصحيتني عشان هالخرابيط...



أم نمر : أني أبعرف مشاعرك تجاهي هذي خرابيط والله أنه صادق الشيخ

اللي في التلفزيووون يوم قال معظم الرجال جاف مع زوجته مايسووون

زي الرسول صلى الله عليه وسلم...





أبو نمر : ومن يسوي زيه صلى الله عليه وسلم...!؟



أم نمر : واااااااااجد شف أبو مشعل جارناااااااااا...!؟





أبو نمر : وشفيييييييييييييه بعد صار زي الرسول صلى الله عليه

وسلم...!؟؟؟



أم نمر : أيه...





أبو نمر : وشلووووووووون...!؟



أم نمر : يقول لأم مشعل والله من غلاك عندي لو تقولين لي جب لبن

الغراب جبت لك...





أبو نمر : ليه الغراب مركب مميزات بقره عشان يصير له لبن ذا العبيد

ماخلوا شئ لباقي الحيوانات...



أم نمر : أي عبيد...!؟





أبو نمر : الغراب الأسيود...



أم نمر : ومن قال لك أن الغراب أسود...





أبو نمر : أجل...!!!!!!!؟؟؟



أم نمر : يقولون في قناة الأطفال أن الغراب كان أبيض بس من الهم

وشموس السعودية صار أسووووووووووود...





أبو نمر : ماعلينا خلااااااااااص ننوم...!؟



أم نمر : خلني أكمل لك سالفة الجيران...





أبو نمر : أهاااا وش بعد باقي...!؟



أم نمر : المهم قالت له أم مشعل أن شغل البيت واجد وبنتك عمرها ست

سنين وبتدرس هالسنة ولاأقوى أنا والشغالة على البيت ومذاكرة البنت...






أبو نمر : أكيد جاب لها مدرسة خصوصية....!؟



أم نمر : لالالالالا...





أبو نمر : أجل وش سوى تزوج عليها...!؟



أم نمر : حسبي الله عليك ياشيخ الفلس ياجعلك ماتشمّها في الدنيا ولا

الآخرة أجل تبي تعرس علي...





أبو نمر : من قال ياآدميييييييه أنا فقط أحاورك...



أم نمر : ليش نلعب كووورة...





أبو نمر : اففففففف......



أم نمر : هذا أنتم يالرجاجيل ماتنومنون واحدكم يفكر في الحريم وهو على

وحده مايقوى...





أبو نمر : ماعلينا وش سوى أبو مشعل...!؟



أم نمر : راح وجاب لها طبّاخه وسواق يودي البنت وجاب مدرسة

خصوصية بمهنة مربية عشان تدرس هالنتفه بنته...





أبو نمر : طيب عادي الله يوفقهم...



أم نمر : طيب وأناااااااااااااااااا...!؟





أبو نمر : وشفيييييييييييييييك...!؟



أم نمر : متى بتجيب لي شغاااااااااااااااالة...!؟





أبو نمر : أقول تصبحيييييييييييين على خيررررررررر وعويذ الله من

شرررررررررررررك....






والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



مسرحية
الفصل الأول



مازلت الشرقية متمسكة بجذورها فأنا لطوفان الحداثة أن يجرفها أو حتى

يحركها وهي لاتتبع دينها محكمة بتخلف من العادات والتقاليد التي قد تنافي

الشريعة الإسلامية...


فهي كجدتها مع تحريف للمفاهيم البيلوجية فهي تأخذ كي لاتعطي ولاتعطي

كي لاتسأل فهذه فقط الشرقية تعتقد في خضوعها للآخرين كي تنال ماتريد

هو المهم مادامت تعمل مايحلو لها في غفلتهم...






الـــــــفــــــصل الأول



مسرحية عن وضع البنت السعوديه..






تسارعت الأحداث


ودور الصدق من يلعبه


وحده وثنتين وثلاث


والرابعة في الراس متعبه


كل الضروف


جردتني من كل شئ


إلا الخوف


أصبح قاسي علي


وأنا فقير الحظ


مابيدي شئ


ياوقوف الصمت


في شوارع الكلام


ترجفه الشفه


على رصيف الالآم


ياباس الضعيف


أزعجه ظلم الأيام


تخلف قسوة زحام


في زماني عقول


عمرها كان زمان


إشارة تقول


العقل كان يامكان


أضرب بوري


أطلع ياحيوان


أي كلمة


تجرد الإنسان من الإنسان


أرفع صوتك


يصير المصيب غلطان


غابة وسط غابه


الكلابه


تلعب دور الذيابه


مسرحية كآبه


فصول تتشابه


مسرحيه غبيه


أصولها شرقيه


وجمهورها العادات والتقاليد


تصفيقها كلام الناس


باب حديد


خلفه باب حديد


خلفه اليأس


خلفه عباية وطرحه


خلفهم


تجريد الإحساس من الإحساس


ماتت الفرحه


في عيون تخون الأنانيه


اللي تذبح أي معنى للإنسانيه


أنتي بنت


يعني حشرة


يعني ولادة وزواج وموت


أحقر من الحشرة


موتي قهر


بس لايطلع لك صوت


أنتي حطب جهنم


والعرب كانت تندم


كانوا يدفنونك حيه


ولو أنك ولد أرحم


مشكلتك أنك بنيه


عجيبه غريبه هالمسرحيه






في هذي المسرحية


الساعة


كانت في ساعة


ساعة


المهم أنها صارت قناعة


أن الصغير


دايم خطا


وأن الكبير


مثال للعطا


موت ذل


بخنجر القهر


مانمل


من ذبح البشر


أهم شئ نعيش


حرام حلال


كله واحد


ريح البال بالتطنيش


ولاتعاند


قل نعم بس لصالحهم


وأنتبه بلا تعارضهم


خلك غبي


تأخذ اللي تبي


معهم معهم


يعني بختصار أمعة


ببغاء حمار بردعة


أي شئ يعمم خصوصيتك


أي شئ يجردك من شخصيتك


لأننا من أنولدنا


تسطر جسدنا


بأصول التربيه في بلدنا


شف ولد فلان


ماشاء الله على بنت فلان


كل الناس صح إلا أنا


كل عيب أساسه أنا


حقران في حقران


والساعة ثمان


نصحا ماأدري ليه


المهم كلآ نعسان


الصبح متكدره الوجيه


فطور على سفرة الجور


نفسك في حليب


مافيه!


في كاس مكسور


شاهي تبيه؟


إزعاج وبرد قارص


على الدرج هدوم


تحت الدرج نعال


ياصباح النواقص


وين دفتر العلوم


المصروف سندوتش وريال


لعنبوا هالعيال


غثا وهموم


هذا صباحك من تقوم


ومساك قبل تنوم


في سكة وطريق


نمشي اليوم


على فكة الريق


صدر ضيق ويضيق


حياة كلها غلط في غلط


ورغم الغلط


كل الحكي بدون نقط


كل شئ صح


إلا أنا وأنتي فقط


إحنا غلط


يامقاييس العنجهيه


في ثقافة البيروقراطيه


سلب الحريه ديموقراطيه


عجيبه غريبه هالمسرحيه











تحب مين تحب


تزوج أول


وبعدين ألعب لعب


بس أنتبه


ترى الخيانه عيب


والزنا حرام


وكل مشتبه


أبعده فيه ريب


طبق الإسلام


الله ياسلام الإسلام


هذا قاطع رحم


وهذا عايش ظلم


وهذا سارق وطن


عفن في عفن في عفن


ياصغير أنتبه تحلم


بتكبر وتشوف الغبن


هذا نسله فيه بلوى


صانع أو هتيم أو عبد


طيب كلنا من آدم وحوى


لا لا هذا يقولون ماله جد


حتى لوهو ولد قبيله


وش نسويله


البنيه محجورة


لولد عمها من سنوات


وأمها مقهورة


تعبت تنتظرة يبطل مخدرات


ودها تصير جدة


تولد بنتها إنشاء الله قردة


المهم تصير جدة


وتمر سنين


وتاخذ المتعلمة أمي


جندي في الحرس أو الجيش


يافرحة أبوي وأمي


بعد سجنهم زوجوني جحيش


وأصرخ وأبكي


يالله ماعليش


باكر تزين


أول ماتولدين


أنتبهي تطلقين


تراها أرتفعت نسبة العنوسه


أحمدي ربك أنك عروسه


تدرين ياللي تقرين


أن ثوب العرس أبيض


وأن لون الكفن أبيض


وأن اللي يفكر يمرض


أحنا في القرن الواحد وعشرين


ومازلنا للأسف في الجاهلية


وأنا لوجتني بنية


بأريحها من هالمسرحية


بأدفنها حيه في قلبي


وأقول ياحبي


هذا الإسلام


في الدول العربية


حلاله والحرام


يطوع للمصالح الشخصيه


عجيبه غريبه هالمسرحيه



والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



مسرحية
الفصل الثاني





الـــــــفــــــصل الــثــــانـــي



حوار مع العشق..






يحيا القلم


وتموت الكتابة


ويتبعثر الورق ألم


على صدر الكآبه


أكتبي يالحروف صرختي


يومك في عقلي شيختي


ماسولفتي لي عن بختي


قال الغمر أسمعي ياأختي


الفصل الثاني من المسرحيه


قصة العشق يشكي عليه


ساعة كبرت البنية


جاني الهوى


روحه الحب


جسده الغرام


يدور دواء


يذبح القلب


وينسى الهيام


مسكين يالعشق


ماعادبك الصدق


تساوى حلالك والحرام


مابقى بك غير الفراغ


يشغلونك بكثر المراغ


تحلف تحب


وتبرر لعب


حتى الخيانة وفا


وكل العطا جفا


على مين العتب


لاصار القلب يحفا


ينقب من السويسر ذهب


وعقب التعب


غريب هالقلب ماأكتفا


طبيعي في غرايزنا الطمع؟


وإلا العين يغريها برق لمع


لاصار حبيبي كامل


يعزف المشاعر بالأنامل


قلبي منه ماشبع..


تعال يالعشق


أنا سيد العشاق


أبكي على صدري


صدرك اللي ضاق


أدري ماأحد يدري


عن الحب والأشواق


حط رأسك في أحضاني


بأفلي رأسك ونام


تكفا يالعشق لاتعاني


تجمع لو كلك آلام


أدري بهمك وأحسه


لبسوك الذل والمخسه


بأسم الحب والغرام


خليني أشكي وأبكي


بالله لاتقاطعني وتحكي


تكفا ياغمر دخيلك


أنت من أول وشحليلك


درستني وعرفتني


وأنا أشهد أنك شرفتني


ويوم ضاقت قلت أجيلك


ومن لوعتي أشكيلك


قلت أسلم يابعد روحي


دخيل وبعيوني أشيلك


دونك روحي وطموحي


بوح لي مافي خاطرك


أنت دخيلي وأنا بأساهرك


قال عمري..


أكثر من مليون عام


ماأحد كبري


غير السنين والأيام


خلقني الرحمن


بين آدم وحوى


والملعون الشيطان


صاربي كفر يتلوى


بأسمي أغرى الأنام


ولون النور بالظلام


طوع فيني الغيرة


وطعن روحي بالحرمان


واللي تشوفه من تأثيرة


والخبل طاوعه الإنسان


أنا ياغمر عزيز بجنابك


ياحالي مقهور مدمور


ردت روحي بأسبابك


أنعشتني في تسع شهور


بس ليتك تحكي لي شويه


أنت وهي قصة مخفيه


من أحداث الفصل الأول


ويعة تخلي الشجاع يتبول


خلني يالعشق في صمتي قضيه


أسلم وكمل سوالفك عليه


عجيبه غريبه هالمسرحيه











اليوم الوضع تغير


والخيانة صارت تكبر


أسمع البنية تتأثر


تقول هيثم الغالي


حياتي شاغل بالي


بس وليد ونيس


أكلمه كل خميس


وهاني بعد حالي


ولايهون بدر وأنيس


كل شئ إلاسعد الخسيس


بخيل ماينفع بشئ


لاشحن لاهدية لاعشا


بس أني أحبه شوي


لأن كلامه يرجف بالحشا


ياقلبي سعيد وسعود


وحمد ذاك المقرود


عليه واحد يابنات


ياويلي ينسي الحياة


وإلا طلال المميز


رقمه وسيارته ولبسه


أحسن من التاجر عزيز


أغثاني يحب نفسه


أفداهم كلهم


ليتني في واحد أضمهم


وتقول الرجال


البنيات خبال


دلال للصحبه


وإبتهال بايعة هوى...


وأحنا وين والمحبه


خليك ياولييد خطير


تأكل فطير وتطير


وللبنيات هذا الدوى...


اللي تعرفك..؟


تعرف غيرك


واللي تطول معك


تراها بالمشاكل تثيرك


تحاول بالزواج تقنعك


وباكر تخونك في سريرك


بس يكفي يالعشق


قلبي من هالحكي بيحترق


معقوله هذا الكلام


مابقى في الدنيا إحترام؟


أستقعد ومسك يدي


قال على الإستغراب يمدي!


ياغمر الغريب هالأيام


أن الرجال يزنون


والنساء من أصولهم يتجردون


قلت بالله وشلون


قال لي أسمع


وعيونه هم تدمع


تتزوج الوحدة واحد


واللي مر عليهم واجد


ملكعين ويستغبون على بعض


وتبداء المشاكل والتباعد


عقول أفكارها مرض


كل واحد على حياته معترض


فلسفة علاقات الفشل


مافيها أي نوع من الخجل


دراما مع تراجيديا هزليه


طلاق المخزي من المخزيه


عجيبه غريبه هالمسرحيه







من المسرحيه مشهد سريع


كيف الشرف يضيع


ضمير الحاجة


أنشط من رغبة الإلحاح


وقلب الدجاجة


مايقويه كثر الصياح


ياسلطان العقل


أستعبد مفرط الحرية


أذبح الجهل


في قوة ضعف الشخصية


العمر صفحة من بياض


لوسود الكحل أعراض


ماتنفع الأمراض


قلب أنصدم في نفسه


قبول أو أعتراض


على أيش وإلا إيش متأسفه


موتي يامسكينة متكسفه


بساعة فرح


باقي العمر حزينة


مو أي شئ أنجرح


تقدرين تخيطينة وتغشينة


أسود القاع


سواده سواد


مايفيد الترقاع


في ثوب الحداد


كان في يديك وتضيعينة


بعدين تردين تدورينة؟


مسكينة يابنية مسكينة


لذة الحرام حلوة


والحموضة تكشفها البلوة


ياعساك على القوة


حب صداقة أخوة


ألعبي على كيفك


أنتي تهوين اللعب


مايذبحك إلا سيفك


بعد القهر التعب


أي دمعة في عينك


مثل شمعة في دينك


تحرقك وحدك


وإذا أنا قصدك


أنا وكل الناس ضدك


مير الله يعينك


ياخاينة نفسك


المغيب


شكلة مريب


ماغاب إلا بشمسك


والليل ماهده الحيل


وبكى ويل وويل


إلا من تحت ضرسك


هذا خبزك يالرفلا


وماأحد بخبزك أولا


كلية أدري أنه عجينة


تدرين؟ ليه تخبزينة؟


خالي ذبح عمي


وأبوي طلق أمي


وأنا فقيرة ومحتاجة


لي سنين أعاني همي


خذ مني أي حاجة


بس لاتفضح دمي


أبي أعيش مستورة


كل الناس تسميني مغرورة


وأنت حبيبي ماتخوني


والناس متي يهموني؟


ومرة الأيام والأيام


رسالة وصورة ولقا


ولأن الحرام حرام


بعد الزنا شقا


أنتي خنتي ربك


كيف أحد يحبك


ياغبا قلبك..


شفتي سوات اللي تحبينة


إذا هتك عرضك بتكرهينة


وإلاتمادي دوم تخلينة


مسكينة بالحيل يالردية


قصه عجيبه بطوله غبية


بالإشتراك مع كل اللليبراليه


هذا يالعشق حالك وحالي


تساوت ثقالها أول وتالي


الشهوة عشقت الشيطانيه


والحب أصبح هتك العذرية


عجيبه غريبه هالمسرحيه





والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



مسرحية
الفصل الثالث




الـــــــفــــــصل الــثــــالـــث



أرتفاع راية الإنهزاميه في آخر فصول المسرحيه...







قراء كتب


زرع حصد


كان الصبح حياة


وكانت البشر أموات


أطفال يدرسون


في فصل سقفه السموات


وأثاثه حصير


وكان المعلم ملسون


متعقد من منيصير


لأن فهمه ثقيل


ماحفظ من القرآن آيات


يأذن المذن الصلاة


وعصا المعلم تهتز


كل طالب من محله يفز


كان الدين شرك في العبادات


تخالط الدين مع العادات


صارت الفتوى كلام


والناس مثل الأنعام


القوي يأكل الضعيف


والضعيف مايلقى الرغيف


مسكين بالجوع ينام


ولما عادت روح الإسلام


راحت الأوثان وبقت السخافات


حاجة يسمونها العادات


تنافي تعاليم الإسلام


لأنها موروثات من العوام


كان لها إنتقام


على تقدم فكر الإنسان


جدي زوج أبوي وعمي


بنات أخوه الثنتين


بدريه وياسمين


وأبوي جاب أبوي


وعمي جاب أمي


وقال أبوي لأبوي


تستاهل بنت أخوي


رغم أن أبوي


معجب ببنت الجيران


وولد خالت أبوي


يبي أمي لصنيتان


ولأنهم كانوا بزران


ورثوا العجز في دمي


وأخذ أبوي أمي


وجابوا ثلاث ورعان


وتسع بنات حلوات


أكبرهم حنان


وأصغرهم حياة


وثنتين مريضات


أمراض يسمونها وراثيه


هالفصل الثالث من المسرحيه


فهم الأعراب للواقع بلامنطقيه


أخو أبوي عمي


جاله بس ثمان بنات


على طول حجزت أمي


ثلاث منهن جميلات


طيب عندي خوات


وعمي ماعنده أولاد


من بيتزوج هالبنات الباقيات


خواتي والخمس الصغيرات


اللي أصغرهم الأموره وداد


قال جدي كل البنات


الباقيات في بيوتنا خادمات


أهم شئ ياعيالي


لاتطلعونهم للغريب


أول وإلا تالي


علتنا مالها طبيب


لأن أجدادنا


وأنتم ياأحفادنا


وفلذات أكبادنا


حافظوا على سلومنا


من يومكم إلي يومنا


بنات جميلات عانسات


بأسم التقاليد والعادات


تخلف ذل قهر


مصادرة لحرية البشر


تنولد البنت


في عصر التقنيه


وأهلها في فقر


رغم أنهم أغنياء


رغم مرور الحضارات


وتطاول البدو بالعمارات


مازالت جزيرة العرب


متسيده العالم بالتخلفات


الغاز والبترول والذهب


وأحنا مازلنا متخلفين


في مصاف العالم الثالث ثابتين


ولو رجعنا للثقافه مثقفين


جاهلين بتعاليم الدين


أمي محاضرة بالماجستير


وأبوي دكتوراه في الأدب


لكن جاهلين حتى في السرير


ويقولون أجدادي السبب


من يملك سلطة التغيير؟


ويرجع العرب عرب!


ماتوا أجدادي


وأنا في وادي


وأهلي في وادي


أي شئ تبيه


فيه ومافيه


صارت الفلوس


مقاييس النجاح


وتربية النفوس


غبن وجراح


والعجيب في سلامنا


كيف الحال


بسرعة تلقى كلامنا


الحال نعال


أي حال


حالي أنا


طيب من أنا


أنا أي واحد غيري أنا


مهندس دكتور أمير


أو راعي يركب حمير


أي شئ نكرة


إذا وجهت نفسي


أرجو المعذرة


أسمحلي ياكرسي


نفسي أقوم


وخايف أطيح


خليني مصدوم


راضي ومستريح


يمكن يجي غيري يقوى


مجرد من الإيمان والتقوى


يتحمل غثا هالبلوى


وضع البنت في الجزيرة العربية


إضطهاد تهكم عنصريه


جابت لها الأمراض النفسيه


عجيبه غريبه هالمسرحيه







تبلغ الأولاد


مابين المراهقه والعناد


والوالدين في زمان الأجداد


يحسبون التربيه بالعصا


ولما الواحد يعصا


يشوف أمه في أضطهاد


مره بالعقال مره بالعصا


ولما كانت الأم


تخاف يتزوج الرجال


ويجيب ضرة عليها


صارت ماتهتم


هملت البيت والعيال


صارت تركض لنفسها


ماتبي أي شئ يغثيها


بتعيش باكر مع أمسها


مساكين حيل هالأطفال


الولد ضايع


بين اللواط والتفحيط


والبنيه تتابع


عطتها صديقتها شريط


سكة الخراب عذاب


سهر دشرة تشفيط


زنا لواط سحاق


والبنيه في غرفه تشيط


مولعه لحد الإحتراق


وأبتدت لعبة التفريط


الولد يكبر على المخدرات


والبنيه تنبلي بالإتصالات


مابين المعجبين والمعجبات


والوالدين عايشين ولامهتمين


أنت زعلان راضي


أهم شئ المقاضي


وأي كلام فاضي


يتكلمون لين ينامون


كأنهم ياربي مايسمعون


عن كل شئ التغاضي


إلا كلام الناس


أهم شئ الناس


وش يقولون علينا الناس


أنتم ماعندكم إحساس


ياعيال الكلب بتموتون


إذا مره كذا تسوون


راح تندمون لين تموتون


بالله وش تبون


بيت غرفه قنوات


ملابس أكسسوارات جوالات


كل شئ عندكم إلا الحياة


ماتشوفون المحرومين


كيف عايشين


وينتهي اليوم مهموم


متى يجي النوم


يحيي قلوب الميتين


نفسك تحكي من يسمعك


كل شئ بالحرمان يقنعك


ياحياة الشقا محرومين


كل شئ تملكه ماتملكه


وكل شئ ماتملكه تستهلكه


وكل شئ تستهلكه تتركه


صراعات في أكبر معركه


الشباب والبنات مساكين


والمجتمع شايل السكين


كل يوم يذبح واحد


حادث مرض إرهاب


خطف سرقه قتل


أي سؤال يرفض الجواب


فشل في تربية الأهل


ولما بداء الأمل وكبرنا


تغيرنا كثير ولآغيرنا


يارب ذبحونا أهلنا


المرأه تنخطب


لأنها من قرايب أمك


والرجل ينفرض غصب


لأنه ولد عمك


من عربنا نعم الرجال


بس عليه قضيتين خطف


وعشرين مره أحتيال


وسبع مرات سرقه


لكنه رجال وذف


كافل عمال بعرقه


كل شهر يعطونه آلاف


وعددهم ثلاثة آلاف


يعني سنويته ملايين


وأنتي يابنتي بترتاحين


بيجيب لك خدامه وسواق


وتصير حياتك في الأسواق


ويعيشك في قصر كبير


وبيفسحك لاصدرك ضاق


مابين تهامه وعسير


تحتار المسكينه وش بتسوي


مصيرها ماله أي تقدير


وتبدى خيالاته في خويها


اللي حالف أنه ما يخليها


أتصلت عليه


تقول حبيبي أنا مخطوبه


الكلب وشفيه


فرحان بتفارقه المنكوبه


وتسود الدنيا في وجهها


صارت كل الدنيا ضدها


والكلب خويها


تزوج بنت عمه


اللي كانت لها قضيه جنسيه


بس الكلب ماهمه


أهم شئ من لحمه ودمه


كل إنسان في هالدنيا له قضيه


أهم شئ تبقى بالنسيان مطويه


حتى لو زوجته تصاحب خويه


وأخته تبالغ في المحنه شويه


وأمه تواعد في كل عصريه


ديوث وأبوه شيخ السكرجيه


ماأحد غير رب البريه


ساتر على مصايب هالبشريه


ويكابرون بأسم الحرية الشخصيه


عادات وتقاليد الجزيرة العربية


تنافي تمامآ للتربية الإسلاميه


عجيبه غريبه هالمسرحيه













المشهد الأخير


من الفصل الأخير


المسرح الكبير المرير


عجز يفهم أي تعبير


وإذا عجز الوقت عن التأثير


يبقى تقرير المصير خطير


من يرد لي الإعتبار


يملك فيني الخيار


يالقهر ياالإنتحار


أفكار نشوة التغيير


إنهازاميه تخلو من الإنتصار


تصفيق حار


أحر من أي بهار


الجمهور يقطع الستار


متفاعل مع قضيتي وش صار


تدخل بنيه مكسورة


مقهورة متلثمه ومتهندمه


يذبحها الحيا مغرورة


مبهورة تخاطب من في المقدمه


تنزل اللثام


وتصرخ يابشر حرام


ليمتى تعذيب في هالمسلمه


جردوني من كل شئ


إلا من ديني وحريتي


كيف تتعاون علي


أهلي ومجتمعي ودنيتي


أنا في الدين أدخل الجنه


وفي الواقع حنان ومحنه


أنا الأخت والأم والبنت


أنا اللي جبت الرجال


أنا اللي كنت وكنت


شجرة مثمرة ولا أزال


ليمتى يابشر هالحال؟


الأنثى مالها حق


تعاني الأستعباد والرق


بأسم العادات والتقاليد


تقيد بقيود الحديد


تذبح في صميم القلب


تخلف في مفاهيم الشرق


وإلا خطاء في ترجمة الحب


تنخلق المراءه في حزن


والرجل دايم أبو الرجل


تموت المراءه في غبن


والرجل رجل لوهو نذل


تفارقات عجيبه


والغريبه أن الأصل


يهد الأصل بكفوف الأهل


تشرد مواطن في وطن


إنسحاب الواقع من الخيال


غريزة الإنكسار والجبن


تطغى على ملامح الإستغلال


كل الرجال تتجرد من المرجله


والمرجله تتلزق في الرجال


معادلة سخيفه مهمله


مبنيه على نظريات الجدال


أتفق جدي وجدي


أن هالقضيه مبنيه على التحدي


تبقى المرأه على حالتها


وجهها مثل لون عبايتها


أخذت من الحريه كفايتها


فقط تسولف مع مرايتها


ممنوع النظر في حكايتها


تنولد ميته وتدفن حيه


أنتهت الجلسه ورفعت القضيه


هذي نهايتها في ملامح بدايتها


سلوم العرب


مثل الجرب


تنخر في أجساد النساء


صبح ومساء


تتراضعها كل الأجيال


وأنا لوأني رجال


كان وكان هالحال


أبد ماطال


لأنزع منه النعال


وألبسه جزمه


لأجل تحتوي الحرمه


وتأطا على طق الصدور


اللي ذبحتنا تخلف ودبور


بالعادات والسلوم


في أي عرب في أي قوم


يثور التنور وتتعدل الأمور


تصفيق حاد من الجمهور


ويستبشر وجهها المقهور


الله قدرت توصل قضيتها


وتنتهي فرحته في بدايتها


تسمع المخرج وبعض الحضور


يقولون أن المرأه طماعه


أبدآ ماعنده قناعه


أكثر من هالحريه وشتبي


زلزال يرجف بالقاعه


ياناس صلوا على النبي


واحد باين عليه السناعه


يقول شرك هاه في شنبي


المرأه وأنتم بكرامه


كيف وأنتم بكرامه


يسولف هالحيوان عن قمامه


المرأه يابهايم كرامه


أساس التقدم والحضارة


في كل مجال تأخذ الصدارة


لكنها للأسف محارة


في قاع بحر الرخامه


ماتعرف تدافع عن نفسها


ولاتعرف غير ليلة عرسها


تبكي لين يوم القيامه


على هالدنيا السلامه


وعلى هالمرأه الملامه


تحيا في حسرة وندامه


تراجع صفحات العادات البدويه


اللي تستعبد الديموقراطيه بالنرجسيه


أنتهت فصول السنه القمريه


وأصبح التاريخ شهور شمسيه


دمعة قهر في عيون البنيه


يسدل الستار أنتهت هالمسرحيه


تبقى هالسالفه في المجتمعات العربيه


سالفه روتينيه


في الإهتمامات اليوميه


موضوع جدل في قصه أزليه


يموت الحوار وتحيا الجدليه


بين التخلف والليبرالية...


ياحليلك يابنيه بتموتين حيه


عجيبه غريبه هالمسرحيه


مادام االبشرية...


بعيدة عن الشريعة الإسلامية





والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،



رب ولد لك لم تلده زوجتك




فاتورة الكهرب عشان ماتضغط على نفسك وتتكسر ضروسك الربع

متوصين فيك أقلبها بتلاقي ألف عيادة أسنان وخصم لحامل الإعلان

أستنزاف من نوع آخر وجاء الصيف وهالنوع من العيال يحتاج بر من نوع

خاص وإلا قضى على أم الراتب...



فاتورة التلفون والجوال أذرب ناس يعرفون متى تنزل الرواتب ثم يدزون لك

كم رساله عن الخدمات والتخفيظات والعروض وفي وسطها يدسون لك

السم في العسل صدرت فاتورتك ولما تسددها تطلع لك حاجه أسمها المبالغ

الغير مفوتره وهذا حسب ضني المدلل من عيالك ولايمكن ترد له طلب...



فاتورة المياه ومخالفتها الشين في مخالفات هالولد تتلزق على الباب لدرجة

من هول الصدمه تنسيك دعاء الدخول للمنزل ومع كثرة العج لوماغسلت

الناس كان الحين ساكنين فوق طعوس ويجيك بزير يتميلح ريحته تتن

ياأخي أقتصد في أستهلاك المياه ثم يروحون لك الفاتوره على حسب آخر

تسجيله في البلوت لأن عداد المويه فوقه أزفلت وكيندي وفي قفا الفاتوره

حاطين لك مستوصفات الضغط والسكر والكوليسترول بس بدون خصم

عشانك دافع دافع وهذا الولد غثيث شوي بس لابد منه نبي نتروش ونبي

نتوضى ونبي نشرب وإلا بعد ذي واجد علينا...



ويبقى عاد أولادك بالتبني وهذولي اللي صدق يطيرونك ولاتدري وين راح

رويتبك مثل فاتورة المصلح والبقالة وغيرها...



ياحليل عيال أول....



والسلام عليكم ورحمة الله وبركاته،،،