بسم الله الرحمن الرحيم
السلام عليكم ورحمة الله وبركاته،،،
البروستد
في سنه من السنوات كان عندنا شغل في جدة والدنيا كانت رمضان عاد أحنا
ياأهل الرياض إذا جينا نروح لجده تلقانا نتقضى من شارع الثميري
والبطحاء بناطيل وتي شيرتات وشغل البهرجه والسبهلله والأشكال ياحافظ
كروووووش وشعور أطول من بعضها رأس الواحد فينا كنه حقل
برسيم وعلى بالنا من نقول أش بك وحقنا صرنا حجز وتلاقينا طول
الروحه معفطين أثامينا كأننا مسافرين للخارج ومانبي ننكشف والحقيقه
جدة لو تغيرت العملة فيها ماكأنك في السعودية...
وبسب العمل تلاقينا فترة النهار جري نبي نخلص شغلنا عشان نرجع لأهلنا
والشباب تقول ماقد أكلوا بروستد في حياتهم الفطور بيك والسحور بيك
وكان آخر يوم لنا الأربعاء وبعدها ماشين الرياض ومعانا واحد يراجع في
أوراق مابين الجوزات والأمارة والبلدية ولازم يخلص اليوم عشان يمشي
معنا وإلا بيضطر يركب الطيارة وهو من يركبها مافيه عظم يبقى في محله
تلاقي عيونه في ركبه وخشمه في بطنه و عزف مزمار في باقي جسده...
المهم ذيك الليلة الشباب جابوا أنواع الحمص والبروستد والمسحب سحور
الوداااااااااع من البيك....
ومن شبعوا الشباب كان آخرنا حمد اللي بيراجع في الأوراق لدرجة من
الشبعه واحدنا يصلي الفجر على جنب وعلى طوووووووول نوووووم
الساعة ثمانية الشباب كلهم صاحيييييييين وبراطم (شفايف) الواحد كأنها
جبهة تكروني في عز الظهر أنواع النشفان والملح بيضااااااااء من
العطش...
ويلقط حمد أوراقه ويروح للجوازات ومنها للإمارة ثم للبلدية ولينه أذان
الظهر ومن دخل يتوضى لين جميع أعضائه مع الرطوبة والحر والبروستد
والحمص تقول مااااااااااااااااااء مااااااااااااااااااااااااء لاتموت وذيك البرادة
بااااااااردة ويشرب منهااااااااااا لين طاح مغمي عليه وأضطرينا نجلس معاه
لأنه صابه تسمم من كثرت شرب المااااااااااااء....
وكل ماطرينا له البروستد له خنقته العبرة لأنه بعدها حلف ماعاد يأكله....
والسلام عليكم ورحمة الله وبركاته،،،
