عرض للطباعة
بسم الله الرحمن الرحيم
السلام عليكم ورحمة الله وبركاته،،،
عضم الله أجركم
والله الذي لاإله إلا هو لست بشعبي صريح أو أحد تعرفينه ولاأحد يعرفني
سوى راجنو بعد الإتصال بي حيث تعرفت عليه من خلال متصفحتي ماعدا
ذاك لاأحد يعرفني أبداً...
والسلام عليكم ورحمة الله وبركاته،،،
بسم الله الرحمن الرحيم
السلام عليكم ورحمة الله وبركاته،،،
قطّه
في دوام الليل عادة نكون في حالة إستعداد لأي أمر طارئ ويفترض في مثل
عملنا الراحه الجسديه كي نتمكن من تأدية عملنا بهمه ونشاط بس الشباب
الله يهديهم مكبرين السالفه وهذي مشكلة العمل مع أهل القرى والباديه
ذبايح وكرم في أثناء العمل قالوا يالله ياشباب رجع أبوعبدالله من إجازه
أسبوعين قطه عشان نسوي له عشاء باكر...
أيه هين مئتين ريال قطه لا ومن زين وجهه يسلم وهو مكشر ياأخي تبسم
عشان أدفع المئتين بدون مايأنبني ضميري المراد ألا ياقاط ماأقدر أجامله
من حر مالي وأنا متأذي منه وبعدين اللي يبي يعزم يعزم عند أم عياله
عشان تسنعه ماهو يعزم ويترزز على كيسي...
بصراحه يعجبني الدوام في الليل لأنه هدوء ومايقدر المجاملين على العمل
بطريقة شوفوني لأن المدراء الكبار يكونون في بيوتهم يحلمون من بيغثون
صباح غد...
والسلام عليكم ورحمة الله وبركاته،،،
بسم الله الرحمن الرحيم
السلام عليكم ورحمة الله وبركاته،،،
طفراااااااان
يقول نمر وأبو جاسم بكره يوم مفتوح وبنروح المدرسه وبصراحه ملينا من
سندوتش وعصير وفشفاش وبسكوت
طيب وش الحل ياعيالي قالوا كل عيال الحاره يقولون ليه ماتشترون من
المقصف قالوا قلنا الفسحه 15دقيقه ولو 400 طالب شروا ماكفا يوم
دراسي وأحنا نبي نخفف على المدرسه وعلى الطلاب من ضغط الشوارع
قصدي ضغط الطوابير عند المقصف...
قالوا لهم ياعمي أبوكم طفران فجوني العيال يسألون يعني أيش طفران قلت
أسئلوا أصحاب المحلات لأني لمحت عبدالعين راعي البقاله كاتب على
التقويم من يوم 26 إلى 30 الحمد لله كاش ومن يوم 1 إلى يوم 10 خبز
ومويه وبيض ومن 11 إلى 25 طفران...
طيب في اليوم المفتوح وش المطلوب ياعيالي قالوا مئة ريال لكل واحد ولو
عطيتهم الغاليات يبون يتساوون معهم غاليه وجميله والشباب أستخدموا
معي أسلوب سياسي وإذا ماعطيتهم بأكون حارمهم ولو عطيتهم الغاليات
وخصوصاً جميله حافظه جميع أحاديث وأيات العدل والمساوات...
بعد مداولات وصلت معهم لحل وسط وهو خمسين ريال لكل واحد بشرط
تكون فيه هدنه بينهم جميعآ يمنع فيها الحروب الداخليه فوافقوا ووافقت
بحيث المئتين راحت لعيالي وأفتكيت من قطة عزيمة أبو عبدالله وكسبت
هدنه داخليه إلى نهاية الأسبوع...
والسلام عليكم ورحمة الله وبركاته،،،
بسم الله الرحمن الرحيم
السلام عليكم ورحمة الله وبركاته،،،
أخوي
من سنين أكل حقي الشرعي وحرمني أياه والسبب أنه أخوي...
أستغلني أسوء أستغلال وأتهمني في أمانتي والسبب أنه أخوي...
سلبني حريتي ودمر شخصيتي أمام الأخرين والسبب أنه أخوي...
نزل من قدري ولا شافني شئ وحطم حياتي والسبب أنه أخوي...
وإذا بعدت وقلت أتحاشا المشاكل قالوا قاطع ولو سيرت قالوا ماعنده
أحساس ولا دم وش جايبه أكيد يبي شئ والسبب أنه أخوي...
والسلام عليكم ورحمة الله وبركاته،،،
بسم الله الرحمن الرحيم
السلام عليكم ورحمة الله وبركاته،،،
أنا سعودي
في أحد البنوك اللي راعيها يصلح لنفسه سندوتشات بيض ويفطر ويتغدى
عليها حسب مايقول في 3 أشرطه حبيب الشعب والأب الروحي لكل سوداني
يبحث عن عمل...
دخلت بأحول فلوس الخدامه عشانها ناويه تنحاش حسب نهديداتها، المهم
وألقى السرا واصل زحل قلت ياولد 6 شبابيك مافيها ولا واحد
للسعوديين؟؟؟
قالوا لا مافيه قلت أجل بأروح للمدير بما أنه سعودي ويهمه هذا الوطن
فيمكن يتفهم أني كنت مداوم من البارح وتعبان فيخلصني بدري المهم دقت
عليه الباب وبما أنه كان يكلم في الجوال ويضحك بقيت واقف أنتظر وراحت
5 دقايق وبعدين سكر ثم عقد حجاجه وقال وش عندك؟؟؟
طالعت وراي قلت يمكن يكلم أحد موظفينه مثل ماينفخ علينا أبوعبدالله تقول
الوظيفه معطيك أياه هديه والعمل ورث عائلي لهم ماعلينا قال أنت أيه أنت
صار لك واقف ساعه وأنا أكلم قلت أنا؟؟؟؟
قال أيه وش تبي؟؟؟
قلت أبد بغيت أحول فلوس الشغاله قال أمسك سرا قلت (((قصدك أربع ميه
ذا ماهوب سرا))) قلت أنا سعودي وعلى الأقل لي أمتياز في بلدي فقال
(((خير ياطير))) صحيح مثل هالأشكال لو عرف وش معناة مواطن كان
أحنا بخير بس ماعرف ولا راح يعرف لأنه مثل ماقال خلف(((من دون
صهيون بذتنا صهاينا))) ومثله التاجر اللي مغيم بالأسعار وصاحب البنك
اللي راز لي أثنين سعوديين والباقي من الجاليه السودانيه ومثله ومثله
ومثله...
والسلام عليكم ورحمة الله وبركاته،،،
بسم الله الرحمن الرحيم
السلام عليكم ورحمة الله وبركاته،،،
صندوق
شريت لأم نمر صندوق عجبني عند واحد من محلات العود المنتشره أكثر
من البقالات في الأحياء المهم الصندوق في علبتين رصاص ساكتةن وحده
فيها معمول والثانيه فيها عود وربع توله ثنتين وأربع رشاشات عطور
مخلطه ومدهن للعرق وقلت له غلفها مفتوحه عشان تبين الكتابه ((( إلى
حبيبتي الغاليه وشريكة دربي))) عاد هي تحب هالسوالف...
هذا الشئ اللي كنت خايف منه قالت تلعب علي بهدية عجز((( عجايز)))
هذي رح عطها مرة جدك وأما أنا كثير عليك يالشايب...
بعد ساعات من المفاوضات أكتشفت أن أم نمر تبيني أسوي لها زي
مايسوي مهند لنور عزيمه عند بركة مويه ووسرلانكيه تعزف لنا على
الكمان فلما جيت للخدامه أسئلها تعرفين تعزفين على أي أله موسيقيه قالت
مافيه مشكله بس وين بركه مويه وكيف يروح هذا الغبار عشان نعبي
طشت كبير فوق السطح فلذلك يؤخر موعد أقامة أحتفالية أم نمر لحد زوال
الغبار...
والسلام عليكم ورحمة الله وبركاته،،،
بسم الله الرحمن الرحيم
السلام عليكم ورحمة الله وبركاته،،،
شيخ ونجد كل صباح
شيخ: صباح الخير يانجد...
نجد: صباح النور ياشيخ...
شيخ: شفتي يانجد وحده من سيارات المرور نست توقف التريلات وش
صار حادث شنيع لأربعة أشخاص عطل السير على طريق السلي لأن سائقي
التريلات يحسبون النظام وجود سيارات مرور وبدونها عادي يمكنهم
مزاحمة أحفادهم من السيارات الصغيره وهذا اللي صار حادث شنيع....
نجد: لاحول ولاقوة إلا بالله هذا نصيبهم ومكتوبهم وقدرالله ومشاء فعل...
شيخ: وينك ((ياأبو قدحه)) ماتم التعامل معه وعادة الحركه لوضعها
الطبيعي...؟؟؟
والسلام عليكم ورحمة الله وبركاته،،،
بسم الله الرحمن الرحيم
السلام عليكم ورحمة الله وبركاته،،،
نجد
خلقني الله من تراب نجد
وبسموم قيضها العمر وارق
كحل عيوني غالية الود
أبنيها بدمي والجبين العارق
متوارثاً حبها من جد وجد
وبينها وغيرها غلاها فارق
صباخها في عيون أطيب من الورد
وهجيرها على جبيني أطيب من المشارق
داري ماأقبل فيها أخذ ورد
أحبها لوعمرها كل ظالم وسارق
والسلام عليكم ورحمة الله وبركاته،،،
بسم الله الرحمن الرحيم
السلام عليكم ورحمة الله وبركاته،،،
الونيت
مره رحت بأم نمر والعيال لزواج أحد الأقارب في أحدى الإستراحات اللي
صارت أكثر من البيوت ولما جيت آخذهم قالت مرت جدي أبيك توديني معك
وأحدى عماتي وأنا معي ونيت غمارتين ((أبوعزيز)) خطوطه سود وبدون
مكيف لكن للحين جديد وحاط له البنقلاديشي اللي يأذن بالمسجد نيابة عن
المؤذن ينظفه كل يوم بسبعين ريال في الشهر...
قلت أركب العيال في الصندوق وأقفل عليهم الهنقلين (((الشبك الحديدي)))
وأتوكل على الله وأمشي وتوي ماشي اللي توقفني دورية سريه وجيب
شرطه ودوريه لومينا أرتعات مرت جدي وبغى يغمى على عمتي ذي
مداهمه فقلت للي معي معكم شئ ولاعلمتوني؟؟؟؟
المهم نزلت اللي ذيك الوجيه اللي معبسه آخر مره ابتسم فيها شهر واحد
عام 1429 بعد تقرير 15% قال لي واحد منهم على شنبه بقايا نسكافيه
بالحليب ماأدري كيف عرف أسمها وطلبها من البوفيه وش ذا؟؟؟
قلت ونيت
قال تستهبل
قلت لا ليه؟؟؟
قال حاط مواطنين أطفال في الصندوق؟؟؟
قلت أجل وين أحطهم؟؟؟
قال المفروض تأخذهم على ردين (((شحنة رمل)))
قلت ماعليش طيب أيش الحل؟؟؟
قال ارجع ونزلهم وعشان الحريم اللي معك عطوني مخالفة أسمها سوء
أستخدام المركبه الفضائيه قصدي الونيت؟؟؟؟
المهم قلت له أبشر وسويت ماقال....
العجيب الطريف اليوم وقبل شوي ديانّا على الدائري تخرخر رمل ناقصين
تربات في وجيهنا إلا وجنبها شئ يشبه للونيت مركبه فضائيه مرتفع وجهها
تأهبآ للإقلاع محمله طعشر عامل والباب مربوط بسيم إلا سيارتين مرور
يكبسون لي وأفتح الطريق ويسقطون علي وعليهم وبعد ربع ساعه ألقاهم
في مطعم الكبده جنب الإفتاء يفطرون والعمال والديانّا راحوا لزحل وأنا
علامات التعجب والإستغراب على محياي...
والسلام عليكم ورحمة الله وبركاته،،،
بسم الله الرحمن الرحيم
السلام عليكم ورحمة الله وبركاته،،،
الزي السعودي
أقول الحمدلله أني عاصرت جيل 1390هـ وجيل 1400هـ وإلا كان أنا في
حيره الآن ماأدري وشهو الزي السعودي خصوصآ أن الشباب الآن
يخيطون عند المشاغل النسائيه ومحلات الرياضه أصبحت خطر يهدد كثرة
المطاعم والخياطين الرجاليين صارو يفصلون 3 ثياب مع التوصيل للبيت
بمئة ريال والباقي مكتوب عليهم للتقبيل لتغيير النشاط...
العجيبه قلت بأختبر عيالي ولبست لهم الزي السعودي كامل وقلت من اللي
يعرف وش أنا لابس الآن له عشره ريال؟؟؟
قالوا هذا لبس العيد!!! بس ليش لابسه بكره عيد؟؟؟؟
وردوا البنيات هذا اللبس لبس اللي يطلعون في قناة التلفزيون السعودي
الأولى ليه لابسه عندك مقابله؟؟؟؟
والسلام عليكم ورحمة الله وبركاته،،،