يوميات شيخ النظر

بسم الله الرحمن الرحيم

السلام عليكم ورحمة الله وبركاته،،،

ماهي الحياة





الحياة فرصة يستفاد منها...



الحياة جمال نحترمه...



الحياة مأساةَ نتغلب عليه...



الحياة كوميديا نتمتع بها...



الحياة وعد ننجزه...



الحياة أغنية نغنيها معا...



الحياة عباده نؤديها...



فالحياة الفانية طريق لحياة خالدة...



تعلم كل جديد وأنشد الكمال فلا يوجد أشياء مستحيلة أو أناس معصومة من

الأخطاء فجميع من ترى عينك ليسوا بأحسن منك....


فما تعيشه بيئس هو لغيرك دافع قوي للإنجاز...


قف أمام مرائتك وأعلم أن لم تحترم من ترى فيها فلن يحترمه أحد...


فالحياة تدب في عروق جسدك تستشعرها ولايمكن أن تراها حتى تبتسم في

كل صباح بعد أن تذكر الله جل علاه....


والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،

من يقول أن الشغل في البيت عيب؟؟؟؟؟؟




أنت كنّه ماهوب عاجب العنوان وناوي تطلع من المتصفحة تحسبني وزير

طالع في القناة الرياضية وبيقعد يقول شباب البترول يغسل السيارات (لا

أحسن قلها)...


ماعلينا وشلونكم .. عساكم بخيــر !!


ماضنتي بعد المناصحه تلقاكم بتسى وش نقول له عادي عادي أي شئ

بخطرّكم هذّووووووووووه أصلاً مانيب سامع لكم مثل ماأحد سامع لمعاناتكم

وشكاويكم غير رب العالمين....


يالله يديم الخيـر والصحّـة على قلوب الجميع يأخي تبسم قاعد أدعي لك....


ولا تنسون عصير الخريف ( يبرد حرارة الصيف) والله من زين الإسم

ماعندنا إلا فصلين صيف وشتاء وطالعين لنا فيها خريف وربيع وينهم فيه

نسمع بهم ولانشوفهم مثل دورات العمل (تكفى أبلع ريقك لاتطيح عيونك

وتبسم حراااام عليك عاقد حجاجك)...


نرجع للبداية (لاتطالع فوق كمل ياآدميييييييي) ..


يالله علمني من يقول أن الشغل في البيت عييييييييييييب؟؟؟؟؟؟؟؟؟


هذا ماعنـده ماعنـد صندوق التنمية العقاري من فرص زيادة القرض

الإعماري...


وبعدين وش فيــه الشغل .. !! لا عيب ولا حـرام


والشغل احسـن من الطرارة والتسدح عند بيوت الناس لا وبعد فيها يمكن

يعطونك او مايعطــونك....


سؤال مداخلة من أعز أصدقاي سعدنيما تحسّون أني داخل بقوووه

للموضوع؟؟؟ أصبروا لاتجابون خلوني بفــك زرار ثوبي أوووووف زانطني

مطلع رقبتي كنّها في يد شيكتااااااااااا....


وهالموضوع دايم اشوفه .. يتكلمون عنه في قناة المجد وخاصة في برنامج

مهنتي (شفت أنا ماعندي دش وموضوع التثقيف الجنسي شكله صلخه)


وأنا من محبي هالبرنامج .. ومن المؤيدين له << أنت كل برنامج تحبّه الله

يعين البرامج علي كلها أحبها وأتابعها ولاتغير بي شئ...


يالله شدوا حيلكم معي بدية في الصدق اللي خلانـي أأكد على كتابة الموضوع

.. وارزّهـ في رأس المجلس قصدي متصفحتي...


من شغالتنــا(سارووووووووووونه) طسّــت .. من غير عودة وأنا أحاول

أكون شخص إيجابي لالالالا ماهو جابي يعني شطووووووور وليدك وإلا لا

يمه ..


وتخبرون الواحـد لما يكون بيته مافيه شغاله (أقصد الضعوف الفقراء

والمساكين اللي مثلي الله يجعلنا محشورين معهم أسوة بدعوة سيد الخلق صلى

الله عليه وسلم) ... ياااااااااخي الواحد ياخذ راحته بالمطبخ بأحسن ما يكون


ولا كل شوي .. مرسل بنته .. تعالي روحـي .. ويلقــاها عذر أن الشغاله

منحاشه وإلافي المطبخ (( هذا اللي يستحي للي عندهم شغالات))


حنّـا فالبيت ثمانية .. أم نمر ونمر.. وبناتي الثلالث وعيالي الثنين الله يحفظهم

جميع وأنا طبعا بغيت أنسى نفسي كذا المجموع شكله وصل خمسين....


اليوم من صليت الفجر وأنا منطنخ (يعني صاير شقردي) فأروح المطبخ وافتح

الثلاجة واطلع الخبز واروح الميكرويف واسخنه واشب على البريدز واضبط

الشاهي وأفك حليب قواطي بالسكين لين غدى (كنّه كرشت خروف من

التطعين الغير موفق)


واجي للصالة وأصرخ بأعلى صوتي ياقووووووووووووم أني أرى رؤساً

قدنامت وحان وقتو ذهابها للمدرستي (وش رأيك ياأبومازن فيه لغة هاه؟؟؟)

وشافتني أم نمر قالت : الله واكبر وش عندك يابو الشباب على هااسناعه

(((ياحليلها أم نمر صارت مزوحه وشبابيه من شافت الجديه في مشترى

البيت)))


قلت ابد يا غاليتي (والله من الصدق معروفين يالسعوديين بالجلافه) .. تخبرين

الواحد لازم يخدم نفسه ..والآخرين قالت أييييييييييييه هين أقول بس لا تنسى

اذا خلصت تغسل المواعين حقات فطورك وعيالك (أفا قلبت ماأمداني

مدحتها) لأنك حايس المطبخ حوسة هالوراعين اللي يفحطون في الشوارع

قلت ويييييييييييحك ثقلتك أممممممممك وش دراك بهم؟؟؟؟(أمزح ماأقوى

أصلاً أبرطم قدامها صايره زي أبونمر أول زعوووووووووووووله)


قلت طيب ولا يهمّتس .. وأنا يوم خلصت خذيت الفطور ونزلتـه بالمطبخ ..

وصاروووخ لقبري أكتب في متصفحتي مير ولاألقى أي مداخله

وأنقهرررررر وأقول شكلي بأترك هالسحات (لا تكفاااا هوّن وأجلس)....


وشوي وطار الوقت إلا ويأذن الظهر واروح اصلي ويوم رجعت من الصلاة

قالت أم نمر ماشاء الله خوش غسيل للمواعين ....



يوووووووووووووه ياربيـــه والله يا أم نمر نسيت وأنا اصوت لبنتي غاليه

وإلا جميلة ولايردوووووون يالله ماأحد معطيني في هالبيت وجه أشوااااااااا

توهم ماطلعوا من المدرسة...


طيب الشكوى لله واجي يم المجلا وآخذ السفنجّة وأحط فيـري (((على فكرة يا

شباب ياللي تحلقون اللحيه الفيري حاقــة تانية خالص ليه رغوووووة

ماحصلتش يدوم ويدم كأنك تعلك ثوووووم جربوووه)))...


أييييه صدق ياللي قاعد تقول الزلابه صاير شغاله واغسل المواعين وأنا اغسل

حسيت بنشاط زايـد (امحق من نشاط) وأروح المستودع وأجيب كل

المواعيييييين اللي فيه وأغسلهم وأطلع وأغسل الونيت وأمر على سيارات

الجيران وأغسلها مستنشط...


لا من جد حسيت أن غسل المواعين مافيه شي وش فيها اذا الواحد يساعد

زوجته وخاصة لما يكون البيت مافيه شغاله وطبعا فيه اشياء خاصة للحريـم

لكن الشيء اللي يقدر عليه الرجل يسويه وخير قدوة لنا حبيبنا محمد صلى الله

عليه وسلم كان يقوم بالاشغال مع اهله فكان يكنس ويغسل عليه الصلاة

والسلام وحنّا وش اللي ينقصنا ؟


أوووووووو بس اللي نعرف له اذا الواحد مطول شعره يقول ( الرسول صلى

الله عليه وسلم شعره طويل) وكأن الرسول عليه الصلاة والسلام ما فعل شيء

الا أنه طول شعره بابي وامي صلى الله عليه وسلم ..


طيب أنت يا اخي ياللي تقرأ .. وتقول بيخرب حريمنا علينا وتنافخ اشوفك ايه


أنت صح علي صح؟؟؟


وش فيــها إذا قمت ورحت صلحت لك شاهي ؟ بدل ماتقول : يا فلانه هاتي

شاهي يا فلانـه جيبي لي ماء يا فلانه هاتي ملابسي مابقى الا يا فلانـه

(محظور فقط للمتزوجين) بعد أنتي يافلانه معطيته وجه...


والشيء اللي اكبر من كذا أن الواحد يقعد يآمر وينهى على أمّـه بحكم أنها

حرمـه وهذا من أختصاص الحريم ياخي عسى تحرم عليك عيشتك (صفقوا لي

يالحريم عاد) وش اللي حريم وخرابيط هذي امّك ياعاااااق المفروض أنها

ماتدخل المطبخ ابد لخدمتك وأنت اللي تخدمها لو في البيت 1000 شغاله عفواً

يا حبيبي غازي القصيبي يقول بس شغاله وحده تكفي ليه زيادة العماله في

الدولة.....


مثل ماقلت لكم يا شباب الشغل مافيه عيب والعيب أن الواحد يتكبّر على اهلــه

ولا يساعدهم والرسول صلى الله عليه وسلم يقول في الحديث عَنْ أُمِّ الْمُؤْمِنِينَ

عَائِشَةَ رَضِيَ اللَّهُ تَعَالَى عَنْهَا قَالَتْ: قَالَ رَسُولُ اللَّهِ صَلَّى اللَّهُ عَلَيْهِ وَسَلَّم

(خَيْرُكُمْ خَيْرُكُمْ لِأَهْلِهِ وَأَنَا خَيْرُكُمْ لِأَهْلِي ) أَخْرَجَهُ التِّرْمِذِيُّ


وهذا ماهو منقص من رجولتـك ولا ذابحك الشغل بالبيت


يعني اذا شفت زوجتك تلف السفرة عقب الغداء او العشاء مافيهاش حاقـة يعني

أنك تساعدها او امّــك وحتى في تحضير العشاء او الغداء تروح تجيب الماء

او السفرة يا حبي لكم يا شباب (كل هذا عشان أم نمر عاقبته بتغسيل

المواعين)...


وش رايـكم أكمّل وإلا يكفّي هاه يالحريم أبي أسمع صجّه في البيت أبي

أعتصام ومظاهرات؟


تنفـع الحملــة هذي ؟ من قال الشغل عيب في البيت والا مصيرها الفشل ؟


طيب ياللي تقول أنه بتفشل إذا طلعتوا مجموعة للبر او للاستراحة من اللي

يطبخ ؟ من اللي يغسل المواعين ؟ ومن اللي يرتب المجلس بالاستراحة ؟


أشياء نقول أنها من اختصاص الحريم واذا صرنا لحالنا سويناه (لايلعبون

عليكم الرجال ويقولون معنا عامل يسويها) !!


يعني معناتها أن الرجل يقدر يقول بالاشياء هذي بكل يسر وسهوله اذا أنه

تخلّى عن التكبّر شوي وتواضع ومن تواضع لله رفعه (درر يأبونمر)...


وبعدين وشووله تتواضع ؟ غصب على خشمك تتواضع هذولا اهلـك اذا

ماخدمتهم أنت من بيخدمهم ؟ ولد الجيران؟ وإلا السواق؟؟؟ (بينبسط الليبرالي

اللي يقرى ويقول قايل لكم خلوا المرأه تسوق)....


عاد مثل ماقلت لكم ياقراء متصفحتي الأباطر الأقوياء ياقرندايزرات...


بدال مقاطعة المنتوجات ثماً يغلا علينا المنتوج الوطني لا ياخخخخخخخخخي

قاطعوا الرجال وخلوهم يشتغلون معكم وليه معكم بدالكم يعني هم أحسن مني

في أيش وإلا والله لأبلغ عنكم جمعية حقوق الحيوان قصدي الإنسان ومن

هذي الساعة الشغل في البيت ماهووووووب عيب....

أرتحتوا ماطريت الدوله ولا العطالة ولاالأجانب اللي سادين شاغر الوظايف...


والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،

بنغالي وليبرالي


واحد ساكن جديد وعند بيته كراتين كثير ولفت نظري أحد الكراتين مكتوب

عليه بنغالي وليبرالي....


فعساي عرفت أقراء ماكتب على كراتينهم عاد كنت أقراء بدون نظرات....


البنغالي : في الإحتفالات أول من يجي وآخر من يروح بس عشان يخدم

المدعويين.


الليبرالي : في الإحتفالات أول من يجي وآخر من يروح بس عشان يخدم

الملعونين.


البنغالي : من قريب يبين رجال من خلاقينه وكثرة شعره ومن بعيد كنّه

مفاتيح ضايعه...


الليبرالي : من بعيد يبين رجال من ترززه ومن أدبه ومن قريب من يحكي

يغدي حواق رز مكثّراً مويته...


البنغالي : جرذي جنوب أسيوي يخرب ويتحدى...


الليبرالي : سحبّلة رماد أو حيّة التبن يقرص ويختفي...



البنغالي : يجي بدون ريموت وكتالوج...


الليبرالي : يجي مبرمج ويحرك بالريموت من بعد...


البنغالي : يعمل مع أي تيار وهذا مايميزه...

الليبرالي : يتعطل أمام قوة التيار الديني....


ملاحظة هامه

عملائنا الكرام الليبرالي والبنغالي كلاهما يعلم أنهم منبوذون في المجتمع

السعودي ولا باليد حيلة...

مع ملاحظة أن المباع من كليهما لايرد ولايستبدل...


والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،

المواطن والدجاجة




المواطن : صباح الخير صاحبة المعالي

الدجاجة: صباح النور أيش تبي تفضل

المواطن : أنا أبي أشتريك و الجيب خالي

الدجاجة: ويلك عليك عقاب الله يا مغفل

المواطن : حرام هالدعاء ماعندك رأفة بحالي

الدجاجة: فقير وحقير و ما تبيني ازعل

المواطن : بحق الله تجي تزوري عيالي

الدجاجة: في بيت الفقر بالله عليك وش أفعل

المواطن : بالله ليه هذا الكبر و هذا التعالي

الدجاجة: لأني طلعت فوق وأنت لتحت تنزل

المواطن : أنا داري أن سعرك صار غالي

الدجاجة: نعم أصبحت أغلي منك و افضل

المواطن : هذا الإنجاز اللي حققه كل ليبرالي

الدجاجة: وبقي ماشفت من الذل غير الأسهل

المواطن : عاقبه الله الذي جوعنا ليالي

الدجاجة: ياحاسد النعمه أفطن وتعقل

المواطن : أنا ما أحسد بس اشكي ضعف حالي

الدجاجة: تستاهل يذلك و أنت رضيت بالذل

المواطن : كثرت بقبقتك وأهنتي أمالي

الدجاجة: أنا مـا أحـب الذي جـيـبـة مؤجل

المواطن : أيش أسوي يا دجاجة ذا سؤالــي

الدجاجة: تصبح سـارق مـع الحراميه تنهل

المواطن : أنا إنسان وأخلاقي تحكم خـصـالـي

الدجاجة: بـدون أخـلاق لـلـمـطـلـوب بتوصل

المواطن : أنا بغزير العلم أخدم في مجالـي

الدجاجة: ياأبو ضمير حي أتـحــداك تنشل

المواطن : أنا أبي بالحـلال أربي عيالي

الدجاجة: عيالك بيموتوا جـوع يا أهبــــــل

المواطن : أنا في العلم صاحب فكر عالي

الدجاجة: عشان كذا مارح تشتري مــنـزل

المواطن : دجاجة يا أم ريش ابيض يلالي

الدجاجة: وش تبي أنت أبوثوب أغبر مهلهـل

المواطن : أنا أبي أكون ديك شامخ للمعالي

الدجاجة: وللأسف ماصرت إلا مثل الدجاج تتسول

المواطن : يكفي خلاص يا دجاجتي البيضا تعالي

الدجاجة: وش تبي ياأسمر من الشمس منحل

المواطن : بأكلك لوكلك عظام ياطعم حالي

الدجاجة: وسـعـري فــوق مــا عـقـلـك تـخـيـل

المواطن : صباح الجوع يا وطن أتعب خيالي

الدجاجة: لايق عليكم الجوع وهذا الوضع مطول


والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،

رؤيه مبسطة للكتابات الساخرة



الكتابة الساخرة من فصيلة الشوكيات قد يأتيك شوكها يتطاير

كالصبّارصبره يفرز أشواكاً...

ومنها ما يحددك هدفاً كزّبانة الدبور يطير وراءك ليلسعك...

ومنها ما يخدرك لينال منك كقرصة البعوضة تثير فيك الحكة...

وكثيرها كالوردة جميلة اللون طيبة الرائحة تغريك بأن تمسكها

فتجرحك دون دراية منك أشواكها...


فالكتابة الساخرة فن كامل الأهلية وهو فن كتابة الواقع وآلامه لذلك نجد

إسقاطاته في جميع شؤون حياتنا اليومية الاجتماعية والفكرية

والاقتصادية والسياسية أيضاً والإسقاط السياسي هو إسقاط كبير ومنتشر

كثيرا وربما لا يستطيع الاستغناء عنه أبداً وأكثر ما يدل عليه هو إغلاق

الصحف الساخرة على امتداد تاريخ الصحافة الساخرة وإلا فأين هي

الصحف الساخرة اليوم في بلادنا العربية؟


بيد أنها تجاوزت في الإنترنت مقص الرقيب إلا أن ألسنة كتابها لم

تتجاوزه....

فأسئل الله تعالى أن يكون الهدف من جل كتاباتي النفع للإسلام والمسلمين


(((منقول بتصرف من حوار للكاتبة الصحفية / سلام نجم الدين شرابي )))


والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،

ياأبو نمر حللني







دموع وبكى وقمع في النفس لدرجة أن السرير يتهزهز من شدّة البكى...





سلامات يالغاليه ماشر...


حاسسسسسسسسسه بضيقة أحس بصدري منتّـك كن أضلوعي بتتكسر على

داخل وأيه هي هي تبكي بنحيب...






تعوذي من الشيطان وأذكري الله يابنت الحلال...




شايفني كافرة وجالس تلقني التوحيد...






لاحول ولاقوة إلا بالله وش هالحتسي مير صليتي؟؟؟





وأنا ماأقول لك مريضه إلا تقول صليتي شايفني معلقة الصليب

وتصرخخخخخخ بذيك البكوووووووة...


وتستطرد أنتبه لعيالي وواعدني أنك ماتجيب لهم مرت أبوووووووووووو

تعذبهم زي اللي في مسلسل اليتيمه...





بطولة مين ومتى أنعرض...




أنت فاضيييي ياربييييييييييييييه هالرجال بيذبحني...






ليه جالسه تشوفين نزاع الأرواااااح الآن؟؟؟؟




الله يحفظنيييييييي أن شاء الله أنت وعيالك والبـــــكى متواصل...






آمييييييييين طيب قومي توظي وصلي ركعتييييييين وأستغفري!!!؟




لا لا لا تعاااااااال أقرى علي البقرة وآل عمران يقولون زينة للضيقه...

وأيه هي هي تبكي بنحيب...





كل القرآن زين يابنت الحلال بس لاقمت إن شاء الله قريته كاه عليك ونفثت في

الخزاااااااااان عشان تتسبحين بالقراية....




هالنااااااااااس مايعطون خير من قلت ندوووور بيت وهم معطينيها....






وشهي الدراااااااااهم....؟؟؟؟





لا العين وشفييييييييييك تتريق علي شايفني بخيييييير؟؟؟؟





الله يشفييييييك بس حاب ألطف الجووووووووووو...




تكفاااااااااا أقرى علي وشهدني وحللني ياأبو نمر حللني


حللني وهي تتشهد






وأنا أقرى الفاتحة وبداية البقرة إلا وأسمعععععععع

شخييييرها وأنووووم ومن صحيتها لصلاة الفجر قامت كنّها أندرتيكر

(الحانوتي المصارع)....





أنا مريضة وأنت اللي مرضتني وسباب وشتم لين ودعتني للمسجد اللي

ماخلتني أطلع له إلا لما أقااااااااااام....



والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،

المطوع









هالمرأه وش تبي تسوي بي كثرت

أوجاعها وونونتها تقول قطوه تحننننننننش ولي قلت مافيس إلا العافية


أستقبلت القبلة وبتسست وهي رافعة يديها وتقول يااااااجعل من لامني يونس

ماونسسسسسسسسسسسسسست وتكررها لين حسستني أني نتنياهو وهي

الشعب الفلسطيني فرج الله لهم...


وديتها للمستشفى فحص كامل مع جميع التخطيطات مخ وأعصاب وقلب

الله وكيلك ستة آلاف ولابها إلا العافية ثم تقول هالمستشفيات كذابين

وماعندهم إلا الخرطي بس يلعبون على الناس وعلى قولة بنتي غالية تقول

أن أم فهد عمدة الحارة تقول لها مابس إلا نفس من زييييين طبخسسسس

عطوتس أيّاااااااااها ومن مطوع إلى مطوع إلين صرت أنا مطوع أقرى

على الناس وأطلع جن وأفك سحر وكل شئ بأمر الله ماعدا

ياخخخخخخخخخخخخخخخخي هالمرأة عجزت عننننها أفيدوني أفادكم الله

نظراً لتعديتكم هذه المرحلة والموضوع مطروح للنقاش....



للأخوة الراغبين في القرآيه عليهم بأنزل لكم السنه الجايه ملف صوتي مع

جهاز بخار للنفث فقط بمئتان ريال ولو ماطبت نرجع لك مئة ريال ومئة

حقت المواصلات لأن اللي بيوصلها لك بيجيك على رجليه أزود للأجر...



التسعيرة






كرتون المويه الوطني 250 ريال الصغير و500 ريال للكبير



كرتون المويه المستورد 2500 ريال الصغير و5000 ريال للكبير



قرأية في الخزان 3000 ريال...



قرأية في الوايت للي أهله في البر 3500 ريال...



رش عظم الفيلا بالقرآية 15000 ريال



صب ميده وقواعد 2500 للعمود...

من نقرى عليك مش حتأأأأدر تغمض عينيك..






قراية على مبتعث من خلال الماسنجر 750 ريال 200 دولار ميكانيكي


قراية من خلال الجوال لأي مكان في العالم حسب منين تتصل 100 ريال

للدقيقة وبعد الدقيقه الخمسين القراية مجاناً هذا إذا ماقطع وخلال هذا الشهر

الدقيقة بعشرين للمتصلين من stc...


عند إحضار شخص مقرقش عنده درهمااااااااااان تحصل على قراية مجاناً

والعرض ساري حتى نفاذ الكمية...


خصم خاص لحامل هذا الإعلان وهو عبارة عن موقف مجاني بجانب

المقرأأأأه...



ملاحظه مهمه جدأً جداً (ركز عليها يمكن بتجيكم في الإختبار)




الأسعار نهائية وممنوع الدين ولاباس في الشيكات المصدقة وفيزا وماستر

كارد وحوالة التيلي موني...


مع تحياتي شيخ مشايخة شمل آل نظر وماجورها



حبايبي الكلام للجميع والله أني لاأستهتر بكم ولكن أن يقراء الإنسان على

نفسة ويصلح مابينه وبين ربه ويتعوذ من الشيطان الرجيم فلن يصيبه

مكروه ولن تقدره قوى والله يحفظ ويشافي جميع المسلمين فلي تجارب

سأذكرها لاحقاً بمشيئة الله....


والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،

مطوّع الحارة




بداية إحتراف القراية



اليوم من بد الأيام جت عندنا أختي من أبوي من حدا القرى في المملكة

وأسمها أم بندر وهي عمرها حوالي 45 وأربعين حسب ماتقول أولة العام

مرت جدي وهي تحلف أنهم مكبرينها عشان الشوووونه وعشان تقسيم

الأراضي في عهد الملك فيصل ومازالت الجهات المختصصه تتحقق في

الموضوع وسوف نوافيكم بالمستجدات لاحقاً...


أستقبل في حفظ الله ورعايته وودع بمثل ماأستقبل به من حفاوة وتكريم

يوووووووووووووه هذا اللي يتابع هالتلفزيون اللي لعب في كنترولي

(حلوه كنترولي هاه!!!؟؟)...



المهم والتراحيب والغديات والعشيات لين غدى بيتنا كن عندنا عزاء ذا

داخل وذا طالع وهالحريم ينزلون بمواعين ويطلعون بخياش صغيرات

لدرجة بغيت أروووووووح أبلغ عن أختي وش ترووووج له وإلا أيش

القصة....!!؟


وأتنحنح وياولللللللللد وأدخل أسلم عليها وأحب رأسها ولينها منسدحه على

دوشق (مطرحه بيضا عليها ورود زهرية) ومتغطيه بسبعة عشر ألف

كنبّل (بطانية) ذيك الكروهات (ماركة جوشي) أم هدب اللي لانمت دخل

الهدب في خشمك وتحسبه ذباب...


وأدنق على رويسها وتدفني وتقول ألحق لك يالشايب وإلا تبي تكبرني قلت

طيب أحب كتفك قالت لا دنق أنت أنا بأحب رأسك وأدنق وتجرني من

علباي بتحب رأسي وتبي تقربني لثمها وأطيح كلّي عليييييييها وتصرخ ذيك

الصرخه اللي سمعها أهل العراق ومن قوتها هانت عليهم مصيبتهم...


وأتعدل واعدلها وقلت الله يهديكم من أسرة كلكم تحبون التسدح والتبطح

وبعدين وش هالخياش اللي يطلعون بها الناس قلت فقيعات جايبتها صوغة

(هدايا) لكم وللناس قلت أشوا أحسبك من ذا اللي يروجون منشورات وإلا

شئ بغيت أبلغ عليك وأخذ الجايزة المالية...



ومن تعشينا لبست ورحت للدوام لأن دوامي هالأيام ليل ولما جات الساعة

12 من منتصف الليل فيرن التلفوووون والمخرج يسوي زووووم عليه مع

موسيقى تحذيرية وأنا يدي تنتفظ ومن شدة النفظه أنفصخت الساعة وقبل

لاتوصل الأرض أسوي حركة بهلوانية وأطيييييييير وألقفها لين أنكسر

كوعي أمزح (عاد من زين هالساعة أم صليب اللي تولع في الليل ولو

ماعشيتها وقفت وأن عشيتها تقعد طول الليل تعلج (أي تمضغ) تك تك تك

تك وأنت العرق يتصبصب منك تحسب أنك بتنفجر)...



وأرد نعععععععععععم...


أم نمر : إلا أم نمر بصوت حزين كنها أم كلثوم في أغنية فات الميعاد

آلووووووووه...


لبييييييييييه يالغالية سمي حاضر وشهوووووه؟؟؟


أم نمر : جلست والخوف في عينيها هو الموجود قرأت فنجاني وقالت

ياولدي لاتحززززززززززن فالحب عليك هو المكتووووووب....


وأنا أصفر وأصايح الله الله عزززززمه على عززززمه على عززززمه

الله يا رباب كمان تاني كمااااان....


أم نمر : ياأبو الشباب تعال شف أختك عيونها طايره كنها قطوووووه كاشح

في وجهها النور العالي وصايره خضراء موللعّه...


وأنا أزفر وأقول الليييييييه أمدااااااها تحن لرجلها توها جيتن منه...


أم نمر : موللعه عكس طافية يعني ماتغمض عيونها قلت هذي قناة ميلودي

ماهي عيون...


وشوي ومع أم نمر إلا ويدق نسيبي أبو بندر رجل أختي حصيص أم بندر

وأقول لأم نمر لحظه لو سمحتي فيه مداخله من النسيب أبو بندر ويقول

هلا بالنسييييييييييييب قلت هلا والله وش أخباااااااااااااااااارك قلت

بخييييييير والحمدلله وأنت وش أخباااااااارك قال بخييييييييييييييير

يااااااااااخي أختك آذاتنيييي صااااار له أسبوعييييين ماغييييير مطييييره

عييييوووونه بالسقف وأقوله يامره نووووووووومي ولاااااااااتنااااااااام

تكفاااااااا شفه وووووودبر لي وووووضعه (هالنسيب عنده صرفيه في

حروف العله وينك ياأم مالك تقطعين الحكي عنه)...


ويسكر وأرجع لضيفتي أم نمر وأقول عزيزتي أم نمر سمعتي مداخلت

المستمع لنا عبر أثير بنت الجيران وش رأيك في كلامه؟؟؟؟ (صكيت

عليها مررررره)...


وتبتسم وتقول أسمع تعااااااااال خذ أختك وودها لشقق مفروشه لا والله

أنطلها في الشارع خوفت العيال ولاعرفوا ينامون يحسبونها ذيك الألعاب

اللي تولع في الليل زي ساعتك....


واستأذن من الشباب قبل لاتفضحنا قدااااام الضباان قصدي العربان

وأشواااا كان أبو عبدالله إجازة وإلا علووووووووووم وأركب سيارتي لين

وصلت البيت وأدخل عليها سلامات ياوخيتي وش فيتس وتطقها ذيك

البكوووووه وقال والله ياخوي ألهتنا الدنيا و و و و و و لي أسبوعين مانمت


قلت يمكن أني مشتاقة لوخييي فجيت أزورك ومن شفتك طار النوووم زود

من عيوني (الله من زين الحكي بعد شاربه قهوه ماشفتيني)...


وأطلع أم نمر وعيالها وأصك الباب (ومتأكد أنهم وراه يتسمعون خايفين أني

أكتب لها الونيت وبعدين مايلقون وش يورثون)...


قلت ياأم بندر فيه شئ بينك وبين رجلك قالت لا والله قلت طيب سلامات

وشفيك قالت ماأدري أحس بخوووووف أني بأمووووت لين غمضت ومن

ساعتها ماأقوى أغمض قلت بس هذي علتك قالت أييييه قلت أجل شوفي

بأروووووح أصحي الشيخ يصحي أمه معه ويجهزون لك قراية ووحده

بوحده هذا يجون له الناس من أمريكا الجنوبيه عشان يقرى عليهم من

المسلسلات المكسيكيه الطويله والأتراك الحين حاجزين معه بعد ستة أشهر

عشان طول مسلسلاتهم ومابقى أحد مايجي له وعشاني موصل له كراتين

مويه لي خاطر عنده وأدق على 902 وأقول لها شوفي هذا السنترال حقه

لأني أخبر ربعنا لطع على الإنتظار وساعة لين ردّو ومن قال آلوووه قلت

هلا والله ياشيخ أنا أبو نمر راعي الونيت اللي وصلت لك البطووول حقت

الماء وعندي أختي مريضة تكفاااا ياشيخ له أسبوعين مارقدت ياليت

تصحي الوالده وتقرون لها قرايه سبيشل في بطل وبأمركم الحين آخذه...


وأسكر لين حجاجها منفرد كنه واحد يتمغط الصبح وقالت وش قال؟؟؟؟


قلت من حسن حظك (وتتبسم عن ذيك الثنايا المكسرة) يقول أنهم مناوبين

اليوم 24 ساعة ليلة جمعه القراية فيها مباركة ومدعياً لك ياوخيتي اللي

رد علينا العادة من يردون على طول يحولون على تقييم مستوى الخدمة....


وأجيك طالع وتلقطني أم نمر أمس ماقريت علي ولاكلمت لي الشيخ وإلا

عشانها أختك أسمع جب لي معك بطلللللل وألقطها بحلقها قلت ماعااد إلا

هي قالت قارورة صحه مقرين فيها...


وأنقز لك على الخط السريع الرياض مكه لأن البقالة صارت تسكر من

12 ليلاً حفاظاً على سلامتهم...


وأوقف عند اليماني وأغمز له من العج وأروح آخذ قارورتين صحه أم

ريالين وأوقف أدور الزعفراااان ويقوم يعطيني حبوب بيض مايله للبنية

في منديل وقال بمئتين وخمسين وقلت وش ذا شايفني راعي تريلا أدور

حق الخط؟؟؟؟


قال لا أمزح معك هذا فصفص مقشم بغيت أرميه...


وآخذ المويه والزعفران وألبق قدام وأفك المويه وأحط فيها الزعفران

وأسمي بالله وأرجهم وأشرب من كل وحده شوي وأجيك طاير للبيت

وأعطي أختي وحده وأم نمر وحده وقلت الصلوات تقضونها في وقنها مع

السنن الرواتب وصلاة الشفع والوتر وبعد كل فرض تأخذون ثلاثة غطيان

والرابع والخامس تمسحون به على صدوركم وتقرون المعوذات وتنامون

على الجنب اليمين وممنوع الأكل بعد صلاة العشاء...



الحكي أني طلعت منهم الآن وشخيرهم يسمعه اللي في تبووووووووك

أصصص خلووووهم نايمين لاتتحركووووووون توقظونهم وبكره إن شاء

الله بأكملكم باقي النتايج وأنا الآن في العمل قاعد أكتب لكم مادار....


والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،

صباح الفل






صباح الحب ياأغلى وطن



صباح الخير ياأغلى شعب



صباح الخير يانجد



صباح الخير يا قراء متصفحتي...



تصدقون هالشركات ماعاد عندهم أنظمه قبل شوي دقيت على 905 اللي


يكشون الذبان من قل الشغل ويرد علي ذاك الأجودي وطلبت منه أرقام


مجانية لبنوك فقال وهو مستعجل آسف ماأقدر أعطيك أكثر من ثلاثة


والمفروض ماأطول معك أكثر من ثلاثين ثانية حتى طريقته مسكين واحد


عقب الشينة توظف والمصيبة الغبي اللي حط هالنظام وش يبي يوصلنا


له؟؟؟؟ أن هالشركة أخيس شركة في العالم من خدمات أنا عن نفسي متأكد


من ذلك ياقهررررررر يترجاني أخلص المكالمة....

والسلام عليكم ورحمة الله وبركاته،،،

بسم الله الرحمن الرحيم

السلام عليكم ورحمة الله وبركاته،،،

يبي بيت




سمع بإرسال رسالة (من الجوال) مكتوب فيها حلم وبما أنه متفائل جداً

بأن الفوز حليفه أرسل تريليون رساله لدرجة أن كومبيوتر البرنامج

ماطلّع من فايزين الدفعة الثالثه إلا أسمه ورقم جواله (مسكين يبي

بييييييييييت) وبما أن هذي البرامج ضحك على الناس وبدون توعية

مثلها مثل مهرجانات الأسواق ياالغرف التجاريه حط سياره ومليون ريال

جائزة ومن هالحكي لدرجة فيه سوق في مخرج 15 يوزع أراضي

وتلاقي عنده الزحمه صكت على المسجد المقابل له في صلوات التراويح

لأن الناس هلكانه تبي بيوت وهو حاط الجائزة أرض تجاريه في الواقن

واق عليها تصريح من البلدية بدور رابع مع شقتين في السطح...


المهم الرجل كسب مليون ريال طار من الفرح وأتصل بسرررررررعه على

زوجته يعلمها قال لها بسرعه جمعي ملابسك قالت له الشتويه ولا

الصيفيه؟؟؟؟؟


قال لها ماهو مهم المهم أرجع ما أشوف وجهك...


وتأخذ الضعيفة خلاقينها وترووووووح بيت أهلها....

ومن يوصل البيت يلقى جيوب من شرطة الأمارة

عند بابه لأن فاتورته وصلت عشرة ملايين ريال سعودي مشتكين عليه

شركة الإتصالات والجائزة اللي فاز فيها مليون ريال يمني حوالي خمسة

وعشرين ألف ريال سعودي...

الآن هو في السجن يسئل راح أطلع في عفو الأمير سلطان؟؟؟


قالوا له ولا في عفو أحفادة...


والسلام عليكم ورحمة الله وبركاته،،،