قصة وقصيدة الرجل مخابر ماهم مناظر

[المنتقد]

بســم الله الـرحمــن الرحيــم
السلام عليكــم ورحمـة الله وبركاته ،،

قصة وقصيدة الرجل مخابر ماهم مناظر

يقول المسولف ان الشاعر عبدالله بن راشد الدحام , من اهل ثادق يقال انه توفى سنة 1378هـ الله يرحمه واموات المسلمين كان الرجال حبيب ووسيع صدر وطيب وعشير غانمين والرجال مشهور بسمعته الطيبة وكان له بعير حاط عليه مزواد ومعه بضاعته حاطها على الجمل غادي مثل اللي معه دكان متنقله يطلع ويسافر على ظهر هاالجمل ويدور مرازق الله يروح من ثادق الى الصمان يدور العيشه وهو رجال يدل ويعرف الأرض والمعالم في هالصحاري .

الوكاد ان الرجال معه بضاعته ويدور على هاالبدو في مكاناتهم و يبيع عليهم بضاعته الى كانت عبارة عن قهوة هيل مسمار وزنجبيل ومعه شمغ وكباريت وفتايل سراج الاغراض اللي ما خف وزنه ويحتاجها الى فى الصحرى ويقعد يوم يومين يبيع والى مامعه يصبر عليه و يوسع الصدر ويرجع بعدين يستافي منه الحالصل , ويقول المسولف ان دحام هذا مهوب وسيم ويميل الى السمار و كريم عين وخلق الله حسن وانه رث الهيئه ولكن محك ذهب ويعرف الرجال وسريع الملاحظه ومنطقة زين ودقيق ويرى لنفسه قيمة الحاصل في احدى سفراته جا عند راعي هك البيت الشعر الكبير وراعيه راعي حلال وقام الرجال ونصاه ولا حصل فى البيت الا راعيته واستقبلته وقالت له رح للمجلس واكرمته وجلس عندهم يومين او ثلاثه وعادته يروح لجيرانهم ويغيب فترة يبيع ويعود لهم .

وفي روحة من روحاته يوم رجع نوخ بيعيره وقلط فى المجلس, واسم راعي البيت اللي دحام جالس عنده اسمه فريج وفريج هذا شايف هيئة دحام رث الهيئة وملاحظ المره تكلمه كلام رجال حشيم وتحترمه ودحام ما بين نفسه الحاصل يوم جا يوم من الايام حل عند فريج ضيوف وقلطهم وهو يجيب الدله ويصب لهم القهوه لهاالضيوف و دحام ملتزم احترام المجلس ولا راح في لرأس المجلس قعد في طرف المجلس وهاه يوم حس فريج اللي يصب القهوه ان الدله قضت ما بقى الا سريبها و يصب لدحام في هالك الفنجال سريب الدله وعطاه اياه يعني حاقره ما شاف له قيمة وصارت في خاطر دحام , اخذ دحام الفنجال وكبه وكتمها في نفسه هاك الساعة ولا قال شي وخلا الضيوف لين راحوا وبقى في المجلس , وهو ما عليه قاصر القهوه والهيل كل شي معه على بعيره لكن انغبن كيف ان راع البيت حقره وصب له من السريب وهو ضيف وها الحين يبى يدافع عن حقه .

الحاصل ان دحام علم المره وقال ان رجلك هذا سوا كذا وكذا وش اسمه قالت فريج والى هي قد اوحته يقول ابيات قالت انت شاعر قال أي بالله شاعر وقال لها يوم ان رجلك حقرني وصب لي سريب الدلة اسمعي هالابيات وعلميه ابها قالت وشي قال :

يافريج شب النـــار لا جوك عجليــن
................................... قهو الطروش وما بغى الله يجيبه

وبالك تقهوي الزين وتخلي الشيــن
................................... اصحا تراها يالسنــافي مصيبـــة

كم سلــة جوهر وهــي غلفها شيــن
.................................... والى قطعت بـها تقص الضريبة

وكم خــوصة بيضاء وتلعج بحديــن
.................................... لا حل تقطيــع اللحــم ما تثيبــه

وبــالك تقول اعور ولاله حذا عيـن
.................................... ولا كملت صبيـت لـــه سريبــه

تراي راعي الكيف والبن من حين
..................................... وسوالفي عند النشامى عجيبة

اقصـد علـى الحكــام والــذم بعديــن
..................................... للــي وراده مــا يــورد قليبــه

ياشـوق مركوز النـهد كامل الزيــن
.................................. اللي نهـوده مثل بيــض الربيبــة

مـلا المبـــرد بن والهيــل تسعيــن
................................. وجاب الحطب والما وتمره وطيبه

وقالت لي انتح ضيري يا ميسكين
................................. ومن دور العيشة عسى الله يثيبه

واثر الحضر بالقول ماهم بسهلين
.................................. يازين قول الحضر عجله وجيبـه

قلت اقعدي واوحي قصيد المحبين
................................... ذكرت من مثلك هـروجة عجيبة

حضرية في وسط قصر من الطين
.................................... عجابـــة لعابـــة لـــي حبيبـــة

هواي مضنوني مع اللي مقيميـن
.................................... واللي يشد ويرتحل ويش ابيبه

وضحكت بغر كنـهن القحــاويـن
................................... واشافي مثل البــرسيــم لبيبــة

صلو على المختار سيد النبيين
................................... عد النخل وعد ما ومى عسبيه

ارجو ان تنال استحسانكم والمعذرة عن كل نقص وتقصير ...والسلام عليكــم ورحمـة الله وبركاته ،،