الدوافع وقود النجاح

[لاشين]

مرة ولد صغير.. باباه قال له: لو ذاكرت هاجيب لك موتوسيكل..
الولد قعد يذاكر ويذاكر ويذاكر..
وبذل مجهود رهيب وهو بيحلم بالموتوسيكل ده..
وبعد ما نجح.. والده فعلا جاب له الموتوسيكل.. وكان صاحبنا مبسوط بيه جدا..
لكن في السنة اللي بعدها..
بدأ العام الدراسي.. لكن والده ماعرضش عليه صفقة زي صفقة الموتوسيكل اللي فاتت..
تفتكروا عمل إيه؟
هل ذاكر كويس وتفوق زي السنة اللي قبلها؟
هل بذل نفس المجهود اللي بذله؟

طيب.. نسيب الحكاية دي وخلونا ندخل في الموضوع..
ما الدوافع؟

الدوافع هي الوقود اللي بيخلينا ننجح أو نحقق أي إنجاز.. يعني ببساطة:
هي العجلة اللي خلت الولد - اللي في القصة اللي فاتت- يذاكر!
الدوافع دي مهمة جدا لأن هي اللي عندها القدرة تخلينا نحقق حاجات كتير جدا..


لو نايم وفي عز النوم.. ورن جرس المنبه عشان وراك معاد محاضرة مملة.. هل هتصحى؟
طيب..
لو نايم وفي عز النوم.. ورن جرس المنبه عشان وراك رانديفو!.. هل هتصحى؟
فيه فرق في الحالتين.. مش كده؟
ممكن تكون نايم نفس عدد الساعات.. وعايز تنام بنفس القدر.. لكن فيه حاجة خلتك تتغلب على رغبتك في النوم..

الحاجة دي هي اللي بنسميها: الدوافع!

عايز تقول إيه؟
عايز أقول إننا لازم ناخد بالنا من الدوافع بتاعتنا.. عشان نعرف نتحكم فيها ونحقق نجاحات رائعة في حياتنا.. هو ده اللي هنتكلم عنه النهارده..
عايز أقول إننا ممكن نغرس لنفسنا دوافع قوية.. لأي إنجاز صعب عايزين نحققه..

هو أنا بارغي ليه كده النهارده؟ تعالوا نخش تاني في الموضوع:

أنواع الدوافع:
فيه نوعين اتنين بس من الدوافع يا سادة..
1- دوافع ضعيفة:
الدوافع الضعيفة دي –زي ما هو واضح من اسمها– ضعيفة!
يعني هتخليك تحقق إنجاز واحد أو اتنين.. وبعد كده هتخلص!

الدوافع الضعيفة دي هي:
((الدوافع الخارجية))
يعني الدوافع اللي خارج نطاق سيطرتنا.. الدوافع اللي خارجنا احنا!

لو نجحت هاجيب لك موتوسيكل (الموتوسيكل دافع خارجي ضعيف).
هتكون أخلاقي عالية عشان أرضي الناس (رضا الناس دافع خارجي ضعيف).
مش هاسرق عشان ماروحش السجن (الخوف من السجن دافع خارجي ضعيف).
حد فاهم حاجة؟
طبعا القارئ هيستغرب ويقول لي: الأمثلة اللي إنت بتقولها دي عادية والدوافع دي مش ضعيفة ولا حاجة..
لكن اسمح لي –عزيزي القارئ- أقول لك:
في الأمثلة اللي فاتت
لو الأب ماجابش الموتوسيكل لابنه: مش هيذاكر!
لو الناس مش شايفين الشخص: هتبوظ أخلاقه!
لو مافيش حد شايفه: هيسرق!

مش ده اللي هيحصل؟
كل ده عشان الدوافع اللي مخلياه ينجح وتكون أخلاقه كويسة ومايسرقش:
كلها دوافع خارجية.. يعني خارج نطاق سيطرته وممكن تتغير في أي لحظة.. ولو اتغيرت.. مش هيستمر في الإنجاز..
عشان كده بنقول/ الدوافع الخارجية دي ممكن تكون قوية في الأول.. لكنها على المدى الطويل: دوافع ضعيفة وغير مستمرة إلى الأبد....
2- دوافع قوية:
الدوافع دي بقى مافيش زيها.. دوافع –زي ما هو واضح من اسمها– قوية جدا جدا جدا..
ومستمرة كمان.. وبتفضل على طووووووول...
شفت الجمال؟

الدوافع دي يا صاحبي هي:
((الدوافع الداخلية))..
دوافع جوانا احنا.. يعني لينا سيطرة كاملة عليها..


- أنا هاذاكر عشان أطلع الأول (الرغبة إنه يطلع الأول دافع داخلي قوي).
- هتكون أخلاقي عالية عشان أكون إنسان كويس وأرضي ربنا (الرغبة في التميز ورضا الله دافع داخلي قوي جدا).
- مش هاسرق عشان عايز أكون إنسان محترم (الرغبة في تقدير الذات دافع داخلي قوي).
شفت ازاي؟
أي هدف عايز تحققه.. شوف الدوافع اللي بتحركك ليه إيه.. لو لقيتها دوافع كلها خارجية.. يبقى اعرف إنها دوافع ضعيفة وما \تعتمدش عليها قوي..
لو لقيتها دوافع داخلية.. اعرف إنها دوافع قوية جدا.. يبقى اعتمد عليها ومبروك مقدما..
أي هدف عايز تحققه.. خلي دوافعك ليه دوافع داخلية.. خليك عايز تحقق الهدف عشان رغبة جواك إنت.. مش عشان ترضي حد..

الدوافع موجودة جواك إنت.. دور عليها وسخرها لتحقيق أهدافك.. واعرف إن دوافعك الداخلية دي هتديك طاقة جبارة تحقق اللي إنت عايزه.. لو إنت فعلا عايزه..!

ولا تنسوني بالدعاء منقول

[الرائد7]

السلام عليكم
موضوع مميز أخي لاشين ونقل موفق..
الدافع للعمل والنجاح لابد أن ينبع من الداخل لا أن تكون مجرد أوهام وخيالات
إن الطالب حين يذاكر أو المهندس حين يواصل دراسته أو الطبيب الذي يتخصص في مجال عمله او حتى العامل الذي يصحو مبكرا ليباشر العمل في مزرعته إن هؤلاء كلهم لديهم دوافع تدفعهم لبذل المزيد ودافعهم هو احساسهم بأنهم ماضون في الطريق وبأن العاقبة غدا ستكون حلوة جراء ماقاموا به من جهود متواصلة.
الفأل الحسن والتفاؤل والسعي للعمل الجاد والمثمر والمصابرة عنوان كل نجاح, ولابد أن تدرك الأجيال أن الوصول إلى القمة يحتاج إلى جهود وأن الثبات على القمة يحتاج لجهود أخرى.

لا تحسبن المجد تمرا أنت آكله=لن تبلغ المجد حتى تلعق الصبرا

[҈ ۩҈ زرقـاء الـيمامــة ۩҈]

موضوع جميل
يحمل الكثير من النُصح
التي ترتقي بالذات نحو الافضل
:q4: